ވެރިކަމުގައި ހުންނެވި ފަސް އަހަރު ށ. ކޮމަންޑޫއަށް ވަޑައިނުގަނެ، އަންނަ މަހު ބައްވާ އެ ދާއިރާގެ ބައި-އިލެކްޝަނާ ދިމާކޮށް ކުރީގެ ރައީސް އަބްދުﷲ ޔާމީން އެ ރަށަށް ވަޑައިގަތުމަކީ ލަދުވެތި އަމަލެއް ކަމަށް އެ ދާއިރާއަށް އެމްޑީޕީގެ ޓިކެޓުގައި ވާދަ ކުރައްވާ މުހައްމަދު ރާޝިދު ރޭ ވިދާޅުވެއްޖެ އެވެ.
ރޭ ބޭއްވި އޭނާގެ ކެމްޕެއިން ރަސްމީކޮށް ލޯންޗު ކުރުމުގެ ޖަލްސާގައި ވާހަކަ ދައްކަވަމުން ރާޝިދު ވިދާޅުވީ ޕީޕީއެމްގެ "ސަޕޯޓަރުން ނިކުމެ ގޮނޑުދޮށުގައި ކުރުނބާ ހަދައިގެން" އޭރުގެ ސަރުކާރުގެ އިސްވެރިންގެ އިސްތިގްބާލުގައި އެތައް ދުވަހަކު ތިބި ކަމަށެވެ. ނަމަވެސް މިދިޔަ ދައުރު ނިމިގެން ދިޔައިރު، އެ ދާއިރާގެ އެއްވެސް ރަށަކަށް، ކުރީ ސަރުކާރުގެ އެއްވެސް އިސްބޭފުޅަކު ވަޑައިނުގަންނަވާ ކަމަށް ރާޝިދު ވިދާޅުވި އެވެ.
"ސަޕޯޓަރުން ނިކުމެ ކުރުނބާ ހަދައިގެން ގޮނޑުދޮށުގައި ބޭތިއްބީ ކިތައް ދުވަހުތޯއޭ، އެންމެ ދުވަހަކު ވެސް ފަސް އަހަރު ނިމިގެން ދިޔައިރު މި ދާއިރާގެ ތިން ރަށުން ކުރެ ރަށަކަށް، ވެރިމީހާ ކީއްކުރަންތޯ، ވެރިމީހާގެ ދަށުން ތިބި މީހުންނަށް ވެސް އަރާލަން ނުކެރުނު ދާއިރާއެއް މި ނޫނީ ނޯންނާނެ،" ރާޝީދު ވިދާޅުވި އެވެ.
ރައިސުލްޖުމްހޫރިއްޔާ އިބްރާހިމް މުހައްމަދު ސޯލިހާއި ކުރީގެ ރައީސް މުހައްމަދު ނަޝީދުގެ ވެސް ބައިވެރިވެވަޑައިގެންނެވި އެ ޖަލްސާގައި ރާޝީދު ވިދާޅުވީ "މިއީ މިއަދު އަޅުގަނޑުމެން ކުރިމަތީގައި ވޯޓު ހޯދަން އައިސް ވޯޓުގެ ވާހަކަ ދައްކަން އަޅުގަނޑު ގަބޫލުކުރާ ގޮތުގައި ލަދުގަންނަން ޖެހޭ" ކަމަށެވެ.
ކެންސަރު ބަލީގައި އަވަހާރަވި އެ ދާއިރާގެ ކުރީގެ މެމްބަރު ހުސައިން ވަހީދުގެ ތަސައްވުރު ފުރިހަމަކޮށްދެވޭނީ އޭނާއަށް ކަމަށާއި ކުރިއަށް އޮތް ދެ އަހަރު ތެރޭގައި ކޮމަންޑޫ ދާއިރާގެ ތިން ރަށަށް ތަރައްގީ ގެނެވޭނީ ސަރުކާރު ކެންޑިޑޭޓަކަށް އެ ގޮނޑި ދީގެން ކަމަށް ރާޝިދު ގަބޫލުކުރެ އެވެ. އެގޮތުން ސަރުކާރާއި ގާތުން މަސައްކަތް ކުރާނެ ކަމުގެ ޔަގީންކަން ރާޝިދު އެމްޑީޕީގެ އިސްވެރިންނަށާއި އިސް ލީޑަރަށް އެރުވި އެވެ.
"އަޅުގަނޑުމެންގެ އަހް، އަލްމަރުހޫމް ހުސައިން ވަހީދު އަދުގެ ސަރުކާރާއި ގުޅިގެން ފައްޓަވާފައިވާ މަސައްކަތްތައް އެއް ބާރުމިނެއްގައި ރައިސުލްޖުމްހޫރިއްޔާއާއެކު، ދިވެހި ދައުލަތާއެކު އެމްޑީޕީއެކު ކުރިއަށް ގެންދިއުމަށްޓަކައި، އަތުކުރި އޮޅާލާ، ނިކަން ފޫގަޅާލައިގެން ނިކުމެ އަޅުގަނޑު މިއަދު މި މަސައްކަތާ މި ކުރިމަތިލީ" ރާޝިދު ވިދާޅުވި އެވެ.
މި އިންތިހާބު އޭނާއަށް ބޮޑުތަނުން ކާމިޔާބު ކުރެވޭނެ ކަމަށްވެސް ރޭ ކޮމަންޑޫގައި ބޭއްވި ޖަލްސާގައި ވާހަކަ ދައްކަވަމުން ރާޝިދު ވިދާޅުވި އެވެ.
ކޮމަންޑޫ ދާއިރާގައި ސަރުކާރުން ހިންގާ 22 މަޝްރޫއުއެއްގެ މަސައްކަތް ކުރިއަށް ދާއިރު، ރޭ ބޭއްވި ޖަލްސާގައި ރައީސް ވަނީ ގިނަ ވައުދުތަކަކާއި އެކު މިހާރު ކުރިއަށްދާ މަޝްރޫއުތަކުގެ މަސައްކަތް އިންތިހާބުގެ ކުރިން ފެށިގެން ދާނެ ކަމަށް ވިދާޅުވެފަ އެވެ.
އެގޮތުން ކުޑަ ބިމެއް އޮތް ނަމަވެސް ރަށުގައި ދިރިއުޅޭ މީހުންގެ އާބާދީ ބޮޑު ކޮމަންޑޫގެ ބޯހިޔާވަހި ކަމަށް ދާއިމީ ހައްލެއް ހޯދުމަށް ދެ ކޮމަންޑޫ ގުޅުވާލުމުގެ މަސައްކަތް އަންނަ ހަފްތާ ފެށިގެން ދާނެ ކަމަށް ރައީސް ވިދާޅުވި އެވެ.
ކޮމަންޑުއަށް ސަރުކާރުން ކޮށްދޭން ރައްޔިތުން އެދޭ އެހެން ކަންކަމުގެ ތެރޭގައި ވަޒީފާގެ ފުރުސަތު ހިމެނޭތީ އެރަށާ ކައިރީގައި ހުރި ފަޅު ރަށްތައް ޓޫރިޒަމަށް ހުޅުވައިލާނެ ކަން ވެސް ރައީސް ސޯލިހު އިއުލާނު ކުރެއްވި އެވެ. އަދި އެ ދާއިރާގައި ހިމެނޭ ފޯކައިދޫގެ ޗަކަ ބިން ހިއްކުމަށް ފަހު އެތަނުން ގޯތި ދޫކުރާނެ ކަމަށާއި މަރޮށީގެ ބަނދަރުގެ މަސައްކަތް ވެސް ވަރަށް އަވަހަށް ފަށާނެ ކަމަށް ރައީސް ވިދާޅުވި އެވެ.
އާއްމު ގޮތެއްގައި ސިޔާސީ ގޮތުން މާ ވަރުގަދައަށް ރައްދު ދެއްވާ ބޭފުޅަކަށް ނުވި ނަމަވެސް، އެމަނިކުފާނު ރޭ އިދިކޮޅު ފަރާތްތަކާއި ބައި އިލެކްޝަނުގައި ވާދަކުރާ އެހެން ޕާޓީތަކަށް ނުސީދާ "ހަމަލާތަކެއް" ދެއްވި އެވެ.
ރައީސް ވިދާޅުވީ މި އިންތިހާބުގައި ވޯޓް ދައްވަންވީ ޑްރަގްގެ ވިޔަފާރި އާއި މަނީ ލޯންޑާ ކުރުމާ ދެކޮޅަށް ކަމަށެވެ. ވޯޓްދޭންވީ ބަޣާވާތާ ދެކޮޅަށް ކަމަށް ވެސް އެމަނިކުފާނު ވިދާޅުވި އެވެ.
އަންނަ ފެބްރުއަރީ ފަސް ވަނަ ދުވަހު ބާއްވާ ބައި އިލެކްޝަންގައި އެމްޑީޕީ އިން ވާދަކުރައްވާ ރާޝިދުއަކީ 10 އަހަރު ވަންދެން ފޯކައިދޫ ކައުންސިލްގެ މެމްބަރުކަމާއި ރައީސް ކަން ކުރެއްވި ބޭފުޅެކެވެ. އޭނާއަކީ މިހާރު އެ އިދާރާގެ ސެކެޓްރީ ޖެނެރަލް އެވެ.
