ޓޯކިޔޯ، ޖަޕާން (ޑިސެމްބަރު 27) - ޖަޕާނަށް ބޯކޮށް ސްނޯ ފައިބައި 3،200 އަށް ވުރެ ގިނަ ގެއިން ކަރަންޓުގެ ހިދުމަތް ކެނޑިއްޖެ އެވެ.
ޖަޕާނުގެ މެދުތެރޭގެ ހިސާބުތަކުގައި ސްނޯގެ ސަބަބުން ޓްރެފިކް ބާރު ބޮޑުވެ، ފްލައިޓުތައް ކެންސަލުކޮށްފައި ވާއިރު، ރޭލު ދަތުރުތަކަށް ވެސް ވަނީ ބުރޫ އަރާފަ އެވެ.
ކަންސައި އިލެކްޓްރިކް ޕަވާ ކުންފުނިން ބުނީ މެދުތެރޭގެ ހިސާބުތަކުގެ 3،200 އަށް ވުރެ ގެއިން ކަރަންޓު ކެނޑިފައިވާ ކަމަށެވެ. މިރޭ ވެސް އެ ހިސާބަށް ބޯކޮށް ސްނޯ ފައިބާނެ ކަމަށް ބެލެވެ އެވެ.
ސަރުކާރުގެ ތަރުޖަމާނު ހިރޮކަޒޫ މަޓްސުނޯ ވިދާޅުވީ ފިނީގެ ސަބަބުން އެއްވެސް މީހަކު މަރުވެ، އަނިޔާވިކަމުގެ ރިޕޯޓެއް މިހާތަނަށް ލިބިފައި ނުވާ ކަމަށެވެ.
"ފިނި މޫސުމުގެ ބާރުގަ ޕްރެޝާ ޕެޓާންއަކާ ހެދި ބޯކޮށް ސްނޯ ފައިބަމުން ދަނީ، ވަކިން ހާއްސަކޮށް ޖަޕާން ކަނޑާ ދިމާލުން އުތުރުން ހުޅަނގަށް. ބައެއް ހިސާބުތަކަށް ރިކޯޑް މިންވަރަށް ދަނީ ސްނޯ ފައިބަމުން،" އޭނާ ވިދާޅުވި އެވެ.
"ސްނޯގެ މިންވަރު މާދަމާ އިތުރުވާނެ ކަމަށް ލަފާކުރެވޭ. އެހެންކަމުން އާއްމުން ސަމާލުވެ، ރައްކާތެރިކަމުގެ ފިޔަވަޅުތައް އަޅައިގެން ތިބެން އިލްތިމާސް ކުރަން."
ޝީގާ ސަރަހައްދުގެ ބޮޑު މަގެއް ސްނޯގެ ސަބަބުން ބަންދުވެފައި ވާއިރު، ޓީވީތަކުން ދައްކާފައި ވަނީ ކާރުތައް ދިގު ކިޔުއެއްގައި މަޑުކޮށްގެން އޮތް މަންޒަރެވެ.
އެންއެޗްކޭ އިން ހޯމަ ދުވަހުގެ ހެނދުނު ބުނީ ހިކޯނޭ ސިޓީ އަށް 24 ގަޑިއިރުގެ ތެރޭގައި 68 ސެންޓިމީޓަރުގެ ސްނޯ ފޭބި ކަމަށެވެ. އެއީ އާޢްމުކޮށް ސްނޯ ފައިބާ ވަރަށް ވުރެ 30 ގުނަ ފުނެވެ.
