ތެހްރާން، އިރާން (ޖެނުއަރީ 10) - މިހާރު އިރާނުގައި ދިރިއުޅެނީ އެންމެ 12 އޭޝިއެޓިކް ޗީޓާ ކަމަށް އެ ގައުމުގެ ޑެޕިއުޓީ އެންވާރަމަންޓް މިނިސްޓަރު ވިދާޅުވެއްޖެ އެވެ.
ހަސަން އަކްބަރީ، ތަސްނީމް ނިއުސް އެޖެންސީ އަށް ވިދާޅުވީ ދުނިޔެ އިން ނެތިގެން ދިޔުމުގެ ބިރު ހީވެފައިވާ އެ ޖަނަވާރަށް ކުރިމަތިވެފައި ވަނީ "އިންތިހާ އަށް ނުރައްކާތެރި" ހާލަތެއް ކަމަށެވެ.
"މި ޖަނަވާރު ރައްކާތެރި ކުރަން މަގުތަކުގައި ހަރުކުރި ނިޝާންތަކާއި އޭގެ އާބާދީ އިތުރު ކުރަން އެޅި ފިޔަވަޅުތަކާ އެކު އޭތި ސަލާމަތް ކުރެވޭނެ ކަމަށް ނުބެލެވޭ،" އޭނާ ވިދާޅުވި އެވެ.
"މި ވަގުތު އުޅެނީ ނުވަ ފިރިހެން ޗީޓާ އާއި ތިން އަންހެން ޗީޓާ. އެއާ ހިލާފަށް 2010 ވަނަ އަހަރު 100 އެއްހާ ޗީޓާ އުޅުނު. މިހާރު ދިރިތިބި ޗީޓާތަކުގެ ހާލަތު އިންތިހާ އަށް ގޯސް."
އޭޝިއެޓިކް ޗީޓާއެއް.
އަކްބަރީ ވިދާޅުވީ ޗީޓާތަކުގެ އަދަދު މަދުވެ، ހާލަތު ގޯސްވެފައި ވަނީ ވާރޭ ނުވެހި ގިނަ ދުވަސްވުމާއި، އެ ތަކެތި ހިފާ މީހުންނާއި، ކާރު އެކްސިޑެންޓުތަކާ ހެދި ކަމަށެވެ.
ޗީޓާ އަކީ އެއްގަމުގައި އުޅޭ ޖަނަވާރުތަކުގެ ތެރެއިން އެންމެ ބާރަށް ދުވާ ޖަނަވާރެވެ. އޭގެ ދުވެއްޔަކީ ގަޑިއަކު 120 ކިލޯމީޓަރެވެ. މި ޖަނަވާރަކީ ކުރިން އިންޑިއާ އާއި ސެނެގޯލް އަދި އެހެން ހިސާބުތަކުގައި ވެސް ވަރަށް ގިނަ އެއްޗެކެވެ.
މިހާރު ވެސް ދެކުނު އެފްރިކާގެ ބައެއް ހިސާބުތަކުން ޗީޓާ ފެނެ އެވެ. ނަމަވެސް އުތުރު އެފްރިކާ އާއި އޭޝިއާ އިން މި ޖަނަވާރު ވަނީ ގާތްގަނޑަކަށް އެއްކޮށް ނެތިގެން ގޮސްފަ އެވެ.
އިންޓަނޭޝަނަލް ޔޫނިއަން ފޯ ކޮންޒަވޭޝަން އޮފް ނޭޗާ އިން ބުނާ ގޮތުގައި ޗީޓާ އާއިލާގައި ހިމެނޭ އޭޝިއެޓިކް ޗީޓާގެ ބާވަތަކީ ނެތިގެން ދިޔުމުގެ ބިރު އިންތިހާ އަށް އޮތް އެއްޗެކެވެ.
މިއީ ގަޑިއަކު 120 ކިލޯމީޓަރު ބާރަށް ދުވުމުގެ ގާބިލްކަން ލިބިފައިވާ ޖަނަވާރެއް.
އެފަދަ ޗީޓާ މިހާރު ޖަންގަލިތަކުން ފެންނަ މަދު ގައުމުތަކުގެ ތެރެއިން އެއް ގައުމަކީ އިރާނެވެ. އދ. ގެ އެހީއާ އެކު އެ ޖަނަވާރު ހިމާޔަތް ކުރުމުގެ މަޝްރޫއެއް 2001 ވަނަ އަހަރު އިރާނުން ފެށި އެވެ.
އިރާނުގެ ގައުމީ ފުޓްބޯޅަ ޓީމުން 2014 ވަނަ އަހަރުގެ ވޯލްޑް ކަޕް މުބާރާތުގައި ބޭނުން ކުރި ޖާޒީގައި ޗީޓާގެ ސޫރަ ހިމަނާފައި ވެ އެވެ.
