ރިޔާދް، ސައުދީ އަރަބިއްޔާ (ޑިސެމްބަރު 30) - މެދުއިރުމަތީގައި އިރާނުން ގެންގުޅޭ "ގޯސް އުޅުން" ބަދަލު ކުރަން ސައުދީ އަރަބިއްޔާގެ ރަސްގެފާނު ސަލްމާން ބިން އަބްދުލް އަޒީޒް ގޮވާލައްވައިފި އެވެ.
ނަމަވެސް ހުކުރު ދުވަހު 86 އަހަރު ފުރިވަޑައިގަންނަވާ ރަސްގެފާން މީގެ ކުރިން އިރާނާ މެދު ވިދާޅުވެފައިވާ ފަދަ ހަރުކަށި ބަސްފުޅުތަކެއް މި ފަހަރު ވިދާޅުނުވާ ކަމަށް އެނެލިސްޓުން ބުނެ އެވެ.
ސައުދީ އަރަބިއްޔާގެ ޝޫރާ ކައުންސިލާ މުހާތަބު ކުރައްވާ ހަތަރު މިނެޓު ރަސްގެފާނު ވާހަކަފުޅު ދެއްކެވި އެވެ. އެމަނިކުފާނު ވާހަކަފުޅު ދެއްކެވީ ލިޔެފައިވާ ސްޕީޗަކަށް ބައްލަވައިގެންނެވެ.
އޭއެފްޕީން ރިޕޯޓު ކުރި ގޮތުގައި ރަސްގެފާނުގެ ވާހަކަފުޅު ޓީވީން ދެއްކީ ޝެޑިއުލް ކުރި ވަގުތަށް ވުރެ ތިން ގަޑިއިރު ލަހުންނެވެ. ސައުދީ ޕްރެސް އެޖެންސީން ވަނީ ރަސްގެފާނުގެ ބަޔާން ނެރިފަ އެވެ.
"އަޅުގަނޑުމެންގެ އުއްމީދަކީ މި ސަރަހައްދުގައި އިރާނުން ގެންގުޅޭ ސިޔާސަތާއި ގޯސް އުޅުން ބަދަލުކުރުން. އުއްމީދަކީ އިރާނުން މަޝްވަރާ އިސްކޮށް، ގުޅިގެން ކުރިއަށް ދާން މަސައްކަތް ކުރުން،" ބަޔާނުގައި ވެ އެވެ.
"މި ސަރަހައްދުގެ ސަލާމަތާއި ރައްކާތެރިކަމަށް އުނިކަން ލިބޭ ފަދަ ސިޔާސަތެއް އިރާނުން ގެންގުޅޭތީ އެކަންކަން އަޅުގަނޑުމެން މި މޮނީޓާ ކުރަނީ ކަންބޮޑުވުމާ އެކު،" ރަސްގެފާނުގެ ބަޔާނުގައި ވެ އެވެ.
ސައުދީ އަރަބިއްޔާ އާއި އިރާނަކީ ޒަމާނުއްސުރެ ވެސް ދެ ހަތުރުންނެވެ. މެދުއިރުމަތީގެ ގިނަ ހަމަނުޖެހުންތަކެއްގައި ދެ ގައުމުން އަބަދުވެސް ތިބެނީ ދެކޮޅަށެވެ.
ޔަމަނުގެ ދާހިލީ ހަނގުރާމައިގައި އިރާނުން ހަނގުރާމަވެރި ހޫތީންނަށް އެއްބާރުލުން ދޭއިރު، ސައުދީ އަރަބިއްޔާ އިން އެހީވަނީ ޔަމަން ސަރުކާރުގެ ފައުޖަށެވެ.
ނަމަވެސް ދެ ގައުމުގެ ގުޅުން ރަނގަޅު ކުރުމުގެ މަގްސަދުގައި މިދިޔަ އޭޕްރިލް މަހުން ފެށިގެން އެކި ފަހަރު މަތިން އޮފިޝަލުން ބައްދަލުކޮށް މަޝްވަރާކޮށްފައި ވެ އެވެ.
ނަމަވެސް ރަސްގެފާން ސަލްމާންގެ ވާހަކަފުޅުގައި އިރާނަށް ތުހުމަތު ކުރެއްވީ "މެދުއިރުމަތީގައި އުޅޭ ހަނގުރާމަވެރި ގްރޫޕުތަކަށް އެހީވެ، ތަފާތުވުންތަކަށް ހިތްވަރުދޭ" ކަމަށެވެ.
"އިރާނުން ޓެރަރިސްޓް ގްރޫޕު ހޫތީންނަށް އެހީވަމުންދާ ގޮތް ވެސް އަޅުގަނޑުމެން މި ދަނީ ބަލަމުން. އޭގެ ސަބަބުން ޔަމަނުގެ ހަނގުރާމަ ދިގުދެމި، އެ ތަނުގެ އިންސާނީ ހާލަތު ގޯސްވެ، ސައުދީ އަރަބިއްޔާގެ ސަލާމަތަށް ވެސް ވަނީ ނުރައްކާވެފައި."
