މެންޗެސްޓާ (13 ޖަނަވަރީ) - މެންޗެސްޓާ ޔުނައިޓެޑާ ގުޅުނީ ކާމިޔާބު ހޯދަން ކަމަށާއި ލީގުގެ ހަތް ވަނަ އަށް ވާދަކުރާކަށް ނޫން ކަމަށް އެ ޓީމުގެ މަޝްހޫރު ފޯވަޑް ކްރިސްޓިއާނޯ ރޮނާލްޑޯ ބުނެފި އެވެ.
މި ސީޒަންގައި ޔުނައިޓެޑަށް އެނބުރި އައިސް، ރޮނާލްޑޯ ލަނޑުތަކެއް ޖެހި ނަމަވެސް، ޕްރިމިއާ ލީގުގައި ޔުނައިޓަޑް އޮތީ އޭނާ އުންމީދުކުރި ހިސާބެއްގައެއް ނޫނެވެ. ޔުނައިޓެޑް މި ވަގުތު އޮތީ ތާވަލްގެ ހަތް ވަނައިގަ އެވެ.
ޔުނައިޓެޑްގެ ނަތީޖާތައް ދަށްވުމާ ގުޅިގެން، އެ ކްލަބުން ވަނީ އޮލޭ ގުނަ ސޮލްސަޔާ ކޯޗުގެ މަގާމުން ވަކިކޮށް، ޖަރުމަންގެ ތަޖުރިބާކާރު ކޯޗު ރަލްފް ރަންގްނިކް ވަގުތީ ކޯޗަކަށް ހަމަޖައްސައިފަ އެވެ. ރަންގްނިކްގެ އިރުޝާދުގެ ދަށުން ޔުނައިޓެޑްގެ ނަތީޖާތައް ވަނީ ރަނގަޅުވެފަ އެވެ. ރަންގްނިކްގެ އިރުޝާދުގެ ދަށުން ޔުނައިޓެޑް ކުޅުނު ހަތް މެޗުން ހަތަރު މޮޅު ހޯދި ނަމަވެސް، އެ ޓީމު އޮތީ ސަޕޯޓަރުން އުންމީދުކުރާ ހިސާބެއްގައެއް ނޫނެވެ.
"އަހަރެން މި ކްލަބާ ގުޅުނީ ހަ ވަނަ ނުވަތަ ހަތް ވަނަ އަށް ވާދަކުރާކަށެއް ނޫން. އަހަރެން މި ކްލަބާ ގުޅުނީ ކާމިޔާބު ހޯދަން،" ރޮނާލްޑޯ ބުންޏެވެ. "މި ޓީމަކީ (ގަދަ ތިނަކަށް) ވާދަކުރެވޭ ފެންވަރުގެ ޓީމެއް. އެހެން ނަމަވެސް، ވަރަށް ގިނަ ކަންތައްތައް ރަނގަޅުކުރަންޖެހޭ. އަހަރަމެންގެ ވިސްނުން ބަދަލުކުރެވިއްޖެނަމަ، ރަނގަޅު ހިސާބަކަށް މި ޓީމަށް ދެވޭނެ."
ރޮނާލްޑޯ ބުނީ މިހާރު ޓީމަށް ދިމާވެފައިވާ މައްސަލަކީ ޓީމުގެ "މެންޓާލިޓީ ގޯސްވުން" ކަމަށެވެ. އަދި ކުޅުންތެރިންގެ ވިސްނުން ބަދަލުނުކޮށް، ނަތީޖާތައް ރަނގަޅުނުކުރެވޭނެ ކަމަށެވެ.
"ކަންތައްތައް ބަދަލުކުރުމުގެ ފުރުސަތު އެބައޮތް. ބަދަލުކުރެވިއްޖެނަމަ، ޓީމަށް އޭގެ ފައިދާކުރާނެ. ޔުނައިޓެޑަށް މިއަށްވުރެ ރަނގަޅު މަގާމުތައް ހައްގު،" ރޮނާލްޑޯ ބުންޏެވެ.
ސޮލްސަޔާ މަގާމުން ވަކިކޮށް، ޔުނައިޓެޑުން އެންމެ ފުރަތަމަ ވަގުތީ ކޯޗުކަން ހަވާލުކުރީ މައިކަލް ކެރިކަށެވެ. އެކަމަކު ދެ މެޗަށް ފަހު، އެ ކްލަބުން ވަނީ ރަންގްނިކް ކޯޗަކަށް ހަމަޖައްސައިފަ އެވެ.
ރޮނާލްޑޯ ބުނީ އެއް ސީޒަންގައި ތިން ކޯޗުންގެ އިރުޝާދުގެ ދަށުން މަސައްކަތް ކުރަންޖެހުމަކީ ޓީމަށް ފަސޭހަކަމެއް ނޫން ކަމަށެވެ. އަދި މިހާރުގެ ކޯޗު ރަންގްނިކަށް ވަގުތު ދޭންޖެހޭ ކަމަށެވެ. -- ސްކައި ސްޕޯޓްސް
