ސެންޓްރަލް ޒޯން ވޮލީބޯޅަ މުބާރާތުގައި މި ފަހަރު ރާއްޖޭގެ ގައުމީ ފިރިހެން ވޮލީ ޓީމު ކުޅުނު ފަހު މެޗުން ސްރީ ލަންކާ އަތުން 3-1 ސެޓުން ބަލިވެއްޖެ އެވެ.
މި ފަހަރުގެ މުބާރާތަށް އުނދަގޫ ހާލަތެއްގައި ކުރިމަތިލި ފިރިހެން ވޮލީ ޓީމު ކުޅުނު ފުރަތަމަ މެޗުން ބަންގްލަދޭޝް އަތުން ސީދާ ތިން ސެޓުން ބަލިވިއިރު، ދެ ވަނަ މެޗުގައި އުޒްބެކިސްތާން އަތުން ބަލިވީ 3-1 ސެޓުންނެވެ. އަދި އިއްޔެ ނޭޕާލުން ވެސް ރާއްޖޭގެ މައްޗަށް ކުރިހޯދީ ސީދާ ތިން ސެޓުންނެވެ. މިއަދު ލަންކާއާ ދެކޮޅަށް ރާއްޖޭން ވަނީ ވާދަވެރި ކުޅުމެއް ދައްކައިފަ އެވެ.
މެޗުގެ ސެޓުތައް ދިޔައީ 25-19، 24-26، 25-23 އަދި 25-19 އިންނެވެ. ރާއްޖޭން މި މެޗުގައި ލަންކާ ކައިރިން ސެޓެއް ގެންދިޔައިރު، މި މަހު ކުރީކޮޅުގައި މާލޭގައި ލަންކާއާ ދެކޮޅަށް ކުޅުނު ތިން މެޗުން ވެސް ރާއްޖެ ބަލިވީ ސެޓެއް ވެސް ނުލިބި އެވެ.
ބަންގްލަދޭޝްގެ މިރްޕޫރު އިންޑޯ ކޯޓުގައި މިއަދު ހަވީރު ކުޅުނު މެޗުގެ ފުރަތަަމަ ސެޓުގައި ލަންކާ އިން ރަނގަޅު ކުޅުމެއް ދައްކައި ލީޑު ދެމެހެއްޓި އެވެ. ލަންކާގެ ހުނަރުވެރި ޒުވާން ކުޅުންތެރިޔާ މަހޭލާ ބަންޑާރާ ވަނީ މި މެޗުގައި ވެސް ރަނގަޅު ހަމަލާތަކެއް ފޮނުވާލައި، ގިނަ ޕޮއިންޓްތަކެއް ހޯދައިފަ އެވެ. ލަންކާ އިން ފުރަތަމަ ސެޓު ގެންދިޔައީ 25-19 އިންނެވެ.
ރާއްޖޭން މިއަދުގެ މެޗުގައި ވަނީ މި ފަހަރު ސްކޮޑުގައި ހިމެނުނު ޒުވާން ކުޅުންތެރިންނަށް ކުޅުމުގެ ފުރުސަތު ދީފަ އެވެ. އެ ގޮތުން ވީއޭއެމްގެ މިހާރު އޮތް ލީޑަޝިޕްގެ އެކްސެލެންސް ޕްރޮގްރާމްގެ ތެެރެއިން ސީނިއާ ސްކޮޑުގައި ހިމެނި، މާއިޝް އަހުމަދު، އަހުމަދު ނާފިއު އަދި ޝާމިލް މުހައްމަދު ވަނީ ލަންކާއާ ދެކޮޅަށް މިއަދު ކުޅުނު މެޗުގެ އެކި ހިސާބުތަކުގައި ކުޅެން އަރައިފަ އެވެ. އެންމެ ގިނަ ވަގުުތު ކުޅެން ލިބުނީ ނާފިއު އަށެވެ. އޭނާ ވަނީ ލިބުނު ފުރުސަތުތަކުގައި މޮޅު ކުޅުމެއް ދައްކައިފަ އެވެ. ޝާމިލާއި މާއިޝް އަށް ވެސް މި ލިބުނު ތަޖުރިބާގެ ބޭނުން ހިފޭނެ އެވެ.
މިއަދުގެ މެޗުގެ ދެ ވަނަ ސެޓުގައި ރާއްޖޭން ކުޅުން ޖުމްލަކޮށް ފެނުނީ ވަރަށް ވަރުގަދަކޮށެވެ. އެ ގޮތުން ޓީމުގެ އެޓޭކިންގެ މުހިންމު ކުޅުންތެރިން ކަމަށްވާ ކެޕްޓަން އިސްމާއިލް ސާޖިދު (ކުޑަކާއްޓެ) އާއި އަލީ ހުޒާމް (ހުޒަންޓެ) ވަނީ ރަނގަޅު ހަަމަލާތަކެއް ފޮނުވާލައިފަ އެވެ. މި މެޗުގައި ރާއްޖޭގެ ހަސަން ނިލާމް (ޕާޓޭ)ގެ ފަރާތުން ވެސް ރަނގަޅު ޝޮޓްތަކެއް ފެނުނުއިރު، ޓީމުގެ ސެންޓަ އަށް ކުޅޭ އާދަމް ފައިރޫޒް ވެސް ވަނީ ރަނގަޅު ބްލޮކްތަކެއްކޮށް ޓީމަށް ޕޮއިންޓްތަކެއް ހޯދައިދީފަ އެވެ.
ދެ ވަނަ ސެޓުގެ ފަހު ކޮޅުގައި ރާއްޖެ ޓީމުން ސެޓު ހޯދުމުގައި ކާމިޔާބު ހޯދީ ރަނގަޅު ވަގުތު ލިބުނު ފުރުސަތުތަކުގައި ޕޮއިންޓް ހޯދައިގެންނެެެވެ. ރާއްޖޭން ސެޓު ގެންދިޔައީ 24-26 އިންނެވެ.
ތިން ވަަނަ ސެޓުގައި ވެސް ރާއްޖޭން ވަނީ ލަންކާ އަށް ފައިޓެއް ދީފަ އެވެ. މި ސެޓުގެ ކުރީކޮޅުގައި ރާއްޖޭން ލީޑުނެގި ނަމަވެސް ފަހުން ލަންކާ ޓީމު ހަމަޔަކަށް އެޅި ކޮންޓްރޯލް ނަގައި ރަނގަޅު އެޓޭކްތަކެއް ފޮނުވަން ފެށި އެވެ. ނަތީޖާ އަކަށްވީ މި ސެޓުގެ ފަހު ކޮޅުގައި ވެސް އެ ކުޅުން ދަމަހައްޓައި، 25-23 އިން ސެޓު ގެންދިއުމެވެ.
އެ ފޯމުގައި ހަތަރު ވަނަ ސެޓުގައި ވެސް ލަންކާ އިން ކުޅުނެވެ. އަދި މި ސެޓު 25-19 އިން ގެންގޮސް ލަންކާ ވަނީ މެޗުން ކާމިޔާބުކޮށް، ފައިނަލުގެ ކުރިން ލީގު ބުރުގެ ފަހު މެޗުން ވެސް މޮޅުވެފަ އެވެ.
