މެންޗެސްޓާ (ޖެނުއަރީ 11) - އިނގިރޭސި އެފްއޭ ކަޕްގައި ރޭ އެސްޓަން ވިލާ އަތުން 1-0 އިން މޮޅުވެ، މެންޗެސްޓާ ޔުނައިޓެޑުން މުބާރާތުގެ ހަތަރު ވަނަ ބުރަށް ދަތުރުކޮށްފި އެވެ.
ހަތަރު ވަނަ ބުރުގައި ޔުނައިޓެޑުން އަމިއްލަ ދަނޑުގައި ނުކުންނާނީ މިޑްލްސްބަރާއާ ދެކޮޅަށެވެ.
ޔުނައިޓެޑުން ރޭ އަމިއްލަ ދަނޑުގައި އެސްޓަން ވިލާއާ ދެކޮޅަށް ކުޅުނު މެޗަށް ނުކުތީ ޓީމުގެ ކެޕްޓަން ހެރީ މެގުއާ އާއި ކްރިސްޓިއާނޯ ރޮނާލްޑޯ ނެތި އެވެ. ޔުނައިޓެޑްގެ ކޯޗު ރަލްފް ރަންގްނިކް ބުނީ ރޮނާލްޑޯ އަށް "ކުޑަ" އަނިޔާގެ މައްސަލައެއް ދިމާވެފައިވާތީ މެޗުގައި ބޭނުންނުކުރީ ކަމަށެވެ.
ޔުނައިޓެޑަށް ރޭގެ މެޗުގެ ހަމައެކަނި ގޯލު ޖަހައިިދިނީ މެޗުގެ އަށް ވަނަ މިނިޓްގައި ސްކޮޓް މެކްޓޮމިނޭ އެވެ. މިއީ ފްރެޑް ނަގައިދިން ހުރަހަކުން މެކްޓޮމިނޭ ބޮލުން ޖެހި ގޯލެކެވެ. އެސްޓަން ވިލާ އިން ފުރަތަމަ ހާފުގައި ނަތީޖާ ހަމަހަމަކުރަން ރަނގަޅު ހަމަލާތަކެއް ފޮނުވާލި އެވެ. އޭރިއާބޭރުން އެސްޓަން ވިލާގެ ޖޯން މެކްގިން ޖެހި ބޯޅަ ޔުނައިޓެޑްގެ ކީޕަރު ޑޭވިޑް ޑެހެއާ މަތަކުރިއިރު، ޔުނައިޓެޑްގެ ޑިފެންޑަރު ވިކްޓަ ލިންޑެލޯފް ހެދި ގޯހެއްގެ ފައިދާނަގައި އޭރިއާތެރެއިން އޮލީ ވަޓްކިންސް ޖެހި ބޯޅަ އަމާޒުވީ ގޯލުގެ ހުރަސްދަނޑިއަށެވެ.
ދެ ވަނަ ހާފްގައި އެސްޓަން ވިލާގެ ވަޓްކިންސް އާއި ޑެނީ އިންގްސް ގުޅިގެން ވަނީ ގޯލެއް ޖަހައިފަ އެވެ. އެކަމަކު، ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލިއިރު، އެސްޓަން ވިލާގެ ޖޭކަބް ރަމްސީ އޮފްސައިޑް ކަމަށް ނިންމައި، ގޯލު ބަލައިނުގަންނަން ނިންމި އެވެ.
ޔުނައިޓެޑަށް ދެ ވަނަ ލަނޑެއް ޖަހައިދޭން އެ ޓީމުގެ މޭސަން ގްރީންވުޑް ޖެހި ބޯޅައެއް އެސްޓަން ވިލާގެ ކީޕަރު އެމިލިއާނޯ މާޓީނޭޒް ވަނީ މަތަކޮށްފަ އެވެ.
މި މެޗުގައި ވެސް ޔުނައިޓެޑްގެ މާކަސް ރަޝްފޯޑް ގޯލެއް ޖެހޭތޯ ކުރި މަސައްކަތް ކާމިޔާބެއްނުވި އެވެ. ރަޝްފޯޑަށް ގޯލެއް ނުޖެހި 11 މެޗު ނިމިފައިވާއިރު، މިއީ އޭނާގެ ކެރިއަރުގައި ގޯލެއް ނުޖެހި ހޭދަވާ އެންމެ ދިގު މުއްދަތެވެ. ރަޝްފޯޑް އެންމެ ފަހުން ގޯލެއް ޖެހީ އޮކްޓޫބަރު މަހު 30 ވަނަ ދުވަހު ޓޮޓެންހަމް ކޮޅަށެވެ.
