ގުދުސް (ޑިސެމްބަރު 29) - ފަލަސްތީނުގެ ރައީސް މަހްމޫދު އައްބާސް އިޒްރޭލަށް ވަޑައިގެން އެ ގައުމުގެ ޑިފެންސް މިނިސްޓަރު ބެނީ ގާންޓްޒްއާ ބައްދަލުކުރައްވައިފި އެވެ.
އިޒްރޭލް ޑިފެންސް މިނިސްޓްރީން ބުނީ ދެ ލީޑަރުން މަޝްވަރާ ކުރެއްވީ އިގްތިސާދީ އަދި މަދަނީ ގުޅުން ވަރުގަދަ ކުރަން އެޅޭނެ ފިޔަވަޅުތަކާއި ސަލާމަތީ މައްސަލަތަކާ ގުޅޭ ގޮތުން ކަމަށެވެ.
އިޒްރޭލުގެ މީޑިއާ އިން ރިޕޯޓު ކުރި ގޮތުގައި ބައްދަލުވުން އޮތީ އިޒްރޭލުގެ މެދުތެރޭގައި އޮންނަ ރޯޝް ހާއަޔިން އަވަށުގައި ހުންނަ ގާންޓްޒްގެ ގެކޮޅުގަ އެވެ.
މިދިޔަ އޯގަސްޓް މަހު ގާންޓްޒް ވެސް ވަނީ ފަލަސްތީނުގެ ހުޅަނގު އައްސޭރީގައި ހުންނަ ރާމަﷲ ސިޓީ އަށް ވަޑައިގެން އައްބާސްއާ ބައްދަލުކުރައްވާފަ އެވެ.
ދެ ގައުމުގެ އިސްވެރިންގެ މެދުގައި ދެ ބައްދަލުވުމެއް ބާއްވާފައި މި ވަނީ ވަރަށް ގިނަ އަހަރުތަކަކަށް ފަހު އެވެ. ނަމަވެސް ސުލްހައިގެ މަސައްކަތެއް ނުކުރާ ކަމަށާއި އެފަދަ އެއްބަސްވުމަކަށް ނާންނާނެ ކަމަށް އިޒްރޭލުގެ ބޮޑު ވަޒީރު ނަފްރާލީ ބެނެޓް ވަނީ ވިދާޅުވެފަ އެވެ.
އައްބާސް އާއި ގާންޓްޒް ބައްދަލުކުރެއްވުމާ އެކު އިޒްރޭލުގެ އިދިކޮޅު ލިކޫދް ޕާޓީން ވަނީ ފާޑުކިޔާފަ އެވެ. އެ ޕާޓީން ބުނީ މާ ލަސްތަކެއް ނުވެ ގައުމުގެ ސަލާމަތަށް ނުރައްކާ ނިންމުންތަކާ ހަމައަށް ވެސް ގޮސްދާނެ ކަމަށެވެ.
