ހދ. ހަނިމާދޫ ހައުސިން ޕްރޮޖެކްޓުގެ މަސައްކަތް ކުރުމަށް ބަޔަކަށް ހަވާލުކޮށްފައި އޮއްވައި، އެ މަސައްކަތް ކުރުމަށް އެސްޖޭ ކޮންސްޓްރަކްޝަންގެ ފަރާތުން ހުށަހަޅާފައިވާ ބިޑު އިވެލުއޭޓްކޮށް 20 ދުވަހުގެ ތެރޭގައި އަލުން ބިޑު އެވޯޑް ކުރުމަށް ސިވިލް ކޯޓުން މިއަދު ހުކުމްކޮށްފި އެވެ.
ހަނިމާދޫގައި އަޅަން ފަށާފައިވާ 48 ހައުސިން ޔުނިޓުގެ ނިންމުމަށް އަދި އަލަށް އިމާރާތްކުރާ 52 ހައުސިން ޔުނިޓުގެ ޑިޒައިންގެ މަސައްކަތް ކުރުމަށް ހައުސިން މިނިސްޓްރީގެ ފަރާތުން ޖުލައި 18، 2021 ގައި ހަވާލުކޮށްފައި ވަނީ ދޮންބޭޒް ޕްރައިވެޓް ލިމިޓެޑާ އެވެ.
ނަމަވެސް އެ މަސައްކަތް ހަވާލު ކުރިއިރު އެސްޖޭ އާއި އެ ކުންފުނީގެ ސިސްޓާ ކޮމްޕެނީ އެސްޖޭ ޓްރޭޑާސް ހުށަހެޅި ޖޮއިންޓު ބިޑު އިވެލުއޭޓްކޮށްފައެއް ނުވެ އެވެ. އެ ބިޑު އިވެލުއޭޓް ނުކުރީ އެ ކުންފުނީގެ ފައިނޭންޝަލް ރިސޯސާސް ނުވަތަ މާލީ ފުދުންތެރިކަމާއި އެމްޕްލޯޔާސް ރިކުއާމަންޓް ހަމަނުވާތީ ކަމަށް ބުނެ އެވެ.
ނަމަވެސް މިއަދު ސިވިލް ކޯޓުގެ ގާޒީ އަބްދުއްނާސިރު ޝަފީގު ކުރެއްވި ހުކުމުގައި ވިދާޅުވެފައި ވަނީ އެސްޖޭގެ ބިޑު އިވެލުއޭޓް ނުކުރުމަށް ނެޝަނަލް ޓެންޑާ ބޯޑުން ނިންމާފައި ވަނީ ގާނޫނާ ހިލާފަށް ކަމަށެވެ.
"ދައުވާ ކުރާ ފަރާތްތަކުގެ ބިޑު ރިއިވެލުއޭޓްކޮށް މިހާރު އިވެލުއޭޓްކޮށް ނިންމާފައިވާ ބިޑުތަކާއި ދައުވާ ކުރާ ފަރާތުގެ ބިޑުގެ ތެރެއިން އެންމެ މަތިން ޕޮއިންޓު ލިބޭ ފަރާތްތަކަށް ބޮޑު އެވޯޑް ކުރުމަށް މިނިސްޓްރީ އޮފް ފައިނޭންސް އާއި ކަމާ ބެހޭ ފަރާތްތަކުގެ މައްޗަށް އަންގައި، މިގޮތުގެ މަތިން ހުކުމްކޮށްފިން،" ގާޒީ ވިދާޅުވެފައިވެ އެވެ.
ހަނިމާދޫ ހައުސިން ޔުނިޓުތައް ނިންމުމަށް ހަވާލު ކުރި ދޮންބޭޒް ޕްރައިވެޓް ލިމިޓެޑުގެ ފަރާތުން މަސައްކަތް ބެލުމަށް އެ ރަށަށް ދިޔަ އެވެ. ނަމަވެސް މައްސަލަ ކޯޓަށް ވެއްދުމުން މަސައްކަތް ފަށާފައެއް ނުވެ އެވެ.
