ދުނިޔޭގައި ކޮވިޑްގެ ހާލަތު ގޯސްވަމުންދާ މި ދަނޑިވަޅުގައި ހޮނިހިރު ދުވަހު އެކަނިވެސް އެކި ގައުމުތަކުން 4،400 އަށް ވުރެ ގިނަ ފްލައިޓް ކެންސަލްކޮށްފި އެވެ.
އޭގެ ތެރެއިން 2،500 އަށް ވުރެ ގިނަ ފްލައިޓް ކެންސަލްވީ އެމެރިކާގައި ކަމަށް އެއާ ޓްރެފިކް ސައިޓް ފްލައިޓްއެވެއާ އިން ބުނެ އެވެ.
އެއް ފަހަރާ ގިނަ ފްލައިޓްތަކެއް ކެންސަލް ކުރަން ޖެހުނީ ކޮވިޑްގެ ސަބަބުން އެއާލައިންތަކުގެ މުވައްޒަފުން ކަރަންޓީނު ކުރަން ޖެހުމުންނެވެ.
އޭގެ އިތުރުން އެމެރިކާގެ މެދުތެރޭގެ ހިސާބުތަކަށް ބޯކޮށް ސްނޯ ފޭބުމުގެ ސަބަބުން ވެސް ވަނީ ފްލައިޓްތައް ކެންސަލް ކުރަން ޖެހިފަ އެވެ.
އެމެރިކާގައި ކެންސަލް ކުރި ފްލައިޓްތަކުގެ ތެރެއިން 1،000 އަށް ވުރެ ގިނަ ފްލައިޓް ކެންސަލް ކުރީ ޗިކާގޯގެ އޮހެއާ އަދި މިޑްވޭ އެއާޕޯޓުންނެވެ.
މި ހަފްތާގެ ކުރިއަށް އޮތް ދުވަސްތަކުގައި އިތުރަށް މޫސުން ގޯސްވެ، ސްނޯ ފައިބާނެ ކަމަށް ބެލެވޭތީ އަދިވެސް ގިނަ ފްލައިޓްތަކެއް ކެންސަލް ވާނެ ކަމަށް ބެލެވެ އެވެ.
ޑިސެމްބަރު 24 ވަނަ ދުވަހުން ފެށިގެން އެމެރިކާގައި 12،000 އަށް ވުރެ ގިނަ ފްލައިޓް މިހާތަނަށް ވަނީ ކެންސަލްކޮށްފަ އެވެ.
އެއާލައިންތަކުން މިހާރު މަސައްކަތް ކުރަނީ މުވައްޒަފުންގެ މުސާރަ ބޮޑުކޮށްދީގެން ގިނަ ވަގުތު މަސައްކަތުގައި ބޭތިއްބުމަށެވެ. ނަމަވެސް ކޮވިޑްގެ ސަބަބުން ޔޫނިއަންތަކުން ކަންބޮޑުވުން ފާޅުކޮށްފައި ވެ އެވެ.
އެމެރިކާގައި މިހާރު ކޮވިޑް ކޭސްތައް އިތުރުވެގެން އުޅެނީ ހަލުވިކަމާ އެކު އަލަށް ފެތުރެމުންދާ އޮމިކްރޯން ވޭރިއެންޓްގެ ސަބަބުންނެވެ.
ވެކްސިން ރޭޓްތައް މަތިކޮށް ހުރި ނަމަވެސް ނިއު ޔޯކް ސިޓީގައި މި ވަގުތު ދަނީ ރިކޯޑް އަދަދަކަށް ކޭސްތައް ފެންނަމުންނެވެ.
