ބަންގްލަދޭޝްގައި މިއަދު ހެނދުނު ފެށި ސެންޓްރަލް ޒޯން ވޮލީބޯޅަ މުބާރާތުގައި ކުޅުނު ފުރަތަމަ މެޗުން ރާއްޖޭގެ ގައުމީ އަންހެން ޓީމު އަތުން އުޒްބެކިސްތާން ޓީމު ސީދާ ތިން ސެޓުން މޮޅުވެއްޖެ އެވެ.
އުޒްބެކިސްތާނުން ރާއްޖެއާ ދެކޮޅަށް ކުޅެ، ސެޓުތައް ގެންދިޔައީ 25-11، 25-08 އަދި 25-11 އިންނެވެ.
މިއީ 2019 ވަަނަ އަހަރު ނޭޕާލުގެ ކަތުމަންޑޫގައި ބޭއްވި ސައުތު އޭޝިއަން ގޭމްސް އަށް ފަހު ގައުމީ އަންހެން ޓީމުން ކުޅުނު ފުރަތަމަ މެޗެވެ. ގައުމީ އަންހެން ޓީމުން 2019 ވަނަ އަހަރު ބަންގްލަދޭޝްގައި ބޭއްވި ސެންޓްރަލް ޒޯން މުބާރާތުގެ ރިހި މެޑަލް ހޯދި އެވެ. އެކަމަކު، އޭރު ޓީމުގައި ތިބި ސީނިއާ ގިނަ ކުޅުންތެރިންތަކެއް މި ފަހަރު އަމިއްލަ ސަބަބުތަކާ ހެދި ޓީމުގައި ނުހިމެނެ އެވެ.
މި ފަހަރު ސެންޓްރަލް ޒޯން މުބާރާތުގައި ކުޅޭ އަންހެން ޓީމުގެ އެވްރެޖް އުމުރަށް ބަލާއިރު އުޅޭނީ 20-21 ވަރަކަށް އަހަރުގަ އެވެ. އެންމެ ފަހުން ރިހި މެޑަލް ހޯދި ޓީމުގެ ހަތަރު ކުޅުންތެރިން މި ފަހަރުގެ ސްކޮޑުގައި ހިމެނެ އެވެ. އޭގެ ތެރެއިން އެއް ކުޅުންތެރިއަކީ މި ފަހަރުގެ ޓީމުގެ ކެޕްޓަން އައިޝަތު އިމްތިނާން (ނާން) އެވެ.
މިއަދުގެ މެޗު ފަށައިގެން ފުރަަތަމަ ސެޓުގައި އުޒްބެކިސްތާނުން އެ ޓީމުގެ އިސްކޮޅުން ދިގު ދެ ކުޅުންތެރިން ކަމަށްވާ ޒޮޒަކޯން ސަޓިވޯލްޑިއޭވާ އާއި ޒާނިގޯރާ އަސްކަރޯވާގެ ބޭނުން އެޓޭކާއި ޑިފެންސްގައި ވެސް ރަނގަޅަށް ހިފައި ސެޓުގެ ކުރީކޮޅުގައި 7-0 އިން ލީޑެއްނެގި އެވެ. ރާއްޖޭގެ ޓީމުން އައިމިނަތު އަފާފް ނިޒާމް އާއި އައިމިނަތު އަރީޝާ އަދި ޝަހާ ޝާމިންގެ އެޓޭކްތަކެއް ފޮނުވާލައިގެން ޕޮއިންޓްތަކެއް އެއްކުރެވޭތޯ ބެލި ނަމަވެސް އުޒްބެކިސްތާންގެ ރިސީވާއި ޑިފެންސް ފެނުނީ ރަނގަޅަށެވެ. އުޒްބެކިސްތާނުން ފުރަތަމަ ސެޓު ގެންދިޔައީ 25-11 އިންނެވެ.
ދެ ވަނަ ސެޓު ފަށައިގެން 1-0 އިން އުޒްބެކިސްތާން ލީޑުނެގިތާ އިރުކޮޅެއްގެ ތެރޭގައި މުބާރާތުގެ މެޗުތައް ކުޅޭ އިންޑޯ އިން 10 ވަރަކަށް މިނިޓަށް ކަރަންޓް ދިޔަ އެވެ. އަލުން ފަށައިގެން ވެސް ފެނިގެންދިޔައީ އުޒްކިސްތާނުން ފުރަތަމަ ސެޓުގައި ދެއްކި ކުޅުން ތަކުރާރު ކުރިތަނެވެ. ނަތީޖާ އަކަށްވީ ފުރަތަމަ ސެޓަށް ވުރެ ތަފާތު ބޮޑުކޮށް، އުޒްބެކިސްތާނުން ދެ ވަނަ ސެޓު ގެންދިއުމެވެ. އުޒްބެކިސްތާނުން މި ސެޓު ގެންދިޔައީ. 25-08 އިންނެވެ.
ރާްއްޖޭން ވަނީ ތިން ވަނަ ސެޓުގެ ކުރީކޮޅުގައި 3-3 އިން އުޒްބެކިސްތާނާ އެއްވަރުކޮށްފަ އެވެ. އެކަމަކު، އޭގެ ފަހުން ފުލުފުލުގައި ޕޮއިންޓްތަކެއް ހޯދައި އުޒްބެކިސްތާން ޓީމުން ކުޅުން ރަނގަޅުކޮށް، މި ސެޓު ވެސް ގެންގޮސް މެޗުން މޮޅުވީ އެވެ. މި ސެޓު ގެންދިޔައީ 25-11 އިންނެވެ.
ގައުމީ ޓީމުގެ ކޯޗު މުމްތާޒް އަލީ (މުންތޭ) ބުނީ މެޗު ފަށައިގެން ކުޅުންތެރިންގެ ފަރާތުން ކޮންމެ ވެސް ވަރަކަށް ހާސްކަން ފެނުނު ކަމަށެވެ. އެކަމަކު، ޖުމްލަކޮށް ބަލާއިރު ޖޫނިއާ ޓީމެއްގެ ގޮތުގައި ރާއްޖޭން ފުރަތަަމަ މެޗުގައި މި ދެއްކި ކުޅުން ގޯހެއް ނޫން ކަމަށެވެ.
"އުޒްބެކިސްތާން ޓީމު މި ފެނުނީ ވަރަށް ވަރުގަދަކޮށް، ހުރިހާ ޑިޕާޓްމަންޓެއް ވެސް. އެ މީހުންގެ އިސްކޮޅާއި އެއްވަރަށް އެޓޭކްތައް ވެސް ޑިފެންސް ވެސް ފެނުނީ ރަނގަޅަށް. ފުރަތަމަ މެޗާ ބަލައި އަޅުގަނޑުމެންގެ މި އޮތް ޖޫނިއާ ޓީމު ވެސް ރަނގަޅަށް ކުޅުނު،" މުންތޭ ބުންޏެވެ.
މުންތޭ ބުނީ އުޒްބެކިސްތާން މެޗުން ޓީމުގެ ހާލަތު އިތުރަށް ދެނެގަނެވިއްޖެ ކަމަށާއި ކުރިއަށް ހުރި މެޗުތަކަށްދާއިރު، ޓީމު އެކުލަވާލަން ބަލާއިރު މި މެޗުގެ ބޭނުން ހިފޭނެ ކަމަށެެވެ.
އަންހެން ވޮލީ ޓީމު ދެން ކުޅޭ މެޗުގައި މާދަމާ ނުކުންނާނީ ނޭޕާލާ ދެކޮޅަށެވެ. އެ އަށް ފަހު ހޮނިހިރު ދުވަހު ލަންކާއާ ކުޅޭނެ އެވެ. އަދި އާދިއްތަ ދުވަހު ކިރްގިސްތާނާ ކުޅުމަށް ފަހު ލީގު ބުރުގެ ފަހު މެޗުގައި ބަންގްލަދޭޝާ ކުޅޭނީ ހޯމަ ދުވަހު އެވެ. ފައިނަލަށް ދާނީ ލީގު ބުރުގެ އެއް ވަނަ އަދި ދެ ވަނަ އެވެ. އަދި ލީގު ބުރުގެ ތިން ވަނަ އާއި ހަތަރު ވަނަ ޓީމު ރޭންކިން މެޗެއް ކުޅޭނެ އެވެ.
