ބަންގްލަދޭޝްގެ ބޮޑުވަޒީރު ޝެއިހު ހަސީނާ ދިވެހިރާއްޖެއަށް ކުރެއްވި ފަސް ދުވަހުގެ ރަސްމީ ދަތުރުފުޅު ނިންމަވާލެއްވުމަށްފަހު މިއަދު އެނބުރި ގައުމަށް ފުރާވަޑައިގަންނަވާނެ އެވެ.
ބޮޑުވަޒީރު ޝެއިހް ހަސީނާ އާއި އެކަމަނާގެ ވަފުދުގެ ބޭފުޅުން ފުރާވަޑައިގަތުމަށް ހަމަޖެހިފައިވަނީ ބަންގްލަދޭޝްގެ ރަސްމީ އެއާލައިން، ބިމާން އެއާލައިންގެ ބޯޓެއްގައި މިއަދު މެންދުރު 1:00 ޖަހާއިރެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ދައުވަތަށް ރާއްޖެ ވަޑައިގެންނެވި ޝެއިހު ހަސީނާގެ ދަތުރުފުޅުގެ ރަސްމީ ހަރަކާތްތައް އޮތީ މިދިޔަ ހަފްތާގެ ބުދަ ދުވަހާއި ބުރާސްފަތި ދުވަހު އެވެ.
މި ދަތުރުފުޅުގައި ޝެއިހް ހަސީނާ އާއި އެކަމަނާގެ ކެބިނެޓްގެ ވަޒީރުން ވަނީ ރައީސް ސޯލިހްގެ ކެބިނެޓާ ބައްދަލުކުރައްވައިފަ އެވެ. އަދި ދައުލަތުގެ އިސްވެރިންނާއިވެސް ވަކިވަކިން ބައްދަލުކުރެއްވި އެވެ.
މި ދަތުރުފުޅުގައި ދެ ގައުމުގެ ރަހުމަތްތެރިކަމުގެ ރަމްޒެއްގެ ގޮތުން ރާއްޖެއަށް 13 އަސްކަރީ ވެހިކަލް ބަންގްލަދޭޝްގެ ސަރުކާރުން ހަދިޔާ ކުރި އެވެ. އަދި ދެ ގައުމުގެ ގުޅުން އިތުރަށް ވަރުގަދަ ކުރުމަށް ހަތަރު އެމްއޯޔޫއެއްގައި ސޮއި ކުރި އެވެ.
ބަގްލަދޭޝްއާއެކު ރާއްޖެއިން ސޮއިކުރި އެއްބަސްވުންތައް:
- މިނިސްޓްރީ އޮފް ޔޫތު ސްޕޯޓްސް އެންޑް ކޮމިއުނިޓީ އެމްޕަވަމަންޓާއެކު، ކުޅިވަރާ ޒުވާނުންގެ ތަރައްގީއަށް އެކި ދާއިރާތަކުން މަސައްކަތް ކުރުމުގެ އެއްބަސްވުމެއް ގާއިމް ކުރި. އެ އެއްބަސްވުމުގެ ދަށުން ކުޅިވަރުގެ ދާއިރާއިން ބޭނުންވާ ތަމްރީނާ އަދި ޒުވާނުން ބާރުވެރިކުރުމާ، ޒުވާނުންގެ ތަރައްގީއަށް އެކިއެކި ކަންކަންރާވާ ހިންގުން ހިމެނޭ.
- ބަންގްލަދޭޝްއާ ރާއްޖެއާ ދެމެދު ވިޔަފާރީގެ ދާއިރާއިން ޓެކްސްއާ ގުޅޭ އެއްބަސްވުމެއްގައި ވެސް ސޮއި ކުރި. އޭގެ ތެރެއިން ޑަބަލް ޓެކްސޭޝަން ހުއްޓުވުމާއި ޓެކުހަށް މަކަރުހެދުމާއި ވަގު ވިޔަފާރިތައް ހުއްޓުވުމަށް ދެ ގައުމު ގުޅިގެން މަސައްކަތްކުރުމަށް ވަނީ އެއްބަސްވެފަ.
- ރާއްޖޭގެ ސިއްހީ ދާއިރާއަށް ބޭނުންވާ ފަންނީ މީހުން ހޯދުމާއި ތަމްރީން ކުރުމުގައި އެހީތެރިކަން ފޯރުކޮށްދިނުމަށް ވެސް އެގައުމާއެކު އެއްބަސްވުމެއް ގާއިމްކުރި.
ހަސީނާގެ ދަތުރުފުޅުގައި، ރާއްޖޭގައި ގަވައިދާ ހިލާފަށް އުޅޭ ބަންގްލަދޭޝް މީހުންގެ މައްސަލަ ހައްލު ކުރުމަށާއި ދެ ގައުމުގެ ދެމެދުގައި ވިޔަފާރީގެ ގުޅުން ބަދަހި ކުރުމަށް ވެސް މަޝްވަރާ ކުރެއްވި އެވެ. އެގޮތުން ވައިގެ މަގުންނާއި ކަނޑުމަގުން ރާއްޖެއާ ބަންގްލަދޭޝްއާ ގުޅާލުމަށް މަސައްކަތް ކުރައްވަމުން ގެންދަވާ ކަމަށް އެކަމަނާ ވިދާޅުވި އެވެ.
މި ދަތުރުފުޅުގައި އެކަމަނާ ވަނީ މިދިޔަ ބުރާސްފަތި ދުވަހުގެ ހަވީރު ރައްޔިތުންގެ މަޖިލީހުގައި ވެސް ތަގުރީރު ކުރައްވައިފަ އެވެ. އެކަމަނާގެ ވާހަކަފުޅުގައި އާއިލާގެ 18 މެމްބަރުން އަވަހާރަކޮށްލި ހިތްދަތި ހާދިސާ އާއި ބޮޑުވަޒީރު ކަމަށް ނިކުންނަން މަޖުބޫރުވެލެއްވި ގޮތަށް ކިޔައިދެއްވި އެވެ.
ބަންގްލަދޭޝްގެ ބޮޑުވަޒީރު ޝެއިހު ހަސީނާ ރާއްޖެ ވަޑައިގަތުމަށް ރައީސް ސޯލިހު ދައުވަތު ދެއްވީ ބަންގްލަދޭޝްގެ އުފެއްދެވުމުގެ ބާނީ، ޝެއިހް މުޖީބުއްރަހްމާން އުފަންވެވަޑައިގަތްތާ 100 އަހަރު ފުރުން ފާހަގަކުރުމަށް އެ ގައުމުގައި މިދިޔަ މާޗް މަހު ބޭއްވި ހަފްލާގައި ބައިވެރިވެވަޑައިގަތުމަށް އެގައުމަށް ރަީސް ކުރެއްވި ދަތުރުފުޅެއްގެ ތެރެއިންނެވެ.
