ތެލް އަވީވް، އިޒްރޭލް (ޑިސެމްބަރު 28) - ފައިޒާގެ ކޮވިޑް ވެކްސިންގެ ހަތަރު ވަނަ ޑޯޒެއް ޖެހުމުން ކުރާ އަސަރުތައް ދެނެގަތުމަށް އިޒްރޭލުން ތަހުލީލެއް ފަށައިފި އެވެ.
ޝެބާ މެޑިކަލް ސެންޓަރުން ހިންގާ ތަހުލީލުގައި 150 ވޮލަންޓިއަރުން ބައިވެރިވެ އެވެ. އޭގެ ތެރޭގައި އެ ހޮސްޕިޓަލުގެ މުވައްޒަފުން ވެސް ހިމެނެ އެވެ. ހަތަރު ވަނަ ޑޯޒްގެ ތަހުލީލުގައި ބައިވެރިވާ އެންމެންނަކީ ވެސް މަދުވެގެން ހަތަރު މަސް ކުރިން ވެކްސިންގެ ތިން ވަނަ ޑޯޒް ޖެހި މީހުންނެވެ.
ޝެބާގެ އިންފެކްޝަސް ޑިޒީޒް އެޕިޑެމިއޮލޮޖީގެ ޑިރެކްޓަރު ގިލި ރެގެވް ޔޮޗޭ ވިދާޅުވީ ދިރާސާގައި ބަލާނީ ހަތަރު ވަނަ ޑޯޒަކުން ހަށިގަނޑުގައި އެންޓިބޮޑީ އުފެދޭ މިންވަރާއި، ކުރާ ނުރަނގަޅު އަސަރާއި، އިތުރު ޑޯޒަކުން ބަލީގެ ނުރައްކާ ކުޑަވޭތޯ ކަމަށެވެ.
ދިރާސާގައި ބައިވެރިވާ މީހުން ހަ މަސް ވަންދެން މޮނީޓާ ކުރަމުން ދާނެ އެވެ. އިޒްރޭލުގެ ހެލްތު މިނިސްޓްރީގެ ތަރުޖަމާނު ގަލް ރޮތެމް ގޯލަން ވިދާޅުވީ ހަތަރު ވަނަ ޑޯޒްގެ ތަހުލީލަށް ހުއްދަ ދީފައިވާ ކަމަށެވެ.
އިޒްރޭލުގެ ތަޖުރިބާކާރުންގެ ޕެނަލްއަކުން ވަނީ ސިއްހީ މުވައްޒަފުންނާއި އުމުރުން 60 އަހަރުން މަތީގެ މީހުންނަށް ހަތަރު ވަނަ ޑޯޒް ދޭން ލަފާދީފަ އެވެ. އެކަމާ މެދު ގޮތެއް ނިންމަވަން ހެލްތު މިނިސްޓްރީގެ ޑިރެކްޓަރު ޖެނެރަލް ނަޗްމަން އޭޝް ދަނީ ތައްޔާރުވަމުންނެވެ.
ހަތަރު ވަނަ ޑޯޒަކަށް މި މަހުގެ ކުރީކޮޅު ލަފާދިނުމުން ބޮޑު ވަޒީރު ނަފްތާލީ ބެނެޓް ވިދާޅުވީ އެއީ ރަނގަޅު ލަފަޔެއް ކަމަށާއި ހަލުވިކަމާ އެކު ފެތުރޭ އޮމިކްރޯން ވޭރިއެންޓް ހުއްޓުވޭނީ އެގޮތަށް ކަމަށެވެ.
ބެނެޓް ވިދާޅުވީ ހަތަރު ވަނަ ޑޯޒް އެންމެ އަވަހަށް ޖަހަން ފަށާ ގައުމަކަށް އިޒްރޭލް ހައްދަވާނެ ކަމަށެވެ. ކޮވިޑް ވެކްސިންގެ ތިން ވަނަ ޑޯޒް ވެސް އެންމެ އަވަހަށް ޖަހަން ފެށި އެއް ގައުމަކީ އިޒްރޭލެވެ.
ނަމަވެސް ހަތަރު ވަނަ ޑޯޒް ޖަހަން ފެށޭނީ ހެލްތު މިނިސްޓްރީގެ ހުއްދަ ލިބިގެންނެވެ. ރިޕޯޓުތައް ބުނާ ގޮތުން ހަތަރު ވަނަ ޑޯޒްއާ ގުޅޭ ގޮތުން ގޮތެއް ނިންމުން ފަސްކޮށްފައި ވަނީ އޮމިކްރޯން ވޭރިއެންޓުގެ ނުރައްކާ އޮތް މިންވަރު ޔަގީން ކުރުމަށެވެ.
އިޒްރޭލުގެ 9.3 މިލިއަން މީހުންގެ ތެރެއިން 4.2 މިލިއަން މީހުން ވަނީ ކޮވިޑް ވެކްސިންގެ ތިން ޑޯޒް ޖަހާފަ އެވެ.
