ހެރްޒްލިޔާ، އިޒްރޭލް (ޑިސެމްބަރު 29) - ކަސްޓަމަރުން އެދޭ ގޮތަށް "އިންގްރިޑިއެންޓްސް" ތައްޔާރުކޮށް، ކައްކަން ހޭދަވާ ވަގުތު މެނޭޖުކޮށްދޭ ރޮބޮޓެއްގެ އެހީއާ އެކު އިޒްރޭލުގެ ރެސްޓޯރެންޓަކުން ތަރުކާރީ ސްޓޭކް ބާގާ ތައާރަފުކޮށްފި އެވެ.
"ޕާސަނަލައިޒްޑް ހޭމްބާގާއެއް މެޝިނެއްގެ އެހީގައި ހަދައިދޭ މިއީ ފުރަތަމަ ފަހަރު،" ސޭވާއީޓް ކުންފުނީގެ ސީއީއޯ ރަޝެލީ ވިޒްމަން ބުންޏެވެ.
އޭނާ ބުނީ އެޕްލިކޭޝަނެއްގެ އެހީގައި ކަސްޓަމަރުންގެ ބާގާ ސްޓޭކްގައި ހުންނަން ބޭނުންވާ މިންވަރުގެ ޕްރޮޓީން އާއި ފެޓް އަދި އޭގެ ސައިޒާއި ކައްކަންވީ މިންވަރު އިހްތިޔާރު ކުރެވޭނެ ކަމަށެވެ.
ބޮޑު އަވަނެއްގެ ސައިޒުގައިވާ "ރޮބޮޓް ޝެފް" އަށް އެއް ފަހަރާ ތަފާތު ތިން ސްޓޭކް ތައްޔާރު ކުރެވޭނެ އެވެ. ސްޓޭކް ތައްޔާރުކޮށް ނިމުމުން، ބާގާގެ ބައިތައް ރާވައި، ފުރިހަމަ ކުރަން ޖެހެނީ މުވައްޒަފެކެވެ.
ރޮބޮޓް ޝެފްގެ އެހީގައި ތައްޔާރުކޮށްފައިވާ ބާގާއެއް. -- ފޮޓޯ: އޭއެފްޕީ
ވިޒްމަން ބުނީ ރޮބޮޓް ޝެފުގެ އެހީފައި ބީންސް، އަލުވި އަދި ޗިކްޕީޒް ފަދަ ތަރުކާރީ އެކި މިންވަރަށް މިކްސްކޮށް "ބާގާގެ އަސްލު ނުގެއްލޭ ގޮތަށް" ހަށިގަނޑަށް ފައިދާ ހުރި ކެއުމެއް ލިބޭނެ ކަމަށެވެ.
މީޓް ނުވަތަ އެއްގަމު މަހުގެ ބަދަލުގައި ހުސް ތަރުކާރީ ބޭނުންކޮށްގެން ކާތަކެތި ފޯރުކޮށްދޭ ބީބީބީ ރެސްޓޯރެންޓް ހުޅުވީ 2018 ވަނަ އަހަރު ވިޒްމަން އާޢި ހިބްރޫ ޔުނިވާސިޓީގެ ދެ ޕްރޮފެސަރުން ގުޅިގެންނެވެ.
"އަޅުގަނޑުމެން ބޭނުން ވަނީ ހަމައެކަނި ތަރުކާރީ ކާ މީހުންނާއި ވަރަށް މަދުން އެއްގަމު މަސް ކާ މީހުންނަށް ގިނަ އޮޕްޝަންތަކެއް ފޯރުކޮށްދޭން،" އެ ރެސްޓޯރެންޓުގެ އަހުވަ ޓާގަމަން ބުންޏެވެ.
ސޭވާއީޓް އިން ބުނާ ގޮތުގައި އިޒްރޭލުގެ ފަސް ޕަސަންޓު މީހުންނަކީ ހަމައެކަނި ތަރުކާރީ ބާވަތްތައް ކާ މީހުންނެވެ. މާކެޓް އިތުރަށް ފުޅާވަމުންދާ ކަމަށް އެ ކުންފުނިން ދެކެ އެވެ.
