އިދިކޮޅު ޕީޕީއެމްގެ ފަރާތުން ވެރި ރަށް މާލޭގައި މިހާރު ކޮންމެ ދުވަހަކު ވެސް ކުރިއަށްގެންދާ މުޒާހަރާތަކުގައި ބައެއް ފަހަރު ފުލުހުންނަށް ހަމަލާދިން ނަމަވެސް، މުޒާހަރާ ރޫޅާލުމާއި މީހުން ހައްޔަރު ކުރުމުގައި އަމަލު ކުރަނީ ގާނޫނުތަކާ އެއްގޮތަށް ކަމަށް ފުލުހުން ބުނެފި އެވެ.
ޕީޕީއެމްގެ ފަރާތުން ކުރިއަށްގެންދާ "އިންޑިއާ އައުޓް" މުޒާހަރާގެ ބައެއް ބައިވެރިންނަށް ފުލުހުން އަނިޔާ ކުރި ކަމަށް ތުހުމަތު ކުރުމުން އެ އިދާރާއިން ރޭ ނެރުނު ބަޔާނެއްގައި ޔަގީންކަންދީފައި ވަނީ "މީހުން ހައްޔަރުކުރުމުގައި ފުލުހުން އަމަލުކުރަނީ ޖިނާއީ އިޖުރާއަތުގެ ގާނޫނާއި އެނޫންވެސް ގާނޫނަކާ ގުޅޭކަމެއް ނަމަ އެ ގާނޫނަކާ އެއްގޮތްވާ ގޮތުގެ މަތިން" ކަމަށެވެ.
"މުޒާހަރާތަކާ އެނޫންވެސް ހާލަތްތަކުގައި މީހުން ހައްޔަރުކުރުމުގައި ފުލުހުން އަމަލުކުރަނީ ޖިނާއީ އިޖުރާއަތުގެ ގާނޫނާއި އެނޫންވެސް ގާނޫނަކާ ގުޅޭކަމެއް ނަމަ އެ ގާނޫނަކާ އެއްގޮތްވާ ގޮތުގެ މަތިންނެވެ. އެގޮތުން އަންހެނުން ހައްޔަރުކުރުމުގައި އަންހެން ފުލުހުން ހަރަކާތްތެރިވުމަކީ މި ހިދުމަތުން އިސްކަންދޭ ކަމެއް،" ފުލުހުންގެ ބަޔާނުގައި ބުނެފައިވެ އެވެ.
ޕީޕީއެމުން މާލޭގައި މުޒާހަރާ ކުރަނީ ގާނޫނާ ހިލާފަށްކަން ފާހަގަކޮށް ފުލުހުން އެ ބަޔާނުގައި އިތުރަށް ބުނެފައި ވަނީ މުޒާހަރައިގެ ބައެއް ބައިވެރިން ފުލުހުންނަށް ހަމަލާދީ ދައުލަތުގެ ބައެއް އޮފީސްތައް ހިންގުމަށް ހުރަސް އެޅުމަށް މަސައްކަތް ކުރާ ކަމަށެވެ.
"އެއްވުންތަކުގައި ބައިވެރިވާ ބައެއް މީހުން ފުލުހުންނަށް ހަމަލާދީ، ދައުލަތުގެ މުދަލަށް ގެއްލުންދީ ހަދާކަން ހިތާމައާއެކު ފާހަގަ ކުރަން. އަދި ދައުލަތުގެ ކަމާ ގުޅުންހުރި އިދާރާތަކުގެ ހިންގުމަށް ހުރަސްއެޅުމުގެ މަސައްކަތް ކުރާކަން ވެސް ފާހަގަ ކުރެވިފައިވޭ،" ފުލުހުން ބުނެފައިވެ އެވެ.
އޭގެ އިތުރުން ފުލުހުން ބުނެފައި ވަނީ، މުޒާހަރާގެ ބައިވެރިން މާލޭގެ ދަތުރުފަތުރަށް ވެސް ހުރަސްއަޅަމުންދާ ކަމަށެވެ.
"މި އެއްވުންތަކުގައި އާންމު ދަތުރުފަތުރަށް ދަތިކޮށް، މާލޭ އާއި ހުޅުމާލޭއާ ތެރޭގައި ދަތުރުކުރާ ބަސް މާލޭ މަގުމަތިން ހުއްޓުވައި އަދި ގާނޫނާ ހިލާފު އަމަލުތައް ކުރުމަށް ތަކުރާރުކޮށް ހިތްވަރުދީ އެކަމަށް ގޮވަމުންދާކަން ފާހަގަކުރެވި އެފަދަ މީހުންގެ މައްސަލަ ފުލުހުން ދަނީ ތަހުގީގުކުރަމުން،" ފުލުހުންގެ ބަޔާނުގައި ބުނެފައިވެ އެވެ.
އިދިކޮޅު ކޯލިޝަނުން ހިންގާ އިންޑިޔާ އައުޓް ކެމްޕޭނުގައި މިދިޔަ ހުކުރު ދުވަހު ފުލުހުން 29 މީހަކު ހައްޔަރު ކުރި އެވެ. އަދި ބުރާސްފަތި ދުވަހު ހަތް މީހަކު ހައްޔަރު ކުރި އެވެ. ހައްޔަރު ކުރިތާ ކުޑައިރުކޮޅެއްގެ ތެރޭގައި އެ އެންމެން ވެސް ވަނީ ބަންދުން ދޫކޮށްލައިފަ އެވެ.
