ބާމިންހަމް (ޑިސެމްބަރު 26) - އިނގިރޭސި ޕްރިމިއާ ލީގުގައި މިރޭ ޗެލްސީއާ ދެކޮޅަށް ކުޅޭ މެޗަށް އެސްޓަން ވިލާ އިން ތައްޔާރުވަމުން އަންނަނިކޮށް އެ ޓީމުގެ ކޯޗު ސްޓީވެން ޖެރާޑް ކޮވިޑަށް ޕޮޒިޓިވް ވެއްޖެ އެވެ.
މިއީ ދާދި ފަހުން އެސްޓަން ވިލާގެ ކޯޗުކަމާ ހަވާލުވި ޖެރާޑަށް ކޮވިޑް-19ގެ ސަބަބުން މެޗުތަކެއް ގެއްލޭ ދެ ވަނަ ފަހަރެވެ. އެ ގޮތުން މި ސީޒަނުގައި ޖެރާޑް، ސްކޮޓްލެންޑްގެ ރޭންޖާސްގެ ކޯޗަކަށް ހުއްޓައި، ވަނީ އައިސޮލޭޝަނަކަށް ދާން ޖެހިފަ އެވެ.
ޕްރިމިއާ ލީގުގެ މި ހަފްތާގެ މެޗުތަކުގެ ކުރިން ކުރި ޓެސްޓްތަކުން ޖެރާޑް ޕޮޒިޓިވްވުމާ އެކު މިރޭ ޗެލްސީއާ ދެކޮޅަށް ކުޅޭ މެޗުގެ އިތުރުން އަންގާރަ ދުވަހު ލީޑްސް ޔުނައިޓެޑް ދަނޑުގައި ކުޅޭ މެޗު ވެސް ޖެރާޑަށް ގެއްލޭނެ އެވެ.
މިދިޔަ ހޮނިހިރު ދުވަހު އެސްޓަން ވިލާ އިން ޕްރިމިއާ ލީގުގައި ބާންލީއާ ދެކޮޅަށް ކުޅެން އޮތް މެޗު ވަނީ ފަހު ވަގުތު ފަސްކުރަން ޖެހިފަ އެވެ. އެއީ އެސްޓަން ވިލާގައި ކޮވިޑް-19ގެ ހާލަތު ގޯސްވުމުންނެވެ.
ޖެރާޑް، އެސްޓަން ވިލާގެ ކޯޗަކަށް ގެނައީ ނޮވެމްބަރު 11 ވަނަ ދުވަހު އެވެ. އޭގެ ފަހުން އެ ޓީމުން ޕްރިމިއާ ލީގުގައި ކުޅުނު ހަ މެޗުގެ ތެރެއިން ހަތަރު މެޗުން މޮޅުވި އެވެ. ބަލިވީ އަމިއްލަ ދަނޑުގައި މެންޗެސްޓާ ސިޓީ އަތުންނާއި ރަށުންބޭރުގައި ޖެރާޑްގެ ކުރީގެ ކްލަބް، ލިވަޕޫލް އަތުންނެވެ.
ކޮވިޑް-19ގެ ސަބަބުން މި ހަފްތާގައި ލިވަޕޫލުން ލީޑްސް ޔުނައިޓޭޑާ ކުޅެން އޮތް މެޗާއި ވުލްވްސް އާއި ވަޓްފޯޑް މެޗު އަދި އެވަޓަނާއި ބާންލީ ކުޅެން އޮތް މެޗު ވަނީ ފަސްކޮށްފަ އެވެ. މި މެޗުތަކާ އެއްކޮށް ކޮވިޑާ ހެދި ފަސް ކުރަން ޖެހުނު މެޗުތަކުގެ އަދަދު ވަނީ 13 އަށް އަރައިފަ އެވެ.
