ކުރިއަށް އޮތް ޗުއްޓީ ދުވަސްތަކުގައި ދަތުރުފަތުރުކޮށް އުޅޭއިރު ކޮވިޑް-19 ފެތުރުން ކޮންޓްރޯލް ކުރުމަށް ހަދާފައިވާ ގަވާއިދުތަކާ އެއްގޮތަށް އަމަލު ކުރުމަށް އެޗްޕީއޭއިން ރައްޔިތުންނަށް އިލްތިމާސްކޮށްފި އެވެ.
ފަހަކަށް އައިސް ރާއްޖެއިން ޕޮޒިޓިވްވާ މީހުންގެ އަދަދު ވަނީ މަތިވާން ފަށައިފަ އެވެ. އެޗްޕީއޭގެ ތަފާސްހިސާބުތަކުން ދައްކާ ގޮތުގައި އިއްޔެ މި ބައްޔަށް 106 މީހުން ވަނީ ޕޮޒިޓިވްވެފަ އެވެ. އެއީ މާލެއިން 49 މީހުންނާއި ރަށްތަކާއި ރިސޯޓުތަކުން 71 މީހުންނެވެ.
މީގެ ކުރިންވެސް ޗުއްޓީ ދުވަސްތަކާއި ދިމާކޮށް ކޮވިޑްގެ ކޭސްތައް އިތުރުވެފައިވެ އެވެ. އެހެންކަމުން ކުރިއަށް މިއޮތް ޗުއްޓީގައި އެކަމަށް ހުރިހާ އެންމެން ވެސް ސަމާލުވެ، ރައްކާތެރިކަމަށް އަޅަންޖެހޭ ފިޔަވަޅުތައް އެޅުމަށް އެޗްޕީއޭއިން ވަނީ އިލްތިމާސްކޮށްފަ އެވެ.
މިގޮތުން ބޭރަށް ނިކުމެ އުޅޭއިރާއި އާންމު ތަންތަނާއި ގިނަ މީހުން އެއްވާ ތަންތަނުގައި މާސްކު އަޅައި، ގައިދުރުކަން ބެހެއްޓުމަށާއި ބަލީގެ އަލާމާތް ފެންނަ ނަމަ ފްލޫ ކްލިނިކަށް ދެއްކުމަށާއި ސާމްޕަލް ދިނުމުގައި އެއްބާރުލުން ދިނުމަށް އެޗްޕީއޭއިން އެދެ އެވެ. އަދި ކޮވިޑް-19 އިން ދިފާއުވުމަށް ޖަހާ ވެކްސިން ފުރިހަމަކޮށް ބޫސްޓާ ޑޯޒް ޖެހުމަށް އެޗްޕީއޭއިން އިލްތިމާސްކޮށްފައިވެ އެވެ.
ރާއްޖެ އައި ފަތުރުވެރިންތަކެއްގެ ހަށިގަނޑުން ކޮވިޑްގެ އޮމިކްރޯން ވޭރިއެންޓު ވަނީ މިފަހުން ފެނިފަ އެވެ. ކޮވިޑްގެ އާ ވޭރިއަންޓެއް ކަމުގައިވާ އޮމިކްރޯން އަކީ ކަންބޮޑުވާންޖެހޭ ވޭރިއަންޓެއް ކަމަށް ދުނިޔޭގެ ސިއްހަތު ޖަމިއްޔާ، ޑަބްލިޔުއެޗްއޯއިން ވަނީ ކަނޑައަޅައިފަ އެވެ.
