ބޭންކް އޮފް މޯލްޑިވްސްއިން ގދ. ހޯނޑެއްދޫގައި ކޭޝް އޭޖެންޓް ބޭންކިން ތައާރަފްކޮށް އޭޖެންޓުން މެދުވެރިކޮށް ބޭންކިންގެ ހިދުމަތްތައް ލިބޭނެގޮތް ހަމަޖައްސައިފި އެވެ. މިއީ ފައިސާ ނެގުމުގެ އިތުރުން ޑިޕޮސިޓް އަދި ޕޭމެންޓުގެ ހިދުމަތް ފޯރުކޮށްދޭނެ 100 ވަނަ އޭޖެންޓު ކަމަށް އެ ބޭންކުން ބުނެ އެވެ.
ކޭޝް އޭޖެންޓުންނަކީ ކޮބާ؟
އޭޖެންޓް ބޭންކިންގެ ހިދުމަތަކީ ބޭންކުގެ ބްރާންޗެއް އަދި އޭޓީއެމްއެއް ވެސް ނެތް ރަށްރަށުގެ މީހުންނަށް ބޭންކުގެ ހިދުމަތްތައް ފަސޭހަކަމާއެކު ހޯދޭނެ މަގު ފަހިކޮށްދިނުމުގެ ގޮތުން ބީއެމްއެލްއިން 2015 ވަނަ އަހަރު ފަށާފައިވާ ހިދުމަތެކެވެ. މި އެޖެންޓުން މެދުވެރިކޮށް އަތޮޅުތެރޭގެ ރައްޔިތުންނަށް އެއްވެސް ފީއަކާ ނުލައި، ފައިސާ ނެގުމާއި ޖަމާކުރުމާއި ކްރެޑިޓް ކާޑަށް ފައިސާ ނެގުމާއި ޖަމާކުރުމުގެ ހިދުމަތް ލިބިގެންދާނެއެވެ.
އެ ކޭޝް އޭޖެންޓުން މެދުވެރިކޮށް ކަސްޓަމަރުންނަށް ދުވާލަކު 2000ރ. އާއި ހަމައަށް ފައިސާ ނެގޭނެ އެވެ. އަދި ދުވާލަކު 10000ރ. ހަމަޔަށް ފައިސަ ޖަމާ ވެސް ކުރެވޭނެ އެވެ.
އެ ހިދުމަތް 2015 ވަނަ އަހަރު ފެށީ ހަމައެކަނި ފައިސާ ނެގުމުގެހިދުމަތެއްގެ ގޮތުގަ އެވެ. މިހާރު ވެސް ރާއްޖޭގެ އެކި ކަންކޮޅުތަކުގައި ހަމައެކަނި ފައިސާ ނެގުމުގެ ހިދުމަތް ފޯރުކޮށްދޭ 175 އޭޖެންޓުން އުޅެމުންދާ ކަމަށް ބީއެމްއެލްއިން މައުލޫމާތު ދިނެވެ.
އެގޮތުން ގދ. ހޯނޑެއްދޫގައި ގާއިމްކުރި ކޭޝް އެޖެންޓަކީ ފައިސާ ނެގުމާއި ޖަމާކުރުމާއި ލޯނާއި ކްރެޑިޓް ކާޑަށް ފައިސާ ދެއްކުމުގެ ހިދުމަތް ފޯރުކޮށްދޭ އޭޖެންޓުންގެ ތެރެއިން 100 ވަނަ އޭޖެންޓެވެ.
"މިއީ މުޅި ރާއްޖެއަށް ބޭންކިންގް ހިދުމަތް ފޯރުކޮށްދިނުމަށް އަޅުގަނޑުމެން ކަނޑައަޅާފައިވާ ސްޓްރެޓަޖީގެ ދަށުން ބްރާންޗެއް ނުވަތަ ސެލްފް ސާވިސް ބޭންކިންގް އޭޓީއެމް ސެންޓަރެއް ގާއިމްކޮށްފައިވާ ރަށަކަށް ދަތުރު ކުރުމުގެ ބަދަލުގައި މީހުން ދިރިއުޅޭ ރަށްރަށުގައި ބޭންކިންގެ ހިދުމަތް ފަސޭހަކަމާއެކު ހޯދޭނެ ނިޒާމެއް. އަޅުގަނޑުމެން މަސައްކަތް މި ކުރަނީ މިއަހަރު ތެރޭގައި މި ހިދުމަތް، މީހުން ދިރިއުޅޭ އިތުރު ރަށްތަކަށް ފޯރުކޮށްދިނުމަށް،" ބީއެމްއެލްގެ ޑެޕިއުޓީ ސީއީއޯ، އައިޝަތް ނޫރުއްދީން ވިދާޅުވި އެވެ.
މުޅި ރާއްޖޭގެ ބޭންކިންގް ހިދުމަތްތައް އެއް ވިއުގާ އެއްގެ ދަށަށް ގެނައުމާއި އެކު އަތޮޅުގައި 35 ބްރާންޗްާއި 76 ސެލްފް ސާވިސް ބޭންކިންސެންޓަރާއި 134 އޭޓީއެމާއި 200 އަށް ވުރެ ގިނަ ކޭޝް އޭޖެންޓުން ވަނީ ތައާރަފްކޮށްފަ އެވެ.
