ވެރި ރަށް މާލޭގައި ނައިޓް މާކެޓު ނުވަތަ އުނގުޅޭ ބާޒާރުތަކެއް އިންތިޒާމްކޮށްގެން ކުރިއަށް ގެންދަނީ އެކަން ނުކުރުމަށް ހެލްތު ޕްރޮޓެކްޝަން އެޖެންސީން ލަފާ ދީފައި އޮއްވާ ކަމަށް އެ އޮފީހުން ބުނެފި އެވެ.
ގާތްގަނޑަކަށް ދެ ލައްކައެއްހާ މީހުން ދިރިއުޅޭ މާލޭގައި، ގިނަ މީހުން އެއް ތަނަކަށް އެއްވެ ބާޒާރު ކުރެވޭ ގޮތަށް އިއްޔެ ވެސް ރަސްފަންނު ސަރަހައްދުގައި ވަނީ މަގުމަތީ ބާޒާރެއް ހުޅުވައިފަ އެވެ. އެ ބާޒާރު 10 ދުވަހަށް ކުރިއަށްގެންދާ ގޮތަށް އޮތީ ހަމަޖެހިފަ އެވެ. އޭގެ ކުރިން ދަރުބާރުގޭ ސަރަހައްދުގައި ވެސް އެފަދަ ބާޒާރެއް ވަނީ ހިންގައިފަ އެވެ.
އެކަމާ ގުޅޭ ގޮތުން މި ނޫހުން ސުވާލު ކުރުމުން އެޗްޕީއޭގެ ސީނިއާ އޮފިޝަލަކު ވިދާޅުވީ އެޗްޕީއޭއިން އެންމެފަހުން އާންމު ކުރި އުސޫލުގެ ދަށުން އެފަދަ ބާޒާރެއް ހިންގުން މަނާ ނުވި ނަމަވެސް އެއީ ނުހިންގުމަށް ލަފާ ދީފައިވާ ފަދަ ހަރަކާތެއް ކަމަށެވެ.
މާލޭގައި މިދިޔަ ހަފްތާގައި ބޭއްވި މަގުމަތީ ބާޒާރުގައި މީހުން ބައިބޯވެފައި: ގިނަ މީހުން އެއްތަނަކަށް އެއްނުވުމަށް އެޗްޕީއޭއިން ލަފާ ދޭ -- ފޮޓޯ: މުހައްމަދު ޝާބިން/އަދަދު
"މިހާރު އަޅުގަނޑުމެން ނެރެފަ އިންނަ އުސޫލުން ނަމަ މަނައެއް ނުވާނެ. އެކަމަކު ނުކުރުމަށް ރިކޮމެންޑްކޮށްފަ އޮންނާނީ،" އޭނާ ބުންޏެވެ.
މަގުމަތީ ބާޒާރުތައް ބޭއްވުމަށް މާލޭ ސިޓީ ކައުންސިލުން ހުއްދަ ދޫކުރަން ފެށީ މިދިޔަ ނޮވެމްބަރު މަހު އެކަމާ ގުޅޭ އުސޫލެއް އާންމު ކުރުމަށްފަހު އެވެ. އޭގައިވާ ގޮތުން އަމިއްލަ ވިޔަފާރިތަކާއި ކްލަބް ޖަމިއްޔާތަކަށް ވެސް މަގުމަތީ ބާޒާރު ބޭއްވުމުގެ ހުއްދަ ނެގިދާނެ އެވެ.
މަގުމަތީ ބާޒާރުތައް ބޭއްވުމުގެ ޕްރޮސެސިން ފީއެއްގެ ގޮތުން 20،000ރ. ސިޓީ ކައުންސިލަށް ދައްކަން ޖެހެ އެވެ. އަދި ސެކިއުރިޓީ ޑިޕޮސިޓްގެ ގޮތުގައި 50،000ރ. ބަހައްޓަންޖެހެ އެވެ. އޭގެ އިތުރުން ބާޒާރުގައި ބަހައްޓާ ކޮންމެ ސްޓޯލަކުން ފަސް ޕަސެންޓު ކައުންސިލަށް ނަގާނެ އެވެ.
މިދުވަސްވަރަކީ ކޮވިޑް-19 ގެ އެންމެ ފަހުގެ މިއުޓޭޝަން ކަމަށްވާ އޮމިކްރޯން ހަލުވިކަމާއެކު ފެތުރެމުން އަންނަ ދުވަސްވަރެކެވެ. ރާއްޖެއިން ވެސް މިހާރު ވަނީ އޮމިކްރޯން ފެށިފަ އެވެ.
އޭގެ އިތުރުން، ސްކޫލްތައް ވެސް އަހަރީ ޗުއްޓީއަށް މިދުވަސްވަރު ބަންދުކޮށްފައިވާތީ، ޗުއްޓީ ދިއުމާއި އާންމުން އެއްވާ ތަންތަނުގައި އުޅޭއިރު ސަމާލުވުމަށް އެޗްޕީއޭއިން ވަނީ ގޮވާލައިފަ އެވެ. އެގޮތުން ގައި ދުރުކުރުން ބެހެއްޓުމަށާއި މާސް އެޅުމަށާއި ގިނައިން އަތް ދޮވުމަށް އެޗްޕީއޭއިން އިލްތިމާސް ކުރެ އެެވެ.
