ބާސެލޯނާ (ޖެނުއަރީ 7) - ބާސެލޯނާގެ ބްރެޒިލް މިޑްފީލްޑަރު ފިލިއްޕޭ ކުޓީނިއޯ އަށް އިނގިރޭސި ޕްރިމިއާ ލީގުގެ ފަސް ކްލަބެއްގެ ހުށަހެޅުން ލިބިފައިވާ ކަމަށް ބްރެޒިލްގެ މީޑިއާ ރިޕޯޓްތައް ބުނެފި އެވެ.
ބްރެޒިލްގެ މީޑިއާތަކުން ރިޕޯޓްކުރާގޮތުގައި ކުޓީނިއޯ, 29, ގެންނަން އޭނާގެ ކުރީގެ ކްލަބް ލިވަޕޫލްގެ އިތުރުން ދެން ހުށަހަޅާފައި އޮތީ އެސްޓަން ވިލާ، އެވަޓަން، ޓޮޓެންހަމް އަދި އާސެނަލް އެވެ.
ލިވަޕޫލް ދޫކޮށް 2018 ވަނަ އަހަރުގެ ޖެނުއަރީ މަހު ކުޓީނިއޯ ބާސެލޯނާ އަށް ބަދަލުވީ 142 މިިލިއަން ޔޫރޯ (160 މިލިއަން ޑޮލަރު)ގެ ޓްރާންސްފާ ފީ އަކަށެވެ. މިއީ ދުނިޔޭގެ ފުޓްބޯޅައިގައި ތިން ވަނަ އަށް އެންމެ އަގުބޮޑު ޓްރާންސްފާ އެވެ. އޭގެ ފަހުން އެކި ފަހަރު މަތިން ކުޓީނިއޯ އަލުން ލިވަޕޫލަށް ބަދަލުވާނެ ކަމަށް ވާހަކަ ދެކެވުނު ނަމަވެސް މިހާތަނަށް އޭގެ އެއްވެސް ކަމެއް ނުފެނެ އެވެ.
އެކަމަކު، ބްރެޒިލްގެ މީޑިއާ ރިޕޯޓްތައް ބުނާގޮތުން އެފްރިކަން ކަޕް އޮފް ނޭޝަންސް އަށް ލިވަޕޫލްގެ މުހައްމަދު ސަލާހާއި ސަޑިއޯ މާނޭ ގޮސްފައިވާތީ ލޯން ޑީލެ އްގައި ކުޓީނިއޯ ގެނައުމުގެ ވިސްނުމެއް ލިވަޕޫލުން ގެންގުޅެ އެވެ.
ކުޓީނިއޯއާ އެކު ލިވަޕޫލަށް 81 މެޗު ކުޅުނު އެ ޓީމުގެ ކުރީގެ ކެޕްޓަން ސްޓީވެން ޖެރާޑް މިހާރު ހުރީ އެސްޓަން ވިލާގެ ކޯޗުކަމާ ހަވާލުވެ އެވެ. އެސްޓަން ވިލާ އިން ޖެނުއަރީ ޓްރާންސްފާގައި ކުޓީނިއޯ ގެންނަން އެންމެ ބޮޑަށް ބާރުއަޅަނީ ޖެރާޑް އެވެ. ދާދި ފަހުން އިންޓަވިއުއެއްގައި ޖެރާޑް ވަނީ ކުޓީނިއޯ އަށް ތައުރީފުކޮށް ވާހަކަ ދައްކައިފަ އެވެ. އެކަމަކު، ޖެރާޑް ވަނީ އެސްޓަން ވިލާ އިން ކުޓީނިއޯ ގެންނަން މަސައްކަތް ކުރޭތޯ ކުރި ސުވާލަށް ޖަވާބު ދޭން ދެކޮޅު ހަދައިފަ އެވެ.
އެވަޓަން އިން ކުޓީނިއޯ ގެންނަން މަސައްކަތް ކުރާއިރު، އެ ޓީމާ ހަވާލުވެ ހުރީ ކުޓީނިއޯ އަށް އިންޓަ މިލާނުގައި ކޯޗުކޮށްދިން ރަފައެލް ބެނިޓޭޒް އެވެ. ކުޓީނިއޯ އެވަޓަން އަށް ބަދަލުވެއްޖެނަމަ ލިވަޕޫލްގެ ގިނަ ސަޕޯޓަރުންގެ ހިތްހަމަނުޖެހުންތައް އަމާޒުވާނެތީ، އޭނާ އެވަޓަންއާ ގުޅުމުގެ ފުރުސަތު ކުޑަ އެވެ.
ކުޓީނިއޯ އަލުން އިންގްލެންޑަށް ބަދަލުވާނަމަ ދެން ކުޅޭނީ ލަންޑަންގެ ކްލަބަކަށް ކަމަށް މީގެ ކުރިން ސްޕެއިނުގެ ނޫހަކުން ވަނީ ރިޕޯޓްކޮށްފަ އެވެ. ކުޓީނިއޯ އަށް މި ވަގުތު ހުށަހެޅުމެއް ލިބިފައި އޮތް ލަންޑަންގެ ދެ ކްލަބަކީ ޓޮޓެންހަމް އާއި އާސެނަލް އެވެ.
އާސެނަލްގެ ޓެކްނިކަލް ޑިރެކްޓަރު އެޑޫ އާއި ކުޓީނިއޯގެ އޭޖެންޓް ކިއާ ޖޫރަބްޗިއާންއާ ގާތްގުޅުމެއް އޮވެ އެވެ. އެ ގުޅުމުގެ ތެރެއިން ކުޓީނިއޯ އާސެނަލަށް ދިއުމުގެ ކޮންމެވެސް ފުރުސަތެއް އެބައޮތް ކަމަށް މީގެ ކުރިން ބްރެޒިލްގެ ޓީވީ އަކުން ރިޕޯޓްކޮށްފައިވެ އެވެ.
މި މަހުގެ ޓްރާންސްފާ މާކެޓް ތެރޭގައި ކުޓީނިއޯ ބާސެލޯނާ ދޫކޮށްލާނެކަން ޔަގީންވެފައިވާއިރު، އޭނާ ދެން ގުޅޭނެ ކްލަބެއް ވަރަށް އަވަހަށް އިއުލާނުކުރާނެ ކަމަށް ސްޕެއިނުގެ މީޑިއާ ރިޕޯޓްތައް ބުނެ އެވެ.
