މެޑްރިޑް (ޖެނުއަރީ 2) - އެތުލެޓިކޯ މެޑްރިޑަށް ކުޅެމުންދާ އިންގްލެންޑްގެ ޑިފެންޑަރު ކިއެރަން ޓްރިޕިއާ އަށް ނިއުކާސަލް ޔުނައިޓަޑުން ބިޑްކޮށްފި އެވެ.
ޓްރިޕިއާގެ ޓްރާންސްފާގެ މަޝްވަރާތައް ދެ ކްލަބުގެ މެދުގައި ކުރިއަށް އެބަދެ އެވެ. ޓްރާންސްފާ އަށް ދެ ކްލަބު އެއްބަސްވެއްޖެނަމަ، ޓްރިޕިއާ ވެގެންދާނީ ޖެނުއަރީގެ ޓްރާންސްފާވައި ނިއުކާސަލްއާ ގުޅޭ ފުރަތަމަ ކުޅުންތެރިޔާއަށެވެ.
ކުރިން ޓޮޓެންހަމް ހޮޓްސްޕާ އަށް ކުޅުނު ޓްރިޕިއާ ،31، އެތުލެޓިކޯއާ 2019 ވަނަ އަހަރު ގުޅުނީ 20 މިލިއަން ޕައުންޑްގެ ޓްރާންސްފާ ފީއެއްގަ އެވެ. ޓްރިޕިއާ ވަނީ މިހާތަނަށް އެތުލެޓކޯ އަށް 83 މެޗު ކުޅެފަ އެވެ.
ޕްރިމިއާ ލީގަށް އެނބުރި ދާން ބޭނުންވާކަމަށް ބުނެފައިވާ ޓްރިޕިއާ ގެންދަން މިދިޔަ އަހަރު އާސެނަލް އާއި މެންޗެސްޓާ ޔުނައިޓަޑުން ވެސް މަސައްކަތްކުރި އެވެ. އެކަމަކު އެތުލެޓިކޯ އިން ކިޔި 51 މިލިއަން ޕައުންޑްގެ ޓްރާންސްފާ ފީއަކަށް އެއްވެސް ކްލަަބަކުން އެއްބަހެއްނުވި އެވެ.
ނިއުކާސަލް އޮތީ ޕްރިމިއާ ލީގުގެ 19 ވަނައިގަ އެވެ. ރެލިގޭޝަނުން ސަލާމަތްވުމަށް، ޖެނުއަރީގެ ޓްރާންސްފާގައި ނިއުކާސަލް އިން ސްކޮޑް ވަރުގަދަކުރާނެކަމަށް އޮތީ ބެލެވިފަ އެވެ. -- އޭއެފްޕީ
