ބެއިޖިން، ޗައިނާ (ޖެނުއަރީ 4) - ޗައިނާގެ މެދުތެރޭގައި އޮންނަ ސިޓީއަކުން ކޮވިޑަށް ޕޮޒިޓިވް ތިން ކޭސް ފެނުމާ އެކު 1.2 މިލިއަން މީހުން ލޮކްޑައުންކޮށްފި އެވެ.
ޗައިނާ އިން ގެންގުޅެނީ "ޒީރޯ ކޮވިޑް" ސިޔާސަތެކެވެ. ބަލިމަޑުކަމުގެ ތެރޭގައި އެ ގައުމުން އަންނަނީ ބޯޑަރުގައި އަޅާ ފިޔަވަޅުތައް ހަރުކަށިކޮށް، ކޭސްތައް ފެންނަ ކޮމިއުނިޓީތައް ލޮކްޑައުން ކުރަމުންނެވެ.
ނަމަވެސް އަނެއްކާވެސް ޗައިނާގައި ކޭސްތައް ފެންނަ މިންވަރު އިތުރުވުމާއި، ބެއިޖިންގައި ވިންޓާ އޮލިމްޕިކްސް ފަށަން ވަގުތު ކުޑަތަންވަމުން ދާތީ ސަރުކާރަށް ވަނީ ޕްރެޝަރު ބޮޑުވެފަ އެވެ.
ހިނާން ޕްރޮވިންސްގައި ގާތްގަނޑަކަށް 1.17 މިލިއަން މީހުންގެ އާބާދީއެއް އޮންނަ ޔޫޒައު ސިޓީ ލޮކްޑައުން ކުރީ އެ ތަނުން ކޮވިޑްގެ ތިން ކޭސް ފެނުމުންނެވެ.
ހޯމަ ދުވަހު ސަރުކާރުން އެންގީ އެ ސިޓީގެ މީހުން ގެތަކުން ނުނިކުތުމަށާއި ބަލި ފެތުރުން ކޮންޓްރޯލް ކުރަން ހަރުކަށި ފިޔަވަޅު ތަންފީޒު ކުރުމަށެވެ.
އެހެންވެ، ބަހާއި ޓެކްސީ ހިދުމަތް މެދުކަނޑާލައި، ހުރިހާ ޝޮޕިން މޯލްތަކާއި މިޔުޒިއަމްތަކާއި ފަތުރުވެރިންގެ މަންޒިލްތައް ބަންދުކުރަން ވަނީ އެ ސިޓީ އިން ނިންމާފަ އެވެ.
ޗައިނާ އިން އަންގާރަ ދުވަހު ކޮވިޑްގެ ޖުމްލަ 175 ކޭސް ރިޕޯޓު ކުރި އެވެ. އޭގެ ތެރެއިން ފަސް ކޭސް ފެނުނީ ހިނާން ޕްރޮވިންސުންނެވެ.
ޗައިނާގައި ފެންނަމުންދާ ކޭސްތަކުގެ އަދަދަކީ އެހެން ގައުމުތަކާ އަޅާ ބަލާއިރު ވަރަށް ކުޑަ އަދަދެއް ނަމަވެސް، މިއީ މާޗް 2020 ވަނަ އަހަރަށް ފަހު އަދަދުތައް މިހާ މަތިވި ފުރަތަމަ ފަހަރެވެ.
އަންގާރަ ދުވަހުގެ ކޭސްތަކުގެ ތެރޭގައި ޝާންޒީ ޕްރޮވިންސްގައި އޮންނަ ޒިއާން ސިޓީ އިން ފެނުނު 95 ކޭސް ހިމެނެ އެވެ. ގާތްގަނޑަކަށް 13 މިލިއަން މީހުން ދިރިއުޅޭ އެ ސިޓީ ލޮކްޑައުންގައި އޮންނަތާ މިހާރު ދެ ހަފުތާ ވަނީ އެވެ.
ޑިސެމްބަރު ނުވަ ވަނަ ދުވަހުން ފެށިގެން ޒިއާން ސިޓީ އިން ޖުމްލަ 1،600 އަށް ވުރެ ގިނަ ފެނިފައި ވެ އެވެ. ނަމަވެސް މިހާރު އަދަދުތައް ވަނީ ތިރިވާން ފަށާފަ އެވެ.
