ބާމިންހަމް، އިންގްލެންޑް (ޖެނުއަރީ 8) - ބާސެލޯނާ އަށް ކުޅޭ ބްރެޒިލްގެ މިޑްފީލްޑަރު ފިލިއްޕޭ ކުޓީނިއޯ، ހަ މަސް ދުވަހުގެ ލޯން އެއްބަސްވުމެއްގައި އިނގިރޭސި ޕްރިމިއާ ލީގުގެ އެސްޓަން ވިލާ އަށް ބަދަލުވީ އެ ޓީމުގެ ކޯޗު ސްޓީވެން ޖެރާޑްގެ އެދުމަށް ކަމަށް މީޑިއާ ރިޕޯޓްތައް ބުނެފި އެވެ.
އިނގިރޭސި ފަސް ކްލަބެއްގެ ހުށަހެޅުން ލިބިފައިވަނިކޮށް، ކުޓީނިއޯ، 29، ވަނީ ޖެރާޑާ އެކު މަސައްކަތް ކުރަން ބޭނުންވާތީ އެސްޓަން ވިލާ އަށް އިއްޔެ ބަދަލުވެފަ އެވެ.
ކުޓީނިއޯގެ ޓްރާންސްފާ ކަންތައްތަކުގައި ބާސެލޯނާ އާއި އެސްޓަން ވިލާ އިން މަޝްވަރާ ކުރިިއިރު، ކުޓީނިއޯގެ މުސާރަ އިން އެސްޓަން ވިލާ ދޭން ބޭނުންވީ 65 ޕަސެންޓް އެވެ. ބާކީ 35 ޕަސެންޓް ބާސެލޯނާ އިން ދައްކަން ޖެހޭ ގޮތަށް މަޝްވަރާ ކުރެވުނު ނަމަވެސް، ފަހު ވަގުުތު ބާސެލޯނާ އަށް އެ ވަރު ދެވެން ނެތް ކަމަށް ބުނުމުން ކުޓީނިއޯ މިހާރު އެސްޓަން ވިލާގައި އެ ހުރީ ކުރިން އޭނާ އަށް ލިބެމުން އައި މުސާރަ އަށް ވުރެ، 35 ޕަސެންޓް މަދުކޮށެވެ.
ޖެރާޑާއި ކުޓީނިއޯ ވަނީ އެކުގައި ލިވަޕޫލަށް ކުޅެފަ އެވެ. ކުޓީނިއޯ ގެންނަން އެސްޓަން ވިލާގެ މެނޭޖްމަންޓަށް އެންމެ ބޮޑަށް ބާރު އެޅީ ޖެރާޑް ކަމަށް ސްޕެއިނުގެ ކަޓަލޫނިއާ ރޭޑިއޯ އިން ވަނީ ރިޕޯޓްކޮށްފަ އެވެ. އަދި ކުޓީނިއޯ އަލުން އިނގިރޭސި ޕްރިމިއާ ލީގަށް އަންނަ ކަމަށް ވާނަމަ އެސްޓަން ވިލާ އަކީ އެންމެ ރަނގަޅު ޓީމުކަން ޔަގީންކޮށްދޭން ޖެރާޑް ވަނީ ކުޓީނިއޯ އާއި އޭނާގެ އޭޖެންޓް ކިއާ ޖޫރަބްޗިއާން އަށް ގިނަ ފޯނުކޯލުތަކެއް ކޮށްފަ އެވެ.
ލިވަޕޫލަށް 201 މެޗުން 54 ގޯލު ޖެހި ކުޓީނިއޯ، އެ ޓީމު ދޫކޮށް 2018 ވަނަ އަހަރުގެ ޖެނުއަރީ މަހު ބާސެލޯނާ އަށް ބަދަލުވީ 142 މިިލިއަން ޔޫރޯ (160 މިލިއަން ޑޮލަރު)ގެ ޓްރާންސްފާ ފީ އަކަށެވެ. މިއީ ދުނިޔޭގެ ފުޓްބޯޅައިގައި ތިން ވަނަ އަށް އެންމެ އަގުބޮޑު ޓްރާންސްފާ އެވެ.
ބާސެލޯނާގެ ކޮންޓްރެކްޓްގައި ހުރެ، ކުޓީނިއޯ ވަނީ ލޯން އެއްބަސްވުމެއްގެ ދަށުން ބަޔާން މިއުނިކަށް ކުޅެމުން ޗެމްޕިއަންސް ލީގު ކާމިޔާބުކޮށްފަ އެވެ. އެ ފަހަރު ޗެމްޕިއަންސް ލީގުގެ ކުއާޓާ ފައިނަލުގައި ބާސެލޯނާ ކޮޅަށް ކުޓީނިއޯ ވަނީ ގޯލު ވެސް ޖަހައިފަ އެެވެ. ބާސެލޯނާ ޖޯޒީގައި ކުޓީނިއޯގެ އަސްލު ކުޅުން އަދި ދެއްކިފައިނުވެ އެވެ. އެކަމަކު، އެ ޓީމަށް ކުޅެދިން 106 މެޗުން ވަނީ 23 ގޯލު ޖެހި އެވެ.
ކުރިއަށް އޮތް ހަ މަސް ދުވަހުގެ ތެރޭގައި އެސްޓަން ވިލާގައި ކުޓީނިއޯ ރަނގަޅު ކުޅުމެއް ދައްކައިފިނަމަ އެ ކްލަބުން 38 މިލިއަން ޑޮލަރު ދީފައި ކުޓީނިއޯގެ އެއްބަސްވުން ދާއިމީ ކުރުމުގެ ފުރުސަތު އެބައޮތެވެ.
