ކާބުލް، އަފްގާނިސްތާން (ޑިސެމްބަރު 26) - އާއިލާގެ ފިރިހެނަކާ އެކު ނޫނީ އަފްގާނިސްތާނުގެ އަންހެނުން ބޭރަށް ނުކުމެ ދުރު ތަނަކަށް ދިޔުން މަނާކޮށްފި އެވެ.
ތާލިބާނުން ބުނީ އަންހެނުންނަށް އެކަނި ބޭރުގައި އުޅެވޭނީ ހަމަ އެކަނި ކައިރި ތަނަކަށް ދާން ކަމަށެވެ. ދުރު ތަނަކަށް ދާން ނަމަ އާއިލާގެ ފިރިހެނަކު ކައިރީގައި ހުންނަން ވާނެ ކަމަށް ވަނީ އަންގާފަ އެވެ.
ރަނގަޅު ކަންކަން ކުރިއަރުވައި ނުބައި ކަންކަން މަނާކުރާ މިނިސްޓްރީން ނެރުނު އެންގުމުގައި އުޅަނދުތަކަށް ވެސް އަންގާފައި ވަނީ އެކަނި ތިބޭ އަންހެނުން ގޮވައިގެން ދަތުރު ނުކުރުމަށެވެ.
އޭގެ އިތުރުން އުޅަނދުތަކުގައި އުފުލަން ވާނީ ހަމައެކަނި ހިޖާބު އަޅައިގެން ތިބޭ އަންހެނުން ކަމަށް ވެސް އަންގާފައި ވެ އެވެ.
"ސާޅީސް ފަސް މޭލަށް ވުރެ ދުރު ހިސާބުގައިވާ ތަނަކަށް ދާ އަންހެނުން ބޭރުގައި އުޅެން ވާނީ އާއިލާގެ ފިރިހެނަކާ އެކު،" އެ މިނިސްޓްރީގެ ތަރުޖަމާނު ސާދިގް އާކިފް މުޖާހިރް ބުންޏެވެ.
މިނިސްޓްރީގެ އެންގުން ސޯޝަލް މީޑިއާގައި އާއްމުކޮށްފައި ވާއިރު، ޓީވީ ޗެނަލްތަކުން އަންހެނުން ނުދައްކަން ވެސް މީގެ ދުވަސްކޮޅެއް ކުރިން އެންގި އެވެ.
އޭގެ އިތުރުން އަންހެން ނޫސްވެރިން ޓީވީ ކުރިމައްޗަށް އަރަން ވާނީ ހިޖާބު ހެދުމުގައި ކަމަށް އެންގި އެވެ. ތާލިބާނުން ހިޖާބް މާނަކޮށްފައި އޮތީ ކޮން ގޮތަކަށްކަން ސާފު ނުވާ ކަމަށް ރިޕޯޓުތައް ބުނެ އެވެ. އަފްގާނިސްތާނުގެ ގިނަ އަންހެނުންނަކީ ހަށިގަނޑު ނިވާކޮށް، ބުރުގާ އަޅާ މީހުންނެވެ.
މީގެ ކުރިން ވެރިކަން ކުރި ގޮތާ ހިލާފަށް މި ފަހަރު އަންހެނުންނާއި އަންހެން ކުދިންގެ ހައްގުތައް ދޭނެ ކަމަށް ތާލިބާނުން ވައުދުވި ނަމަވެސް، އެ ވައުދު މިހާތަނަށް ފުއްދާފައެއް ނުވެ އެވެ.
ބައެއް ޕްރޮވިންސްތަކުގައި އަންހެން ކުދިންގެ ސެކަންޑަރީ ސްކޫލުތައް ހުޅުވި ނަމަވެސް، އަދިވެސް ގިނަ ކުދިން ތިބީ ތައުލީމުން މަހްރޫމުވެފަ އެވެ.
