ދުނިޔޭގެ އެންމެ ބޮޑު އަދި އެންމެ ބާރުގަދަ ޖައްވީ ޓެލެސްކޯޕް، ޖޭމްސް ވެބް ސްޕޭސް ޓެލެސްކޯޕް، އޯބިޓަށް ހިނގައްޖެ އެވެ.
އެ ޓެލެސްކޯޕް ދުނިޔެ އިން ބޭރަށް ދަތުރު ފެށީ ދެކުނު އެމެރިކާގެ އިރުއުތުރު އައްސޭރިފަށުގައި އޮންނަ ފްރެންޗް ގިޔާނާ އިން ހޮނިހިރު ދުވަހު އެވެ. ޓެލެސްކޯޕް ޖައްވަށް ގެންދިޔައީ ޔޫރޮޕިއަން އެރިއަނެ ރޮކެޓެއްގަ އެވެ.
ނުވަ ބިލިއަން ޑޮލަރު ހޭދަކޮށްގެން ހެދި ޓެލެސްކޯޕްގެ މަންޒިލަކީ 1.6 މިލިއަން ކިލޯމީޓަރު ދުރެވެ. ޓެލެސްކޯޕް އެ ހިސާބަށް ފޯރަން މަހެއް ހޭދަވާނެ ކަމަށް ބެލެވެ އެވެ.
މަންޒިލަށް ދިޔުމަށް ފަހު ޓެލެސްކޯޕްގެ މަސައްކަތް ފަށައި، ވަށައިގެންވާ ޖައްވުގެ ދުރު ހިސާބުތައް ސްކޭން ކުރަން އިތުރު ފަސް މަސް ނަގާނެ އެވެ.
ޖޭމްސް ވެބް ސްޕޭސް ޓެލެސްކޯޕް ހިފައިގެން ރޮކެޓު ނައްޓާލަނީ. -- ފޮޓޯ: އޭއެފްޕީ
އެގޮތުން މަސައްކަތް ފެށުމުގެ ގޮތުން އެންމެ ފުރަތަމަ ޓެލެސްކޯޕްގައިވާ ބޮޑު ލޯގަނޑާއި "ސަންޝީލްޑް" ނިއުޅެން ޖެހެ އެވެ. އެ ތަކެތި މިހާރު ހުރީ ރޮކެޓުގެ ކަނެއްގެ ތެރޭގައި ފަތް ޖަހާފަ އެވެ.
ޓެލެސްކޯޕްގެ ޝޯޕީސްގެ ގޮތުގައި ހަދާފައި ވަނީ ރަން ކުލައިގެ 6.5 މީޓަރު ފުޅާ ލޯގަނޑެކެވެ. ޓެލެސްކޯޕް ރައްކާތެރި ކުރަން ފަސް ފަށަލައިގެ ސަންޝީލްޑެއް ވެ އެވެ.
ސަންޝީލްޑަކީ ލޯގަނޑާއި ހޫނު ދެނެގަންނަ އިންފްރެއާޑް ޑިޓެކްޓަރުތަކުގެ ފިނިހޫނުމިން މެނޭޖުކޮށް ސަބްޒީރޯގައި ހިފަހައްޓަން އެހީވެދޭ އެއްޗެވެ. އޭގެ ބޮޑު މިނަކީ ޓެނިސް ކޯޓެއްގެ ސައިޒެވެ.
ރާވާފައިވާ ގޮތަށް ހުރިހާ ކަމެއް ހިނގައްޖެ ނަމަ، ޓެލެސްކޯޕް ޖައްވަށް ގެންދާތާ ތިން ދުވަސް ތެރޭގައި ސަންޝީލްޑް ހުޅުވޭނެ އެވެ. ސަންޝީލްޑް ރަނގަޅަށް ހުޅުވި ހަމަޖެހެން ފަސް ދުވަސް ނަގާނެ އެވެ.
"ޓެލެސްކޯޕާ އެކު ޔުނިވާސް އާއި އޭގައި އަޅުގަނޑުމެންގެ ދައުރާ ބެހޭ އިތުރު މައުލޫމާތު ސާފުވާނެ،" ނާސާގެ އެޑްމިނިސްޓްރޭޓަރު ބިލް ނެލްސަން ވިދާޅުވި އެވެ.
މިހާތަނަށް ހެދި އެންމެ ބޮޑު ޓެލެސްކޯޕަށް ޖޭމްސް ވެބްގެ ނަން ދިނީ 1960 ގެ އަހަރުތަކުގައި ނާސާގެ އެޑްމިނިސްޓްރޭޓަރަކަށް ހުރި މީހާ އަށް ނިސްބަތްކޮށްގެންނެވެ.
ޖޭމްސް ވެބް ސްޕޭސް ޓެލެސްކޯޕް އުފެއްދުމުގެ މަސައްކަތް ކުރަނީ. -- ފޮޓޯ: އޭއެފްޕީ
މިއީ މިހާރު ބޭނުން ކުރަމުންދާ ހަބްލް ސްޕޭސް ޓެލެސްކޯޕް ގެ އުމުރު ހަމަވާން ކައިރިވާތީ ނާސާ އިން ތައްޔާރު ކުރި ބިޔަ މަޝްރޫއުގައި ހިމެނޭ ޓެލެސްކޯޕެވެ.
ޖޭމްސް ވެބް ސްޕޭސް ޓެލެސްކޯ ފަރުމާ ކުރަން ނާސާ އިން މަސައްކަތް ކުރީ ޔޫރޮޕާއި ކެނެޑާގެ ޖައްވީ އެޖެންސީތަކާ ގުޅިގެންނެވެ.
ނަވާރަ ސަތޭކަ ނުވަދިހައިގެ އަހަރުތަކުން ފެށިގެން 29 ގައުމެއްގެ އެތައް ހާސް ބަޔަކު ވަނީ ހަތް ޓަނުގެ އެ ޓެލެސްކޯޕް އުފެއްދުމުގެ މަސައްކަތުގައި އުޅެފަ އެވެ.
އެ މަސައްކަތުގައި ގިނަ ގޮންޖެހުންތަކާ ކުރިމަތިވުމަށް ފަހު، އެންމެ ފަހު ވަގުތު ދިމާވި ޓެކްނިކަލް މައްސަލަތަކާ ހެދި ލޯންޗު ކުރުން ހަފުތާއަކަށް ފަސްކުރަން ޖެހުނެވެ.
