ތެހްރާން، އިރާން (ޑިސެމްބަރު 26) - އިރާނުގެ ނިޔުކްލިއާ މަޝްރޫއާ ގުޅޭ ގޮތުން ކުރިއަށްދާ މަޝްވަރާތައް ފެއިލްވެއްޖެ ނަމަ ޔުރޭނިއަމް މުއްސަނދި ކުރުން 60 ޕަސެންޓަށް ވުރެ އިތުރު ކުރުމުގެ ވިސްނުމެއް ނެތް ކަމަށް އެ ގައުމުން ބުނެފި އެވެ.
އެޓޮމިކް އެނާޖީ އޯގަނައިޒޭޝަން އޮފް އިރާންގެ ޑިރެކްޓަރު މުހައްމަދު އެސްލާމީ ރަޝިއާގެ އާރްއައިއޭ ނޮވޮސްޓީ ނިއުސް އެޖެންސީ އަށް ވިދާޅުވީ ޔުރޭނިއަމް މުއްސަނދި ކުރަމުން ދަނީ ގައުމަށް ބޭނުންވާ މިންވަރެވެ.
"ޔުރޭނިއަމް މުއްސަނދި ކުރުމުގެ ޓާގެޓުތައް ގުޅިފައި ވަނީ އަޅުގަނޑުމެންގެ ސިނާއީ އަދި އުފެއްދުންތެރިކަމަށް ބޭނުންވާ މިންވަރާ. އަދި އަޅުގަނޑުމެންގެ ރައްޔިތުންނަށް ބޭނުންވާ މިންވަރާ،" އޭނާ ވިދާޅުވި އެވެ.
މަޝްވަރާތައް ފެއިލްވެއްޖެ ނަމަ ޔުރޭނިއަމް މުއްސަނދި ކުރުން 60 ޕަސެންޓަށް ވުރެ އިތުރު ކުރާނެ ތޯ ސުވާލުކުރުމުން އޭނާ ވިދާޅުވީ ނުކުރާނެ ކަމަށެވެ.
އިރާނާއި ބާރުގަދަ ގައުމުތަކާ ދެމެދު 2015 ވަނަ އަހަރު އެކުލަވާލި ނިޔުކްލިއާ މަޝްރޫއާ ގުޅޭ އެއްބަސްވުން އަލުން އިއާދަކުރުމުގެ މަޝްވަރާގެ އިތުރު ބުރެއް ހޯމަ ދުވަހު އޮންނާނެ އެވެ.
ނިޔުކްލިއާ މަޝްރޫއާ ގުޅޭ އެއްބަސްވުން އަލުން އިއާދަކުރުމަކީ އިރާނާ ވާދަވެރި އިޒްރޭލުން ދެކޮޅު ކަމެކެވެ. މިދިޔަ ނޮވެމްބަރު މަހު އިޒްރޭލުން ބުނީ ޔުރޭނިއަމް މުއްސަނދި ކުރުން 90 ޕަސެންޓަށް އިތުރު ކުރުމުގެ ޓެކްނިކަލް ފިޔަވަޅުތައް އިރާނުން އަޅާފައިވާ ކަމަށެވެ.
އިޒްރޭލާއި ހުޅަނގުގެ ގައުމުތަކުން ތުހުމަތު ކުރަނީ އިރާނުން ނިޔުކްލިއާ ހަތިޔާރު އުފައްދަން އުޅޭ ކަމަށެވެ. ނަމަވެސް އިރާނުން ބުނީ ނިޔުކްލިއާ މަޝްރޫއު ހިންގަނީ ސުލްހަވެރި ބޭނުންތަކަށް ކަމަށެވެ.
އިރާނުގެ ނިޔުކްލިއާ މަޝްރޫއާ ގުޅޭ ބައެއް ހަރަކާތްތައް މަޑު ޖައްސާލުމުން އެ ގައުމާ ދެކޮޅަށް އަޅާފައިވާ ދަތިކުރުމުގެ ބައެއް ފިޔަވަޅުތަކަށް ލުއިދޭން އެއްބަސްވީ 2015 ވަނަ އަހަރު އެވެ.
ނަމަވެސް އެމެރިކާގެ ކުރީގެ ރައީސް ޑޮނަލްޑް ޓްރަމްޕް 2018 ގައި އެއްބަސްވުމަށް އަމަލުކުރުން ހުއްޓާލެއްވުމާއެކު އިރާނުން ވެސް ނިޔުކްލިއާ މަސައްކަތް އަލުން ފެށި އެވެ.
އެމެރިކާގެ މިހާރުގެ ރައީސް ޖޯ ބައިޑެން ބޭނުންވެވަޑައިގަންނަވަނީ އެއްބަސްވުން އަލުން ތަންފީޒު ކުރުމަށެވެ. އެކަމުގެ މަޝްވަރާތައް އޮސްޓްރިއާގައި ކުރިއަށް ދާއިރު، އެމެރިކާ އިން ބައިވެރިވަނީ ނުސީދާކޮށެވެ.
އެމެރިކާ އާއި އިރާނާއެކު 2015 ވަނަ އަހަރު ހެދި ނިޔުކްލިއާ މަޝްރޫއުގެ އެއްބަސްވުމުގައި ސޮއިކުރި އެހެން ގައުމުތަކަކީ ޗައިނާ، ރަޝިއާ، ޖަރުމަނު، ފްރާންސް އަދި އިނގިރޭސި ވިލާތެވެ.
