ރިޔާދް، ސައުދީ އަރަބިއްޔާ (ޑިސެމްބަރު 27) - ސައުދީ އަރަބިއްޔާ އަށް އަމާޒުކޮށް މިސައިލާއި ޑްރޯން ހަމަލާ ފޮނުވަން ޔަމަނުގެ ހޫތީ ހަނގުރާމަވެރިންނަށް އެހީވަނީ އިރާނާއި ހިޒްބުﷲ އިން ކަމަށް ސައުދީ އަރަބިއްޔާ އިން ތުހުމަތުކޮށްފި އެވެ.
ޔަމަނުގެ ދާހިލީ ހަނގުރާމަ ފެށީ 2014 ވަނަ އަހަރު ގާނޫނީ ސަރުކާރާ ދެކޮޅަށް ހޫތީން ތެދުވުމުންނެވެ. އޭގެ ފަހުން ސައުދީ އަރަބިއްޔާގެ އަސްކަރީ ކޯލިޝަނުން ހޫތީންނާ ދެކޮޅަށް ހަނގުރާމައިގައި ބައިވެރިވީ 2015 ވަނަ އަހަރު ޔަމަނު ސަރުކާރުގެ އެދުމަށެވެ.
އޭރުން ފެށިގެން ވެސް ސައުދީ އަރަބިއްޔާ އިން ތުހުމަތު ކުރާ ގޮތުގައި ހޫތީންނަށް ހަތިޔާރު ފޯރުކޮށްދީ ހަނގުރާމައިގެ އުކުޅުތަކާއި ތަމްރީންތައް ދަސްކޮށްދެނީ އިރާނާއި ހިޒްބުﷲ އިންނެވެ. އިރާނާއި ލުބްނާންގެ ހިޒްބުﷲ ޖަމާއަތުން ވެސް އެ ތުހުމަތުތައް ދޮގުކުރެ އެވެ.
ސައުދީ އަރަބިއްޔާގެ އަސްކަރީ ކޯލިޝަނުގެ ތަރުޖަމާނު ތުރުކީ އަލް މާލިކީ ނިއުސް ކޮންފެރެންސެއްގައި ވިދާޅުވީ ހޫތީން ވަނީ ސަނާ އެއާޕޯޓު "އަސްކަރީ ކުރުމަށް ފަހު" ސައުދީ އަރަބިއްޔާ އަށް އަމާޒުކޮށް ޑޤރޯން އާއި ބެލިސްޓިކް މިސައިލް ފޮނުވާ "މައި މަރުކަޒަށް" އެތަން ހަދާފައި ކަމަށެވެ.
އެ ނިއުސް ކޮންފެރެންސްގައި ވީޑިއޯއެއް އާއްމު ކުރުމަށް ފަހު މާލިކީ ވިދާޅުވީ ސަނާ އެއާޕޯޓުގައި އިރާނާޢި ހިޒްބުﷲ ގެ ތަޖުރިބާކާރުން އުޅޭ މަންޒަރު ފެންނަ ކަމަށެވެ. ހިޒްބުﷲ އިން ދަނީ ޑްރޯންތަކުން ބޮޑެތި ގެއްލުން ވާނެ ގޮތަށް ފަރުމާ ކުރާނެ ގޮތް ހޫތީންނަށް ކިޔައިދެމުން ކަމަށް އޭނާ ބުންޏެވެ.
އޭގެ އިތުރުން ވެސް ވީޑިއޯތަކެއް ދެއްކުމަށް ފަހު މާލިކީ ވިދާޅުވީ ހިޒްބުﷲ ގެ މެމްބަރަކު ޑްރޯންއެއްގައި ގޮވާ ތަކެތި ހަރު ކުރާ މަންޒަރު ފެނިފައިވާ ކަމަށާއި، ހަނގުރާމައިގެ ސަފުތައް ވަރުގަދަ ކުރަން ހިޒްބުﷲ މެމްބަރަކު ހޫތީންނަށް އަންގާ މަންޒަރު ވެސް ފެންނަ ކަމަށެވެ.
އިރާނާއި ހިޒްބުﷲ އާ ދެކޮޅަށް ހެކި ލިބިފައިވާ ކަމަށް ސައުދީ އަރަބިއްޔާ އިން ބުނާ އިރު، މިދިޔަ ހޮނިހިރު ދުވަހު ސައުދީ އަރަބިއްޔާގެ ޖަޒަން ސިޓީ އަށް ހޫތީން ދިން ހަމަލާއެއްގައި ދެ މީހުން މަރުވި އެވެ. އެއީ ތިން އަހަރަށް ފަހު ހޫތީންގެ ހަމަލާއެއްގައި ސައުދީ އަރަބިއްޔާ އިން ބަޔަކު މަރުވި ފަހަރެވެ.
އެއާ އެކު ސައުދީ އަރަބިއްޔާ އިން ހޫތީންނާ ދެކޮޅަށް ދޭ ވައިގެ ހަމަލާތައް ވަނީ ވަރުގަދަކޮށްފަ އެވެ. ސައުދީ އަރަބިއްޔާގެ އަސްކަރީ ކޯލިޝަނުން ބުނީ ވައިގެ ހަމަލާތަކުގައި ހަތިޔާރު ގުދަންތައް ސުންނާފަތިކޮށްލާފައިވާ ކަމަށެވެ.
