ގާހިރާ، މިސްރު (ޖެނުއަރީ 4) - މިސްރުގައި ބަންދުކޮށްފައި ހުރި އެކްޓިވިސްޓު ރާމީ ޝާތު ދެ އަހަރު ފަހުން މިނިވަންކޮށްފި އެވެ.
ރާމީ ޝާތު އަކީ މިސްރާއި ފަލަސްތީނުގެ ރައްޔިތެކެވެ. އޭނާ އަކީ ފަލަސްތީނުގެ ސިޔާސީ ޝަހުސިއްޔަތެއް ކަމަށްވާ ނާބިލް ޝާތުގެ ދަރިކަލުންނެވެ.
މިސްރުގެ އޮފިޝަލަކު ބުނީ އޭނާ މިނިވަންކޮށްފައިވާ ކަމަށެވެ. ނަމަވެސް އެކަމާ ގުޅޭ ތަފްސީލެއް ނުދެ އެވެ.
ރާމީ ޝާތުގެ އަންހެނުން، ފްރާންސްގެ ސެލިން ލެބްރުން އޭއެފްޕީ އަށް ބުނީ މިނިވަން ކުރަން ނިންމިކަމުގެ ހަބަރު ލިބިފައިވާ ކަމަށާއި ނަމަވެސް ޖަލުން ނުކުތްކަން އަދި ނޭނގޭ ކަމަށެވެ.
ރާމީ ޝާތު މިސްރުގައި ހައްޔަރު ކުރިތާ ކުޑަ ދުވަސްކޮޅެއް ފަހުން ލެބްރުން މިސްރުން ޑީޕޯޓުކުރި އެވެ.
މިސްރުގެ ޕާލިމެންޓު މެމްބަރު މުހައްމަދު އަންވަރް ސާދަތު ހޯމަ ދުވަހު ވިދާޅުވީ ރާމީ ޝާތު މިނިވަންކޮށް ޑީޕޯޓު ކުރަން ވަރަށް އަވަހަށް އިއުލާނު ކުރާނެ ކަމަށެވެ.
އުމުރުން 50 އަހަރުގެ ރާމީ ޝާތު އަކީ 2011 ވަނަ އަހަރު މިސްރުގައި ހިންގި އިންގިލާބުގައި އިސްކޮށް އުޅުނު އެކްޓިވިސްޓެކެވެ.
އޭގެ އިތުރުން އިޒްރޭލާ ދެކޮޅަށް މަސައްކަތް ކުރާ "ބޮއިކޮޓް، ޑައިވެސްޓްމަންޓް އަދި ސޭންކްޝަން" ހަރަކާތުގެ މިސްރު ގޮފީގެ ކޯޑިނޭޓަރަކީ ވެސް ރާމީ ޝާތު އެވެ.
ޖުލައި 2019 ވަނަ އަހަރު އޭނާ ހައްޔަރު ކުރުމަށް ފަހު ތުހުމަތު ކުރީ ޓެރަރިސްޓު ޖަމާއަތަކަށް އެހީވި ކަމަށެވެ. އޭޕްރިލް 2020 ވަނަ އަހަރު މިސްރުގެ ޓެރަރިސްޓުންގެ ލިސްޓުގައި އޭނާގެ ނަން ހިމެނި އެވެ.
ރާމީ ޝާތު މިނިވަން ކުރަން މިސްރަށް ބާރު އެޅުމަށް މިދިޔަ ޑިސެމްބަރު މަހު އިންސާނީ ހައްގުތަކަށް މަސައްކަތް ކުރާ ފަސް ގްރޫޕަކުން ފްރާންސްގެ ރައީސް އިމޭނުއެލް މެކްރޯން އަށް ގޮވާލެއްވި އެވެ.
މެކްރޯން އާއި މިސްރުގެ ރައީސް އަބްދުލް ފައްތާހް އަލް ސިސީ އެކުގައި 2020 ވަނަ އަހަރު ބޭއްވި ޕްރެސް ކޮންފަރެންސެއްގައި ވެސް މެކްރޯން ވަނީ ރާމީ ޝާތުގެ ވާހަކަ ދައްކަވާފަ އެވެ.
ދެހާސް ސާދަ ވަނަ އަހަރު ސިސީ ވެރިކަމަށް ވަޑައިގެންނެވި ފަހު މިސްރުގައި އިދިކޮޅު ފިކުރަށް އޮތް ޖާގަ ވަނީ ގެއްލިފަ އެވެ. ބެލެވޭ ގޮތުގައި 60،000 އަށް ވުރެ ގިނަ ސިޔާސީ ގައިދީން މިސްރުގައި އެބަ ތިއްބެވެ.
