ލިމްބޭ، ކެމަރޫން (ޖެނުއަރީ 12) - އެފްރިކަން ކަޕް އޮފް ނޭޝަންސްގައި މިރޭ މާލީން 1-0 އިން ޓިއުނީޝިއާ ބަލިކުރި މެޗުގެ 90 މިނިޓް ނުނިމެނިސް މެޗުގެ ރެފްރީ ޒެމްބިއާގެ ޖެނީ ސިކާޒްވޭ، މެޗު ނިންމާލި މައްސަލައިގައި ހާލަތު އިތުރަށް ގޯހުން ގޯހަށް ހިނގައްޖެ އެވެ.
ދެ ވަނަ ހާފް ފަށައިގެން ތިން ވަނަ މިނިޓްގައި މާލީގެ އިބްރާހިމާ ކޯނޭ ޖެހި ޕެނަލްޓީން އެ ޓީމުން ލީޑުނެގި އެވެ. މި ޕެނަލްޓީ އަކީ ޓިއުނީޝިއާގެ އެލްޔެސް ޝްކީރީ އަތުގައި ބޯޅަ ޖެހުނު ކަމަށް ބަލައި، ދިން ޕެނަލްޓީ އެކެވެ.
ޓިއުނީސިއާ އަށް އެއްވަރުކޮށްދޭން ވަހްބީ ކަޒްރީ ޖެހި ޕެނަލްޓީ ވަނީ ނާކާމިޔާބުވެފަ އެވެ. މާލީ ލީޑުގައި އޮވެގެން މެޗު ކުރިއަށް ދަނިކޮށް ރެފްރީ ސިކާޒްވޭ ވަނީ މެޗުގެ 85 ވަނަ މިނިޓްގައި މެޗު ނިންމާލަން ކަށިގަނޑު ފުމެފަ އެވެ. އެއީ އޭނާ އަށް "އޮޅިގެން" ކުރެވުނު ކަމެކެވެ. ކުށް އިސްލާހުކޮށް، އަލުން މެޗު ފަށައި، ދެ މިނިޓް ކުޅެވުނުތަނުން ސިކާޒްވޭ ވަނީ މާލީގެ ބިލާލް ޓޫރޭ ކުރި ފައުލަކަށް ސީދާ ރަތް ކާޑު ދައްކައިފަ އެވެ. އެ ރަތް ކާޑު ދެއްކި ނިންމުން ދަމަހައްޓަން ސިކާޒްވޭ ނިންމީ ވީޑިއޯ އެސިސްޓަންޓް ރެފްރީ (ވީއޭއާރް) ވެސް ރަނގަޅަށް ބެލުމެއް ނެތި އެވެ. ވީއޭއާރް އިން އަލުން ބަލަން އެދުމުން ރެފްރީ ސިކާޒްވޭ ވަނީ އެކަން ކުރަން ދެކޮޅު ހަދައިފަ އެވެ.
ރަތް ކާޑުގެ މައްސަަލަ ހިނގިތާ ދެ މިނިޓް ފަހުން މެޗުގެ 90 މިނިޓް ވެސް ނުކުޅެނީސް ސިކާޒްވޭ މެޗު ނިންމާލީ އެވެ. މާލީގެ ކުޅުންތެރިއަކު މަދުވުމުންނާއި މެޗުގައި ވޯޓާ ބްރޭކެއް ވެސް ނަގައި ވީއޭއާރް ބަލަން ވެސް ވަގުތުތަކެއް ދިޔަ މެޗެއްގައި އިތުރު ވަގުތު ނުދޭން ނިންމުމުން ޓިއުނީޝިއާ ބެންޗުން ވަރަށް ބޮޑަށް ހިތްހަަމަނުޖެހުނެވެ.
ޓިއުނީޝިއާގެ ކޯޗު މޮންދާރު ކެބޭއިއާ ރެފްރީ ސިކާޒްވޭއާ ސުވާލުކުރަން ތަކުރާރުކޮށް ދިޔަ ނަމަވެސް އެ ފުރުސަތު ނުދީ ރެފްރީން ދަނޑުން ބޭލީ ސެކިއުރިޓީންގެ އެހީގަ އެވެ.
މެޗަށް ފަހު ބޭއްވި ނޫސްވެރިންގެ ބައްދަލުވުމުގައި މާލީގެ ކޯޗު މުހައްމަދު މަގައްސޫބާ ވާހަކަ ދައްކަނިކޮށް، އެފްރިކާގެ ފުޓްބޯޅަ ފެޑެރޭޝަން (ސީއޭއެފް)ގެ އޮފިޝަލުން ނޫސްވެރިންގެ ބައްދަލުވުން ކުރިއަށްދާ ރޫމަށް ހާޒިރުވެ، އަލުން މެޗުގެ ބާކީ ވަގުުތު ކުޅެން ދާން އެންގި އެވެ. އެއީ އިތުރު ވަގުތުގެ ތިން މިނިޓް ކުޅޭ ގޮތަށެވެ.
މާލީ ކުޅުންތެރިން އެންމެ ފުރަތަމަ ދަނޑަށް އެނބުރި ދާން ދެކޮޅު ހެދި އެވެ. އެކަމަކު، ފަހުން ޓީމުގެ ކޯޗު މަގައްސޫބާ އާއި މާލީ ފުޓްބޯޅަ އިދާރާއިން އެންގުމުން އެއްބަސްވި އެވެ. އެހެން ނަމަވެސް ޓިއުނީޝީއާ ކުޅުންތެރިން އަލުން މެޗު ކުޅެން ނުނިކުތުމުން މެޗު ޖެހުނީ 1-0 އިން ނިންމާލާށެވެ.
"އަހަރެން ފުޓްބޯޅައިގައި މި ހޭދަވީ 30 އަހަރު ތެރޭ ވެސް މި ވަރުގެ ކަމެއް ނުދެކެން. މެޗުގެ 90 މިނިޓް ހަމަނުވަނިސް މެޗު ނިންމާލާފައި. ކުޅުންތެރިން ޗޭންޖިން ރޫމަށް ދާން އަންގާފައި. ކުޅުންތެރިން އައިސް ބާތު ނަގަން ހުއްޓައި އެ ބުނަނީ އަލުން އައިސް މެޗުގެ ބާކީ ބައި ކުޅެން، އެއީ ވާނެ ކަމެއްތަ؟" ޓިއުނީޝިއާ ކުޅުންތެރިން ދަނޑަށް އަލުން ނުދޔަ ސަބަބާ ބެހޭގޮތުން އެ ޓީމުގެ ކޯޗު މޮންދާރު ބުންޏެވެ.
މިރޭގެ މެޗުގެ ރެފްރީ ޒެމްބިއާގެ ސިކާޒްވޭ އަކީ 2018 ވަަނަ އަހަރުގެ ފީފާ ވޯލްޑް ކަޕްގެ ގްރޫޕް ސްޓޭޖުގެ ދެ މެޗެއްގައި ރެފްރީކަން ކުރި ފަރާތެކެވެ. އޭނާގެ ފަރާތުން މިރޭ މި ފެނުނު ކަންކަމަށް ބަލާއިރު، އަލުން މި ފަހަރުގެ އެފްރިކަން ކަޕްގެ މެޗެއްގައި ރެފްރީ ކުރަން ލިބޭނެ ކަމަށް ނުބެލެވެ އެވެ.
