ގުދުސް (ޖެނުއަރީ 5) - ޖަލުގައި ބަންދުކޮށްފައި ހުރުމާ ދެކޮޅަށް ފަލަސްތީނުގެ ރައްޔިތަކު ކުރަމުން ދިޔަ ބަނޑުހައި ހޫނުކަމުގެ ހަޅުތާލު ނިންމާލައިފި އެވެ.
އުމުރުން 40 އަހަރުގެ ހިޝާމް އަބޫ ހަވާޝްގެ ވަކީލް ބުނީ ހަޅުތާލު ނިންމާލީ އޭނާ މިނިވަން ކުރަން އިޒްރޭލުން އެއްބަސްވުމުން ކަމަށެވެ.
އިސްލާމިކް ޖިހާދު ގްރޫޕުގެ މެމްބަރެއް ކަމަށް ބުނެ، އެއްވެސް ދައުވާއެއް ކުރުމެއް ނެތި އިޒްރޭލުން ހިޝާމް ބަންދު ކުރުމުން ބަނޑުހައި ހޫނުކަމުގެ ހަޅުތާލު ފެށީ އޯގަސްޓު މަހު އެވެ.
ފަސް ކުދިންގެ ބައްޕައެއް ކަމުގައި ހިޝާމް އަކީ އިޒްރޭލުން ވެރިވެގަނެގެން އުޅޭ ފަލަސްތީނުގެ ހުޅަނގު އައްސޭރީގެ ދެކުނުގައިވާ ދުރާ އަވަށުގެ މީހެކެވެ.
އޭނާ ބަންދުކުރީ "އެޑްމިނިސްޓްރޭޓިވް ޑިޓެންޝަން"ގެ ދަށުންނެވެ. އެއީ ތުހުމަތު ކުރެވޭ މީހުންނަށް ދައުވާ ކުރުމެއް ނެތި އަދި ހެއްކެއް ވެސް ނެތި މުއްދަތެއް ނެތް ގޮތުގައި ބަންދު ކުރަން އިޒްރޭލުން ގެންގުޅޭ އުސޫލެކެވެ. އެ އުސޫލުގެ ދަށުން ޖެހެނީ ކޮންމެ ހަ މަހަކުން ބަންދު މުއްދަތު އިތުރު ކުރާށެވެ.
އިޒްރޭލުން ހިޝާމް އަށް ހުށަހެޅި އެއްބަސްވުމުގައި ބުނީ ބަނޑުހައި ހޫނުކަމުގެ ހަޅުތާލު ނިންމާލައިފި ނަމަ ފެބްރުއަރީ 26 ވަނަ ދުވަހުގެ ފަހުން އޭނާގެ ބަންދު މުއްދަތު އިތުރު ނުކުރާނެ ކަމަށެވެ.
އޭނާގެ ވަކީލު ޖަވާދު ބޫލުސް ބުނީ އެ އެއްބަސްވުން ބަލައިގެންފައިވާ ކަމަށެވެ.
ފާއިތުވި ހަފުތާ ބަންދުގައި ހިޝާމްގެ ހާލު ބަލަން ޒިޔާރަތް ކުރި ރެޑް ކްރޮސް ޓީމުން ބުނީ އޭނާ އޮތީ "ސީރިއަސް ހާލަތުގައި" ކަމަށެވެ. އޭރު އޭނާ އެއްވެސް އެއްޗެއް ނުކައި ހުންނަތާ 140 ދުވަސް ވެއްޖެ އެވެ.
އިޒްރޭލުން ބުނީ ހިޝާމް ބަންދުކޮށްފައި ހުރި ހަ މަހުގެ މުއްދަތު ހަމަވާނީ ފެބްރުއަރީ 26 ގައި ކަމަށާއި ބަންދު މުއްދަތަށް ލުޔެއް ދޭން އެއްބަސްނުވާ ކަމަށެވެ. ނަމަވެސް މުއްދަތު ހަމަވުމުން އޭނާ އިތުރަށް ބަންދުގައި ނުބަހައްޓާނެ ކަމަށް ބުންޏެވެ.
ޖަލުގައި ހުއްޓާ ހިޝާމް މަރުވެއްޖެ ނަމަ ބަދަލުހިފާނެ ކަމަށް ބުނެ ފަލަސްތީނުގެ ފަތަހް ޖަމިއްޔާ އާއި ހަމާސް އިން ވެސް އިޒްރޭލަށް އިންޒާރު ދީފައި ވެ އެވެ.
