ގޯލަން ހައިޓްސް (ޑިސެމްބަރު 26) - ގޯލަން ހައިޓްސްގައި ޔަހޫދީ ވަޒަންވެރިން ދެ ގުނަ އިތުރު ކުރުމަށް 300 މިލިއަން ޑޮލަރުގެ ހޭދަކުރުމުގެ ޕްލޭނެއް އިޒްރޭލުން އިއުލާނުކޮށްފި އެވެ.
ގޯލަން ހައިޓްސް އަކީ ސީރިއާގެ ބިމެކެވެ. މީގެ 40 އަހަރު ކުރިން އިޒްރޭލުން އެތަން ހިފުމަށް ފަހު ވަނީ ޔަހޫދީން ވަޒަންވެރިވުމުގެ މަސައްކަތް ހިންގާފަ އެވެ.
"އަޅުގަނޑުމެންގެ އަމާޒަކީ ގޯލަންގެ އާބާދީ ދެ ގުނަ އިތުރު ކުރުން،" އެ ތަނުގެ ބޯހިޔާވަހިކަމާއި، ދަތުރުފަތުރު، ފަތުރުވެރިކަން އަދި ސިއްހީ ހިދުމަތްތައް ހަރުދަނާ ކުރަން 317 މިލިއަން ޑޮލަރު ހޭދަކުރައްވާނެކަން އިއުލާނު ކުރައްވަމުން ބޮޑު ވަޒީރު ނަފްތާލީ ބެނެޓް ވިދާޅުވި އެވެ.
ގޯލަން ހައިޓްސްގައި މިހާރު 25،000 ޔަހޫދީން ދިރިއުޅެ އެވެ. އޭގެ އިތުރުން ޑްރޫޒް ދަރިކޮޅަށް ނިސްބަތްވާ 23،000 މީހުން ވެސް އުޅެ އެވެ. އެއީ 1967 ގައި ކުރި ހަ ދުވަހުގެ ހަނގުރާމައިގައި އިޒްރޭލުން އެ ތަން ހިފުމުން ވެސް ނުގޮސް ތިބި ބަޔެކެވެ.
އިޒްރޭލުން އެއީ އެ ގައުމުގެ ބަޔެއްގެ ގޮތުގައި ހެދީ ޑިސެމްބަރު 14، 1981 ގަ އެވެ. ނަމަވެސް ބައިނަލްއަގްވާމީ މުޖުތަމައިން އެކަން ބަލައިނުގަނެ އެވެ.
އެކަމަކު ގޯލަންގައި އިޒްރޭލުގެ އިސްތިގުލާލު ހިނގާނެ ކަމަށް 2019 ވަނަ އަހަރު އެމެރިކާގެ އޭރުގެ ރައީސް ޑޮނަލްޑް ޓްރަމްޕްގެ ސަރުކާރުން ބަލައިގަތެވެ.
އިޒްރޭލާއި ސީރިއާގެ ހަނގުރާމަ ނިމުނުކަން މިހާތަނަށް އިއުލާނުކޮށްފައެއް ނުވެ އެވެ. ދެ ގައުމުގެ ސަރަހައްދު މިހާރު ވަކުކުރަނީ ގޯލަން ހައިޓްސްއާ ހިސާބުންނެވެ.
