ލަންޑަަން (ޖެނުއަރީ 1) - ޗެލްސީގެ އެންމެ އަގުބޮޑު ޓްރާންސްފާގެ ގޮތުގައި މި ސީޒަނުގައި އެ ޓީމަށް ގެނައި ފޯވާޑް ރޮމެލޫ ލުކާކޫ އެ ޓީމުގައި ހުރީ އުފަލުންނެއް ނޫން ކަމަށް ބުނެ، ދިން އިންޓަވިއުއާ މެދު ޗެލްސީގެ ކޯޗު ތޯމަސް ޓުޗެލް ވަރަށް ބޮޑަށް ހިތްހަމަނުޖެހުންފާޅުކޮށްފި އެވެ.
ލުކާކޫ، 28، ވެސް ބޭނުންވާތީ އިންޓަ އިން އޭނާ ޗެލްސީ އަށް ވިއްކާލީ 135 މިލިއަން ޑޮލަރަށެވެ. މިއީ އެއް ކުޅުންތެރިއަކު ހޯދަން ޗެލްސީން އެ ކްލަބްގެ ތާރީހުގައި ވެސް ދިން އެންމެ ބޮޑު ޓްރާންސްފާ ފީ އެވެ. އެކަމަކު، ޗެލްސީ އަށް ސޮއިކުރިތާ ހަތަރު މަސް ވެސް ނުވަނިސް ލުކާކޫ މި ވަނީ ސްކައި ސްޕޯޓްސް އަށް ދިން އިންޓަވިއުއެއްގައި އެ ކްލަބް ދޫކޮށްލަން ބޭނުންވާ ކަމަށާއި އަލުން ކުރިން ކުޅެމުން އައި އިންޓަ އަށް ބަދަލުވާްން ބޭނުންވާ ކަމަށް ބުނެފަ އެވެ.
ލުކާކޫގެ އެ އިންޓަވިއުއާ ބެހޭގޮތުން ނޫސްވެރިން ސުވާލުކުރުމުން ޓުޗެލް ބުނީ ތިން ހަފްތާ ކުރިން ލުކާކޫ ދިން އިންޓަވިއުއެއްގެ ވަކިވަކި ތަންކޮޅެއް ނަގައިގެން ހަބަރުތައް ގެނައުން ބަލައިނުގަނެވޭ ކަމަށެވެ. އެކަމަކު، ހަގީގަތަކީ ކޮންމެ ސިފައެއްގައި ކަމުގައި ވިޔަސް އެ އިންޓަވިއުގެ "އަޑު" ތަކަކީ ޗެލްސީ މި ވަގުތު އޮތް ހާލަތަށް ބަލާއިރު، ވަރަށް ބޮޑު މައްސަލައެއް ކަމަށެވެ.
"ހަގީގަތަށް ބުނަންޏާ އަަހަންނަށް އެކަން ކަމަކުނުދޭ. މިއީ މި ވަގުތު އިވެން އަހަރެމެން ބޭނުންވާ އަޑުތަކެއް ނޫން. އަހަރެމެން ހަމަޖެހިލައިގެން ކުރިމަތީގައި އޮތް މެޗުތަކަށް ފޯކަސް ކުރެވޭ މާހައުލެއް ބޭނުންވެފައި އޮއްވައި މި އަޑުތަކުގެ ސަބަބުން އަންނަން ނުޖެހޭ ޕްރެޝަރެއް މި އަންނަނީ،" ޓުޗެލް ބުންޏެވެ.
އިންޓަވިއުގައި ލުކާކޫ ފާހަގަކުރި އަނެއް ކަމަކީ ޗެލްސީގެ ކޯޗު ޓުޗެލް އެ ޓީމު ލައްވައި ކުޅުވާ ސްޓައިލް ކަމުނުދިއުމުގެ ހިތްހަމަނުޖެހުމުގެ ވާހަކަތަކެވެ. ޓުޗެލް ބުނީ އޭނާ ކުޅުވާ ގޮތާ މެދު ލުކާކޫ ހިތްހަމަނުޖެހޭކަން ނޭނގޭ ކަމަށާއި ލުކާކޫގެ ފަރާތުން އެ ވާހަކަތައް އަޑުއިވުމުން ލިބުނީ ހައިރާންކަން ކަމަށެވެ.
"އަހަރެމެން ވާހަކަ ދައްކާނަން. އޭނަ (ލުކާކޫ)އާ އަހަރެމެން ވާހަަކަ ދައްކާނީ ބަންދު ދޮރުތަކެއްގެ ފުރަގަހުގައި ތިބެގެން. އަަހަރެމެން އެކަކު އަނެކަކަށް އެއްވެސް ކަމެއް ނޯޅޭ ވަރަށް މި ވާހަކަތައް ދައްކަން އެބަޖެހޭ،" ޓުޗެލް ބުންޏެވެ.
ކުރިން ޕީއެސްޖީ އާއި ޑޯޓްމަންޑަށް ކޯޗުކޮށްދިން ޓުޗެލް ބުނީ މިހާރު މި އޮތް ޒަމާނަކީ ލުކާކޫ ފަދަ މަޝްހޫރު ކުޅުންތެރިއަކު ދައްކާ ވާހަކައެއް ތަފާތު ގޮތްގޮތަށް އެނބުރޭނެ ދުވަސްވަރެއް ކަމަށެވެ. އެހެންކަމުން އެ ފަދަ ކުޅުންތެރިއެއްގެ ކަންކަން ވީ އެންމެ އަަވަހަކަށް ހައްލުވެފައި އޮތުން މުހިއްމު ކަމަށް ޓުޗެލް ގަބޫލުކުރެ އެެވެ.
ސްކައި ސްޕޯޓްސް އިންޓަވިއުގައި ލުކާކޫ ވަނީ އިންޓަ އިން އޭނާ ބޭނުންވި ކޮންޓްރެކްޓް ހުށަހެޅިނަމަ އެ ޓީމުގައި މަޑުކުރުމުގެ ފުރުސަތު އޮތް ކަމަށް ބުނެފަ އެވެ. އަލުން އިންޓަ އަށް ބަދަލުވާން ބޭނުންވަނީ ކެރިއަރުގެ ފަހުކޮޅުގައި ނޫން ކަމަށާއި ރަނގަޅު ލެވަލެއްގައި ކުޅެން ކަމަށް ލުކާކޫ ވަނީ ބުނެފަ އެވެ.
މެންޗެސްޓާ ސިޓީގެ ހުށަހެޅުމެއް ވެސް ލިބުނުކަން ފާހަގަކޮށް ލުކާކޫ ބުނީ ކޮންމެ ކުޅުންތެރިއަކު ވެސް ބަޔާން މިއުނިކާއި ބާސެލޯނާ އަދި ރެއާލް މެޑްރިޑް ފަދަ ޓީމަކަށް ކުޅުމުގެ ހުވަފެން ދެކޭނެ ކަމަށެވެ. އަދި އަލުން އިންޓަ އަށް ކުޅުމުގެ އިތުރުން އެ ތިން ކްލަބްގެ ތެެރެއިން ޓީމަކަށް ވެސް ކުޅެން ބޭނުންވާ ކަމަށް ލުކާކޫ ބުނެފައިވެ އެވެ.
