ކޭޕް ޓައުން، ދެކުނު އެފްރިކާ (ޖެނުއަރީ 4) - ދެކުނު އެފްރިކާގެ ޕާލިމެންޓު ހުންނަ އިމާރާތުގައި ރޯވި އަލިފާންގަނޑު ކޮންޓްރޯލް ކުރެވިފައިވާ ކަމަށް އިއުލާނު ކުރި ފަހުން، ވައި ގަދަވުމާ އެކު އަލުން އަލިފާންގަނޑު ފެތުރެން ފަށައިފި އެވެ.
އާދީއްތަ ދުވަހުގެ ހެނދުނު ފެތުރެން ފެށި އަލިފާންގަނޑު ގަސްތުގައި ރޯކުރިކަމުގެ ތުހުމަތުގައި އުމުރުން 49 އަހަރުގެ ފިރިހެނަކު ވަނީ ހައްޔަރުކޮށްފަ އެވެ. ހުޅުގަނޑުގެ ސަބަބުން މުޅި އިމާރާތަށް ބޮޑެތި ގެއްލުންތައް ލިބި، ފުރާޅު ވެސް ވަނީ ވެއްޓިފަ އެވެ.
އާދީއްތަ ދުވަހުގެ ދަންވަރު ކުރި މަސައްކަތުން އަލިފާންގަނޑު ކޮންޓްރޯލް ކުރެވުނު ކަމަށް ބެލެވުމުން، ގިނަ ބަޔަކު އުފާ ފާޅުކުރި އެވެ. ނަމަވެސް އަނދާފައިވާ އިމާރާތުގެ ތެރޭގައި 100 ޑިގްރީ ސެލްސިއަސްގެ ހޫނުމިން ހުރުމާ އެކު އަލުން ހުޅުހިފުމުގެ ނުރައްކާ އޮތެވެ.
ހޯމަ ދުވަހުގެ ހަވީރު ވައި ގަދަވުމާ އެކު އަލުން އަލިފާން ރޯވެފައި ވާއިރު، ރޭ ދަންވަރު ވެސް ކުރިއަށް ދިޔައީ އަލިފާން ނިއްވުމުގެ މަސައްކަތެވެ. އެގޮތުން 60 އަށް ވުރެ ގިނަ އަލިފާން ނިއްވާ މީހުން ރޭ ދަންވަރު އެ ތަނުގައި މަސައްކަތް ކުރި އެވެ.
އެ ހާދިސާގައި މިހާތަނަށް އެއްވެސް މީހަކަށް އަނިޔާއެއް ނުވެ އެވެ. ނަމަވެސް ޕާލިމެންޓު އިމާރާތް އަނދާ ހުލިވަމުން ދާތީ ގައުމު އޮތީ ޝޮކެއްގަ އެވެ. އެ އިމާރާތަކީ 1884 ވަނަ އަހަރު ބިނާކުރި އިމާރާތެކެވެ. އެ ތަނުގެ ތެރޭގައި ގައުމީ ގިނަ ހަޒާނާތަކެއް ހުރެ އެވެ.
