ޔަމަނުގެ މަރިބް ސިޓީ ހިފަން ހޫތީ ހަނގުރާމަވެރިން ކުރަމުންދާ ހަނގުރާމައިގައި އެ މީހުންގެ އިސްވެރިޔަކު މަރުވެއްޖެ އެވެ.
ޔަމަން ސަރުކާރުގެ ފައުޖުން ބުނީ ހޫތީންގެ ވެރިޔާ މަރުވީ ސައުދީ އަރަބިއްޔާގެ އަސްކަރީ ކޯލިޝަނުން ދިން ވައިގެ ހަމަލާއެއްގައި ކަމަށެވެ.
މަރިބް ސިޓީ ހިފަން ހޫތީން ހަމަލާދޭތާ ގިނަ މަސްތަކެއް ވެއްޖެ އެވެ. ސަރުކާރުގެ ފައުޖާއި ސައުދީ އަސްކަރީ ކޯލިޝަނުން ވެސް ދަނީ ރައްދުގައި ހަމަލާދެމުންނެވެ.
މަރިބް އަކީ ޔަމަނުގައި ތެލުގެ މުއްސަނދިކަން އޮތް އުތުރު މަރިބް ޕްރޮވިންސް އިން މި ވަގުތު ސަރުކާރުގެ ކޮންޓްރޯލް ހިނގާ އެންމެ މުހިއްމު އަދި ހަމައެކަނި ސިޓީ އެވެ.
މަރިބް ހިފަން ކުރާ ހަނގުރާމައިގައި މިހާރު ވެސް ގިނަ ބަޔަކު ވަނީ މަރުވެފަ އެވެ. ބުދަ ދުވަހު ހޫތީން ބުނީ ޝަބްވާ ޕްރޮވިންސްގެ ވައިސް ގަވަރުނަރު އަހްމަދު އަލް ހަމްޒާ މަރުވެފައިވާ ކަމަށެވެ.
ޔަމަން ސަރުކާރުގެ ފައުޖުން ބުނީ އޭނާ މަރުވީ އަންގާރަ ދުވަހުގެ ރޭ ސައުދީ އަސްކަރީ ކޯލިޝަނުން ހޫތީންގެ ކޮމާންޑަރުންތަކަކަށް އަމާޒުކޮށް ދިން ހަމަލާއެއްގައި ކަމަށެވެ.
ޔަމަނުގެ ގާނޫނީ ސަރުކާރާ ދެކޮޅަށް ތެދުވެ ހޫތީން ހަނގުރާމަ ފެށީ 2014 ވަނަ އަހަރު އެވެ. އެ މީހުން ވެރިރަށް ސަނާ ހިފުމުން، ސަރުކާރުގެ އެދުމަށް ސައުދީ އަސްކަރީ ކޯލިޝަނުން ހަނގުރާމައިގެ ތެރެއަށް ވަނީ 2015 ވަނަ އަހަރު އެވެ.
ޔަމަން ހަނގުރާމައިގައި އެތައް ހާސް ބަޔަކު މަރުވެ، އެތައް މިލިއަން ބަޔަކު ހާލުގައި ޖެހިފައި ވާއިރު، ހަނގުރާމަ ނިމުމުގެ ނިޝާނެއް އަދިވެސް ނުފެނެ އެވެ. އދ. އިން ލަފާކުރާ ގޮތުގައި އެ ހަނގުރާމައިގައި 377،000 އަށް ވުރެ ގިނަ މީހުން ވަނީ މަރުވެފަ އެވެ.
