ޔައުންޑޭ، ކެމަރޫން (ޖެނުއަރީ 10) - އެފްރިކަން ކަޕް އޮފް ނޭޝަންސްގެ ފުރަތަމަ މެޗުގައި ރޭ ބުރްކީނަ ފާސޯ އަތުން ފަހަތުން އަރައި 2-1 އިން މޮޅުވެ، ކެމަރޫން ފެށުން ރަނގަޅުކުރިއިރު، މިއީ ކުރިއަށްދާން ރަނގަޅު ނަތީޖާއެއް ކަމަށް ކެމަރޫންގެ ކޯޗު ޓޯނީ ކޮންސެސާއޯ ބުނެފި އެވެ.
ބުރްކީނާ ފާސޯ އިން ލީޑުނެގި މި މެޗުގައި ކެމަރޫން މޮޅުވީ ފަހަތުން އަރަ އެވެ. މެޗަށް ފަހު ކޮންސެސާއޯ ބުނީ މިއީ ހަގީގަތުގައި ފެށުމަކަށް ބަލާއިރު ރަނގަޅު ނަތީޖާއެއް ކަމަށެވެ.
"މޮޅަކުން ފެށުން އެއީ ޓާގެޓަކީ. އެކަން ހާސިލްވުމުން އަހަރެން މި ހުރީ އުފަލުން. ދެން ރަނގަޅުކުރަން ޖެހޭ ކަންކަން އެބަހުރި،" ކްލަރެންސް ސީޑޯފްގެ ބަދަލުގައި 2019 ވަނަ އަހަރުގެ ސެޕްޓެމްބަރު މަހު ކެމަރޫނާ ހަވާލުވި ކޮންސެސާއޯ ބުންޏެވެ.
މުބާރާތް ބާއްވާ ގައުމު ކަމަށްވާ ކެމަރޫން ސިއްސުވާލުމަށް ފަހު، މެޗުގެ 24 ވަނަ މިނިޓުގައި ބުރްކީނަ ފާސޯ އިން ލީޑު ނެގީ ގުސްޓާވޯ ސަންގާރޭ ޖެހި ލަނޑުންނެވެ.
އެހެން ނަމަވެސް، ފުރަތަމަ ހާފުގެ ފަހުކޮޅު ކެމަރޫނަށް ކައިރިކައިރީގައި ލިބުނު ދެ ޕެނަލްޓީއެއް ކާމިޔާބުކޮށް، ކެމަރޫންގެ ފޯވަޑް ވިންސެންޓް އަބޫބަކާރް ވަނީ ކެމަރޫންގެ ކޮޅަށް މެޗުގެ ނަތީޖާ އަނބުރާލައިފަ އެވެ.
ގުރޫޕް ޢެގައި ކުޅުނު ފުރަތަމަ މެޗުން ކެމަރޫނަށް ތިން ޕޮއިންޓް ހޯދައިދިނުމުގައި އެ ޓީމުގެ ގޯލްކީޕަރު އަންދްރޭ އޮނާނާ ވެސް ވަނީ މުހިންމު ދައުރެއް އަދާކޮށްފަ އެވެ. ދެވަނަ ހާފުގައި އޮނާނާ ވަނީ ބުރްކީނަ ފާސޯގެ ނުރައްކާތެރި ހަމަލާތަކެއް ދިފާއުކޮށްފަ އެވެ.
މި ގުރޫޕްގައި ރޭ ކުޅުނު ދެވަނަ މެޗުގައި އިތޯޕިއާ އަތުން ކޭޕް ވާޑް މޮޅުވީ 1-0 އިންނެވެ. ދިހަ މީހުންނާއެކު މެޗު ނިންމާލި އިތޯޕިއާ ކޮޅަށް ލަނޑު ޖެހީ ކޭޕް ވާޑްގެ ފޯވަޑް ހޫލިއޯ ޓަވަރޭސް އެވެ. ކޮވިޑަށް ޕޮޒިޓިވްވުމުގެ ސަބަބުން، މި މެޗުގައި ކޭޕް ވާޑްގެ ބައެއް ކުޅުންތެރިންނަށް ނުކުޅެވުނެވެ. -- ބީބީސީ
