ޓޯކިޔޯ، ޖަޕާން (ޖެނުއަރީ 6) - ޖަޕާނުގައި ތިބި އެމެރިކާ ސިފައިންގެ ސަބަބުން ކޮވިޑް ފެތުރިފައި ވާތީ އެކަމާ މެދު ފިޔަވަޅު އަޅައި ދިނުމަށް ޖަޕާނުގެ ފޮރިން މިނިސްޓަރު ޔޮޝިމަސާ ހަޔަޝީ އެދިވަޑައިގެންފި އެވެ.
ހަޔަޝީ އެދިވަޑައިގެންނެވީ ޖަޕާނުގައި އެމެރިކާ ސިފައިން އެއް ތަނުން އަނެއް ތަނަށް ދިޔުމުގައި އަމަލު ކުރާ ގޮތް އިތުރަށް ހަރުކަށި ކުރުމަށެވެ. އެކަމަށް އެދުނީ އެމެރިކާގެ ސެކެޓްރީ އޮފް ސްޓޭޓް އެންޓޮނީ ބްލިންކެންގެ ކިބައިންނެވެ.
ޖަޕާނުގައި އެންމެ ގިނަ އަދަދެއްގެ އެމެރިކާ ސިފައިން ތިބޭ އޮކިނާވާގައި ކޮވިޑް ކޭސްތައް އިތުރުވެފައި ވާއިރު، ބަލި ފެތުރެން ފެށީ އެމެރިކާ ސިފައިންގެ މަރުކަޒުންނެވެ.
ބުދަ ދުވަހު އޮކިނާވާ އިން 623 ކޭސް ފެނުނު އިރު، އެއީ އަންގާރަ ދުވަހާ އަޅާ ބަލާއިރު ތިން ގުނަ އިތުރު އަދަދެކެޥެ. އެހެންވެ، އޮކިނާވާގައި ފިޔަވަޅުތައް ހަރުކަށި ކުރަން ދަނީ ތައްޔާރުވަމުންނެވެ.
ބްލިންކެން އަށް ފޯނުން ގުޅުއްވާ ހަޔަޝީ އެދިވަޑައިގެންނެވީ އެމެރިކާ ސިފައިން އާއްމުންގެ ތެރެއަށް ނުކުމެ އުޅުން މަދުކުރެވޭނެ ގޮތަކަށް ފިޔަވަޅުތައް އެޅުމަށެވެ.
އޮކިނާވާގައި ހުންނަ އެމެރިކާ ސިފައިންގެ މަރުކަޒުތަކުން ޖެނުއަރީ ހަތަރު ވަނަ ދުވަހު އެކަނިވެސް 400 އަށް ވުރެ ގިނަ ކޮވިޑް ކޭސް ރިޕޯޓު ކުރި އެވެ.
އޮކިނާވާގެ ގަވަރުނަރު ޑެނީ ޓަމަކީ ވަނީ އެމެރިކާ ފައުޖަށް ފާޑުވިދާޅުވެ، ކޮވިޑާ ގުޅިގެން އަޅާފައިވާ ފިޔަވަޅުތަކާ އެއް ގޮތަށް އަމަލު ނުކުރާ ކަމަށް ތުހުމަތު ކުރައްވާފަ އެވެ.
ބައިޑެން އަށް ފޯނުން ގުޅުއްވާ، ހަޔަޝީ ވެސް ވިދާޅުވީ ގައުމަށް އެތެރެވާ ހުރިހާ އެންމެން ވެސް ވަގުތުން ޓެސްޓުކޮށް، ދެ ހަފުތާގެ ކަރަންޓީނަށް ދާން ޖެހޭނެ ކަމަށް އޮތް އުސޫލަށް އެމެރިކާ ސިފައިން އަމަލު ކުރަމުން ނުދާ ކަމަށެވެ.
އެ ޝަކުވާއާ ގުޅިގެން، އެމެރިކާ ސިފައިން ޖަޕާނަށް އެތެރެވާތާ 24 ގަޑިއިރުގެ ތެރޭގައި މިހާރު ކޮވިޑަށް ޓެސްޓު ކުރަން ފަށާފައިވާ ކަމަށް ޖަޕާން ސަރުކާރުން ބުނެ އެވެ.
ޖުމްލަކޮށް ޖަޕާނުން ފެންނަ ކޭސްތަކުގެ އަދަދު އެހެން ގައުމުތަކާ އަޅާ ބަލާއިރު ވަރަށް މަދު ނަމަވެސް، އަދަދުތައް މަތިވަމުންދާކަން ފާހަގަކުރެވެ އެވެ.
ބުދަ ދުވަހު މުޅި ޖަޕާނުން 2،600 ކޭސް ފެނުނު އިރު، މިއީ އޮކްޓޯބަރު މަހުގެ ފަހުން 2000 އިން މައްޗަށް އަދަދުތައް ދިޔަ ފުރަތަމަ ފަހަރެވެ.
