ކޮލޮމްބޯ، ސްރީލަންކާ (ޖެނުއަރީ 9) - ޑޮލަރަށް ޖެހިފައިވާ ސްރީލަންކާ އިން ޗައިނާ އަށް ދައްކަން ޖެހޭ ދަރަނި ފަސްކޮށްދޭން އެދިފައިވާ ކަމަށް ލަންކާގެ ރައީސް އޮފީހުން ބުނެފި އެވެ.
އެގޮތަށް އެދުނީ ޗައިނާގެ ފޮރިން މިނިސްޓަރު ވާންގް ޔީ އާދީއްތަ ދުވަހު ސްރީލަންކާ އަށް ކުރެއްވި ދަތުރުގައި ބޭއްވި މަޝްވަރާތަކުގެ ތެރެއިންނެވެ.
ފަތުރުވެރިކަމަށް ބަރޯސާވެފައިވާ ސްރީލަންކާގެ އިގްތިސާދަށް ކޮވިޑް ބަލިމަޑުކަމުގެ އަސަރު ވަނީ ވަރަށް ބޮޑަށް ކޮށްފަ އެވެ. ބޭރު ފައިސާގެ ރިޒާވް ދަށްވުމުން ކާބޯތަކެތި ރޭޝަންކޮށް، ޒަރޫރީ ތަކެތި ނުލިބުމުގެ މައްސަލަ ވަނީ ދިމާވެފަ އެވެ.
ޗައިނާ އަކީ ސްރީލަންކާ އަށް އެންމެ ގިނަ ލޯނު ފޯރުކޮށްދޭ ގައުމެވެ. ޗައިނާގެ ފޮރިން މިނިސްޓަރު ސްރީލަންކާ އަށް ވަޑައިގެންފައި ވާއިރު، ލަންކާގެ ދަރަނިތައް ނުދެއްކޭނެ ކަމުގެ އިންޒާރު ބައިނަލްއަގްވާމީ ރޭޓިން އެޖެންސީތަކުން ދީފައި ވެ އެވެ.
"ބަލިމަޑުކަމަށް ފަހު ދިމާވެފައިވާ އިގްތިސާދީ ކާރިސާ އަށް ރިއާޔަތްކޮށް، ދަރަނި ދެއްކުން ފަސްކުރެވުމަކީ ލިބޭނެ ވަރަށް ބޮޑު ލުޔެއްގެ ގޮތުގައި ރައީސް ފާހަގަކުރެއްވި،" ރައީސް އޮފީހުން ނެރުނު ބަޔާނެއްގައި ބުންޏެވެ.
ކޮލޮމްބޯގައި ހުންނަ ޗައިނާގެ އެމްބަސީ އިން އެކަމާ ގުޅޭ ގޮތުން އަދި ވަކި އެއްޗެއް ނުބުނެ އެވެ.
ނޮވެމްބަރު މަސް ނިމުނު އިރު ސްރީލަންކާގެ ބޭރު ފައިސާގެ ރިޒާވްގައި ހުރީ އެންމެ 1.5 ބިލިއަން ޑޮލަރެވެ. އެއީ އެއް މަސް ދުވަހުގެ އިމްޕޯޓަށްވާ ފައިސާ އެވެ.
ސްރީލަންކާގެ ކަރަންޓު ޖެނެރޭޓަރުތަކަށް ބޭނުންވާ ތެޔޮ އިމްޕޯޓް ކުރާނެ ފައިސާ ނެތުމުން، މިދިޔަ ހުކުރު ދުވަހުން ފެށިގެން ކަރަންޓުގެ ހިދުމަތް ވެސް ދެނީ ރޭޝަންކޮށްގެންނެވެ.
ލަންކާ ސަރުކާރުގެ ތަފާސްހިސާބުން ދައްކާ ގޮތުގައި އޭޕްރިލް 2021 ގެ ނިޔަކަށް ލަންކާގެ ބޭރުގެ ދަރަނީގެ ގޮތުގައިވާ 35 ބިލިއަން ޑޮލަރުގެ 10 ޕަސެންޓު ހިއްސާ ކުރަނީ ޗައިނާ އަށް ދައްކަން ޖެހޭ ފައިސާ އެވެ.
އޮފިޝަލުން ބުނާ ގޮތުގައި ދައުލަތުގެ ކުންފުނިތަކާއި މަރުކަޒީ ބޭންކަށް ދައްކަން ޖެހޭ ފައިސާ އަށް ބަލައިފި ނަމަ ޗައިނާ އަށް ދައްކަން ޖެހޭ ދަރަނި އެއަށްވުރެ މާ ބޮޑު ވާނެ އެވެ.
ބޮޑެތި އިންފްރާސްޓްރަކްޗާ މަޝްރޫއުތަކަށް ޗައިނާގެ އަތުން ދަރަންޏަށް ފައިސާ ނެގި ނަމަވެސް، އެ މަޝްރޫއުތަކުގެ މާ ބޮޑު ފައިދާއެއް ލަންކާ އަށް ނުލިބެ އެވެ.
ކޮލޮމްބޯގެ ދެކުނުގައި ބަނދަރެއް ބިނާކުރަން ނެގި ލޯނަކަށްވާ 1.4 ބިލިއަން ޑޮލަރު ދެއްކޭނެ ގޮތެއް ނެތުމުން، 2017 ވަނަ އަހަރު ލަންކާ އިން ވަނީ އެ ބަނދަރު ޗައިނާގެ ކުންފުންޏަކަށް 99 އަހަރަށް ދޫކޮށްފަ އެވެ.
އެމެރިކާ އާއި އިންޑިއާ އިން ބުނީ ބައިނަލްއަގްވާމީ ޝިޕިން ރޫޓަށް މުހިއްމު ހަމްބަންޓޯޓާ ބަނދަރުގެ ސަބަބުން އިންޑިއާ ކަނޑުގައި ޗައިނާ އިން އަސްކަރީ ބާރު ގަދަކޮށްފާނެ ކަމަށެވެ.
ނަމަވެސް ޗައިނާ އާއި ސްރީލަންކާ އިން ވެސް ބުނީ އެއްވެސް އަސްކަރީ ބޭނުމަކަށް ލަންކާގެ ބަނދަރުތައް ބޭނުން ނުކުރެވޭނެ ކަމަށެވެ.
