އަލްޖިއާސް (ޑިސެމްބަރު 25) - އަންނަ މަހު ފެށުމަށް ހަމަޖެހިފައިވާ އެފްރިކަން ކަޕް އޮފް ނޭޝަންސްގައި ވާދަކުރާ އަލްޖީރިއާގެ ޓީމުގައި މެންޗެސްޓާ ސިޓީގެ ވިންގް ރިޔާދު މަހްރޭޒް ހިމަނައި އޭނާ އަށް ޓީމުގެ ކެޕްޓަންކަން ދީފި އެވެ.
އެފްރިކަން ކަޕް އޮފް ނޭޝަންސްގެ އެންމެ ފަހުގެ ޗެމްޕިއަން އަލްޖީރިއާގެ ސްކޮޑްގައި މަހްރޭޒް ހިމެނުނުއިރު، ކެޕްޓަންގެ ހައިސިއްޔަތުން ތަށި ދިފާއުކުރުމުގެ ޒިންމާ އެޅިފައި އޮތީ މަހްރޭޒް ބޮލުގަ އެވެ.
އެފްރިކަން ކަޕް އޮފް ނޭޝަންސްގައި މަހްރޭޒް ،30، އަލްޖީރިއާގެ ޓީމަށް ނަގާނެކަން ކުރިން ވެސް އޮތީ ބެލެވިފަ އެވެ. އެހެން ނަމަވެސް، ކެމަރޫންގައި އަންނަ މަހު މުބާރާތް އޮންނާނެކަން ކަށަވަރުވީ ވަރަށް ފަހުންނެވެ.
އެގާރަ ލަނޑާ އެކު، މަހްރޭޒަކީ މި ސީޒަންގައި ސިޓީ އަށް އެންމެ ގިނަ ލަނޑު ޖަހައިދިން ކުޅުންތެރިޔާ އެވެ.
މުބާރާތުގައި އަލްޖީރިއާ ކުޅޭ ފުރަތަމަ މެޗުގައި އަންނަ މަހުގެ 11 ވަނަ ދުވަހު ނުކުންނާނީ ސިއެރަ ލިއޯނާ ދެކޮޅަށެވެ. އަލްޖީރިއާ ހިމެނޭ ގުރޫޕް އީގައި ދެން އޮތީ އީކުއަޓޯރިއަލް ގިނީ އާއި އައިވަރީ ކޯސްޓެވެ.
އެފްރިކަން ކަޕް އޮފް ނޭޝަންސްގައި ވާދަކުރާ އައިވަރީ ކޯސްޓްގެ ސްކޮޑްގައި، ކްރިސްޓަލް ޕެލެސްގެ ފޯވަޑް ވިލްފްރެޑް ޒަހާ ވަނީ ހިމަނައިފަ އެވެ. މިދިޔަ މަހު އޮތް ވޯލްޑް ކަޕް ކޮލިފައިންގެ މެޗުތަކުގައި ގައުމީ ޓީމަށް ނުނަގަން ޒަހާ ،29، އެދުމާ އެކު، މި މުބާރާތަށް އޭނާ ނަގާނެކަމާ މެދު އޮތީ ސުވާލު އުފެދިފަ އެވެ. އެކަމަކު ޒަހާ އަށް ވަނީ ސްކޮޑުން ޖާގަ ދީފަ އެވެ. -- ބީބީސީ
