ޓޯކިޔޯ، ޖަޕާން (ޑިސެމްބަރު 22) - ޖަޕާނުގައި ހުންނަ އެމެރިކާގެ އަސްކަރީ މަރުކަޒަކާ ގުޅިފައިވާ ކޮވިޑް ކްލަސްޓާ އިން 200 އަށް ވުރެ ގިނަ މީހުންނަށް ބަލި ފެތުރިފައި ވާތީ ހިތްހަމަނުޖެހުން އުފެދިއްޖެ އެވެ.
ޖަޕާނުގެ ކަމާ ބެހޭ އިދާރާތަކުން އެމެރިކާ ސިފައިންނަށް އެންގީ ކޮވިޑަށް ޓެސްޓު ކުރުމަށާއި ކަރަންޓީނުވުމުގެ ގަވާއިދާ އެއް ގޮތަށް އަމަލު ކުރުމަށެވެ.
އެމެރިކާގެ އަސްކަރީ މަރުކަޒު ކޭމްޕް ހެންސެން ހުންނަނީ ދެކުނު އޮކިނާވާ ސަރަހައްދުގަ އެވެ. ފޮރިން މިނިސްޓަރު ޔޮޝިމަސާ ހަޔަޝީ ވިދާޅުވީ އެ ތަނާ ގުޅިފައިވާ 215 މީހަކު ޕޮޒިޓިވްވެފައިވާ ކަމަށެވެ.
ޖަޕާނުގައި އުޅޭ އެމެރިކާ ސިފައިންގެ ކޮމާންޑަރު ލެފްޓިނެންޓް ރިކީ ރުޕް އަށް ޖަޕާނު ސަރުކާރުން ހިތްހަމަނުޖެހޭކަން އަންގާފައިވާނެ ކަމަށް އޭނާ ވިދާޅުވި އެވެ.
ޖަޕާނުގެ ބޯޑަރުތައް މިހާރު ބޭރު ރައްޔިތުންނަށް ބަންދުކޮށްފައި ވާއިރު، ގައުމަށް އެތެރެވެވެނީ ފުރުމުގެ ކުރިންނާއި ލޭންޑު ކުރުމަށް ފަހު ކޮވިޑަށް ޓެސްޓުކޮށްގެންނެވެ. އެއަށްފަހު އަދި ދެ ހަފުތާ އައިސޮލޭޝަންގައި ހުންނަން ޖެހެ އެވެ.
ހަޔަޝީ ވިދާޅުވީ އެމެރިކާ ސިފައިންގެ ކޮވިޑް ޓެސްޓުތައް ހަދަނީ ފްލައިޓް ލޭންޑު ކުރާތާ 3-5 ދުވަސް ފަހުން ކަމަށާއި މަރުކަޒުގެ ތެރޭގައި އައިސޮލޭޓްވުމެއް ނެތި އުޅޭ ކަމަށެވެ.
"މިއީ ޖަޕާނުގެ ކޮވިޑް އުސޫލާ މުޅިން ހިލާފު ކަންކަން،" ޓޯކިޔޯގައި ނޫސްވެރިންނާ ވާހަކަދައްކަމުން ހަޔަޝީ ވިދާޅުވި އެވެ.
އޭނާ ވިދާޅުވީ ޖަޕާނު ސަރުކާރުގެ ކަންބޮޑުވުމާއި ހިތްހަމަނުޖެހުން އެމެރިކާ އަށް އަންގައި ދިނުމަށް އެދުނީ ބޮޑު ވަޒީރު ފުމިއޯ ކިޝީޑާ ކަމަށެވެ.
އެމެރިކާގެ އަސްކަރީ މަރުކަޒުގެ ކްލަސްޓާއާ ގުޅިފައިވާ މީހުންގެ ތެރެއިން އޮމިކްރޯން ވޭރިއެންޓް ފާހަގަވީ ކިތައް މީހުންގެ ގައިން ކަމެއް ސާފެއް ނުވެ އެވެ. ނަމަވެސް ފާއިތުވި ހަފުތާގައި އެމެރިކާގައި ޕޮޒިޓިވްވި ކޭސްތަކުގެ ތިންބައިކޮށްފައި އެއްބަޔަކީ އޮމިކްރޯންގެ ސަބަބުން ބަލިވި މީހުންނެވެ.
އޮކިނާވާގައި ހުންނަ އަސްކަރީ މަރުކަޒުގައި އެމެރިކާގެ 20،000 އަށް ވުރެ މެރިން ސިފައިން ތިބެ އެވެ. އެމެރިކާ ސިފައިންގެ އެހެން ދާއިރާތަކުން ވެސް އެތައް ހާސް ސިފައިން ޖަޕާނުގައި އުޅެ އެވެ.
