ކުޅުދުއްފުށީ ސިޓީގައި ބާއްވަމުން އަންނަ އެންމެ ފޯރިގަދަ އެއް ފުޓްސަލް މުބާރާތް ކަމަށްވާ 'ޒިގްޒެގް އިންޓަ އޮފީސް ފުޓްސަލް ޓޯނަމެންޓް' ފަށަން ތައްޔާރުވެއްޖެ އެވެ.
އެ ސިޓީގެ ސަރުކާރު އަދި އަމިއްލަ އޮފީސްތަކުގެ މެދުގައި މި މުބާރާތް ބާއްވަނީ ކުޅިވަރު ކުރިއަރުވާ ޖަމިއްޔާއެއް ކަމަށްވާ 'ޒިގްޒެގް ފޯ ޔޫތު ލިންކޭޖް' އިންނެވެ.
ކޮންމެ އަހަރަކު ވަރަށް ފޯރިއާއެކު ކުޅުދުއްފުށގީގައި ބާއްވަމުން އަންނަ, ފުޓްސަލް މުބާރާތް މި އަހަރު މި ބާއްވަނީ ކޮވިޑާ ގުޅިގެން އެއް އަހަރުގެ މެދުކަނޑުމަކަށްފަހު އެވެ. އެންމެފަހުން 2019 ވަނަ އަހަރު ބޭއްވި މުބާރާތުގެ ޗެމްޕިއަންކަން ހޯދާފައިވަނީ ދިރާގެވެ.
"މިއީ މި ސިޓީގައި މިގޮތަށް ބޭއްވޭ އެންމެ ބޮޑު ފުޓްސަލް މުބާރާތް, މި މުބާރާތަށް އޮފީސްތަކުން ވަރަށް ބޮޑު ހޭދައެއްކޮށް ދުރާލާ ތައްޔާރުވޭ," ޒިގްޒެގްގެ އޮފިޝަލަކު ބުންޏެވެ.
ޕޮލިސް ކްލަބްގެ އަލީ ރިޝްވާން ޒިގްގެގް މުބާރާތުގައި ކުޅެނީ: މަޝްހޫރު ކުޅުންތެރިން ބައިވެރިވޭ
އޭނާ ބުނި ގޮތުގައި, މުބާރާތުގެ ގަވައިދު އޮންނަ ގޮތުން އޮފީހުން ބޭރު އެއް ކުޅުންތެރިއެއް ކޮންމެ ޓީމެއްގައި ވެސް ހިމެނެ އެވެ. އެހެންވެ, މި މުބާރާތުން ކުޅުދުއްފުށީގެ މޮޅެތި ކުޅުންތެރިންނާއި ރާއްޖޭގައި ފާހަގަކޮށްލެވޭ ފުޓްސަލް ތަރިން ވެސް ބައިވެރިވާކަން އޮފިޝަލް ފާހަގަކުރި އެވެ.
"އެންމެ ފަހުން ބޭއްވި މުބާރާތުގައި ވެސް ރާއްޖޭގައި ނަން މަޝްހޫރު ބައެއް ކުޅުންތެރިން ބައިވެރިވި," އޭނާ ބުންޏެވެ.
އަންނަ މަހުގެ އެއްވަނަ ދުވަހު ފަށަން ހަމަޖެހިފައިވާ މުބާރާތުގައި ބައިވެރިވުމުގެ ފުރުސަތު މާދަމާގެ ނިޔަލަށް ޒިގްޒެގް ޖަމިއްޔާއިން ވަނީ ހުޅުވާލާފަ އެވެ. އެކަމުގެ ތަފްސީލް ޒިގްޒެގް ޖަމިއްޔާގެ ފޭސްބުކް ޕޭޖުން ފެންނާނެ އެވެ.
ފޯރިގަދަ މި މުބާރާތް ސްޕޮންސާކުރުމުގެ ފުރުސަތު ވެސް އެ ޖަމިއްޔާއިން އޮތީ ހުޅުވާލާފަ އެވެ.
ޒިގްޒެގް ޖަމިއްޔާއިން ގެންދަނީ ކުޅުދުއްފުށީގައި މި މުބާރާތުގެ އިތުރުން ވެސް ކުޅިވަރުގެ ގިނަ މުބާރާތަކެއް ބާއްވަމުންނެވެ. އެގޮތުން, މި އަހަރަށް ވެސް އިތުރު މުބާރާތްތަކެއް އެ ޖަމިއްޔާއިން ވަނީ ތާވަލުކޮށްފަ އެވެ.
