ފަލަސްތީނުގެ ޖަމިއްޔާއަކާ ޓެރަރިސްޓު ގްރޫޕަކާ ގުޅުން އޮންނަ ކަމަށް ބުނެ، އެ ޖަމިއްޔާއަށް ފަންޑު ކުރުން ނެދަލޭންޑްސް އިން ހުއްޓާލައިފި އެވެ.
ޔޫނިއަން އޮފް އެގްރިކަލްޗަރަލް ވޯކް ކޮމިޓީޒް (ޔޫއޭޑަބްލިއުސީ) އަށް ތުހުމަތު ކުރަނީ ޕޮޕިއުލާ ފްރަންޓް ފޯ ދަ ލިބަރޭޝަން އޮފް ޕަލެސްތީން (ޕީއެފްއެލްޕީ) އާ ގުޅުން އޮންނަ ކަމަށެވެ.
ދެހާސް ނަވާރަ ވަނަ އަހަރު ހުޅަނގު އައްސޭރީގައި އިޒްރޭލުގެ އަންހެނަކު މަރާލުމުގެ ފަހަތުގައި ވަނީ ޕީއެފްއެލްޕީ ކަމަށް އިޒްރޭލުން ތުހުމަތު ކުރެ އެވެ.
ޕީއެފްއެލްޕީ އަކީ ޓެރަރިސްޓް ގްރޫޕެއްގެ ގޮތުގައި އިޒްރޭލާއި އެމެރިކާ އަދި ޔޫރަޕިއަން ޔޫނިއަން (އީޔޫ) އިން އޮންނަނީ ކަނޑައަޅާފަ އެވެ.
މިދިޔަ އޮކްޓޯބަރު މަހު، ޓެރަރިސްޓު ގްރޫޕުތަކެއް ކަމަށް ކަނޑައަޅައި އިޒްރޭލުން އިއުލާނު ކުރި ފަލަސްތީނުގެ އަމިއްލަ ޖަމިއްޔާތަކުގެ ލިސްޓުގައި ޔޫއޭޑަބްލިއުސީ ހިމެނެ އެވެ.
ޔޫއޭޑަބްލިއުސީ އަކީ ފަލަސްތީނުގެ ދަނޑުވެރިންނާ އެކު މަސައްކަތް ކުރާ ޖަމިއްޔާ އެކެވެ. އެ ޖަމިއްޔާ އަށް 2007 ވަނަ އަހަރުން ފެށިގެން ނެދަލޭންޑްސްގެ އެހީ ލިބުނެވެ.
އެ ޖަމިއްޔާ އިން ބުނީ ނެދަލޭންޑްސްގެ ނިންމުމާ މެދު ހައިރާންވެ ހިތާމަ ކުރާ ކަމަށާއި އެއީ އިޒްރޭލު ސަރުކާރުގެ ޕްރެޝަރާ ހެދި ސިޔާސީ މަގުސަދެއްގައި ނިންމި ނިންމުމެއް ކަމަށެވެ.
