ރާމަތު ގަން، އިޒްރޭލް (ޖެނުއަރީ 4) - ކޮވިޑް ވެކްސިންގެ ހަތަރު ވަނަ ޑޯޒް ޖެހުން "ރައްކާތެރި" ކަމަށާއި އޭގެ ސަބަބުން އެންޓިބޮޑީ "ފަސް ގުނަ" އިތުރުވާ ކަމަށް އިޒްރޭލުގެ ބޮޑު ވަޒީރު ނަފްތާލީ ބެނެޓް ވިދާޅުވެއްޖެ އެވެ.
ތެލް އަވީވް ކައިރީގައި ހުންނަ ޝެބާ ހޮސްޕިޓަލަށް ވަޑައިގެން ބެނެޓް ވިދާޅުވީ ހަތަރު ވަނަ ޑޯޒް" މަސައްކަތް ކުރާ" ކަމަށެވެ. އެ ހޮސްޕިޓަލުގައި މީގެ ހަފުތާއެއް ކުރިން 154 މުވައްޒަފުންނަށް ވަނީ ވެކްސިންގެ ހަތަރު ވަނަ ޑޯޒް ދީފަ އެވެ.
"ހަތަރު ވަނަ ޑޯޒް ދިންތާ ހަފުތާއެއް ފަހުން، ވަރަށް ބޮޑު ޔަގީންކަމާ އެކު އެނގިގެން ދަނީ އިތުރު ޑޯޒެއް ޖެހުން ރައްކާތެރިކަން،" ބެނެޓް ވިދާޅުވި އެވެ.
"ހަތަރު ވަނަ ޑޯޒް ޖަހާތާ ހަފުތާއެއް ފަހުން، ވެކްސިން ޖެހި މީހާގެ ހަށިގަނޑުގައި އެންޓިބޮޑީ ފަސް ގުނަ އެބަ އިތުރުވޭ،" ބެނެޓް ފާހަގަކުރެއްވި އެވެ.
"މީގެ މާނައަކީ ބަލިވުމާ ދެކޮޅަށް ބޮޑު ރައްކާތެރިކަމެއް ލިބުން. އަދި އަލާމާތްތައް މަދުވެ ހާލު ގޯސްވެ ހޮސްޕިޓަލުގައި ފަރުވާ ދޭން ޖެހުން މަދުވުން."
ޝެބާ ހޮސްޕިޓަލުގެ ތަރުޖަމާނު ސްޓީވް ވޯލްޒް ވިދާޅުވީ އެ ހޮސްޕިޓަލުގައި ހަތަރު ވަނަ ޑޯޒް ޖެހުމުން ކުރާ އަސަރު ދެނެގަންނަން ބޭނުން ކުރީ ފައިޒާ ވެކްސިން ކަމަށެވެ. މޮޑާނާ ވެކްސިން ބޭނުންކޮށްގެން 150 ވޮލަންޓިއަރުންނާ އެކު އިތުރު ދިރާސާއެއް މި ހަފުތާގައި ފަށާނެ އެވެ.
އިޒްރޭލުން މިދިޔަ ހުކުރު ދުވަހު ވަނީ ދިފާއީ ނިޒާމު ބަލިކަށި މީހުންނަށް ހަތަރު ވަނަ ޑޯޒް ދޭން ފަށާފަ އެވެ. ހޯމަ ދުވަހުން ފެށިގެން ސިއްހީ މަސައްކަތްތެރިންނާއި އުމުރުން 60 އަހަރުން މަތީގެ މީހުންނަށް ވެސް އަންނަނީ ހަތަރު ވަނަ ޑޯޒް ދެމުންނެވެ.
އަންގާރަ ދުވަހު އިޒްރޭލުން ކޮވިޑްގެ 10،000 ކޭސް ފެނުނެވެ. އޭގެ ހަފުތާއެއް ކުރިން އެވްރެޖުކޮށް ފެންނަމުން ދިޔައީ ދުވާލަކު 4000 ކޭސް އެވެ.
އިޒްރޭލުގެ 9.4 މިލިއަން މީހުންގެ ތެރެއިން ހަތަރު މިލިއަނަށް ވުރެ ގިނަ މީހުން ވަނީ ވެކްސިންގެ ތިން ޑޯޒް ޖަހާފަ އެވެ.
އެ ގައުމުން މިހާތަނަށް ކޮވިޑް 1.4 މިލިއަން ކޭސް ރިޕޯޓުކޮށްފައި ވާއިރު، 8،247 މީހުން މަރުވެފައި ވެ އެވެ.
