ތެހްރާން، އިރާން (ޖެނުއަރީ 5) - އޮމާން އަށް ދަތުރު ކުރަމުން ދަނިކޮށް މޫސުން ގޯސްވެ، ފެތުނު ބޯޓެއްގައި ތިބި އިންޑިއާގެ 11 ފަޅުވެރިން އިރާނުގެ ކޯސްޓުގާޑުން ސަލާމަތްކޮށްފި އެވެ.
އިރާނުން ބުނީ އިންޑިއާގެ ބޯޓު ދަތުރު ކުރަމުން ދިޔައީ އޮމާންގެ ސޮހާރް ބަނދަރަށް ކަމަށެވެ. މޫސުން ގޯސްވި ދަނޑިވަޅުގައި ބޯޓަށް ޓެކްނިކަލް މައްސަލައެއް ދިމާވެ އޭގެ މިސްރާބު އިރާނަށް ބަދަލުކުރި އެވެ.
ނަމަވެސް އިރާނާ ހަމައަށް ފޯރުމުގެ ކުރިން ބޯޓު އަޑިއަށް ދިޔަ އެވެ. ހަކުރުގެ ޝިޕްމަންޓެއް ހިފައިގެން ދަތުރު ކުރި ބޯޓު ފެތުނީ އިރާނުގެ ގަބްރިކް ޑިސްޓްރިކްޓާ ހަތަރު ނޯޓިކަލް މޭލު ދުރުންނެވެ.
ބޯޓުން ސަލާމަތް ކުރި 11 ފަޅުވެރިންގެ ހާލު ވެސް ރަނގަޅު ކަމަށް އިރާނުން ބުންޏެވެ. އިރާނުގެ ދެކުނާއި ގަލްފުގައިވާ ގިނަ އަރަބި ގައުމުތަކަށް މި ދުވަސްވަރު މޫސުން ގޯހެވެ.
އަންނަ ހުކުރު ދުވަހާ ހަމައަށް ވާރޭ ވެހޭނެ ކަމަށް ބެލެވޭ އިރު، އިރާނުގެ ދެކުނު ޕްރޮވިންސްތަކުގައި މިހާރު ވެސް ވަނީ ވަރަށް ބޮޑަށް ފެންބޮޑުވެފަ އެވެ.
އިރާނުގެ ކްރައިސިސް މެނޭޖްމަންޓް އޯގަނައިޒޭޝަންގެ ވެރިޔާ އިސްމާއިލް ނައްޖާރް ވިދާޅުވީ ފެންބޮޑުވުމުގެ ސަބަބުން މިހާތަނަށް ނުވަ މީހުން މަރުވެފައިވާ ކަމަށެވެ.
ފެންބޮޑުވުމުގެ އަސަރު ކުރަމުންދާ ފަރާތްތަކަށް އެހީވުމަށް ރައީސް އިބްރާހިމް ރައިސީ ވަނީ ވައުދުވެވަޑައިގެންފަ އެވެ. ރައިސީގެ އެންގެވުމަށް ނައިބު ރައީސް މުހައްމަދު މުހްބަރް އާއި އެނާޖީ މިނިސްޓަރު އަލީ އަކްބަރު މެހްރަބިއަން ވަނީ ފެންބޮޑުވި ހިސާބުތައް ބައްލަވާލައްވާފަ އެވެ.
ފެންބޮޑުވުމުގެ ހާދިސާތަކުގެ އިތުރުން، ވާރޭ ނުވެހުމުގެ ސަބަބުން ފެނުގެ ދަތިކަމުގެ މައްސަލަ ވެސް އިރާނަށް ދިމާވުން ފަހަކަށް އައިސް ވަނީ އިތުރުވެފަ އެވެ.
