ސިލޯން ޕެޓްރޯލިއަމް ކޯޕޮރޭޝަނުން ދަރަންޏަށް ނެގި ތެލަށް ފައިސާ ދެއްކުމުގެ ބަދަލުގައި އިރާނަށް ސައިފަތް އެކްސްޕޯޓް ކުރުމުގެ އެއްބަސްވުމެއްގައި ސޮއިކޮށްފި އެވެ.
ލަންކާ އިން ދަރަންޏަށް ތެޔޮ ނެގީ ނޭޝަނަލް އިރާނިއަން އޮއިލް ކޮމްޕެނީ އިންނެވެ. ނަމަވެސް އެމެރިކާއިން އިރާނާ ދެކޮޅަށް އަޅާފައިވާ ފިޔަވަޅުތަކާ ހެދި އިރާނުގެ ބޭންކުތަކާ މުއާމަލާތް ކުރުން އޮތީ މަނާކޮށްފަ އެވެ.
އެހެންކަމުން ބޭންކަށް ފައިސާ ދެއްކުމުގެ ބަދަލުގައި ކޮންމެ މަހަކު ވެސް ސްރީލަންކާގެ ސައިފަތް ބޯޑަށް ފަސް މިލިއަން ޑޮލަރަށް ވާ ވަރުގެ ރުޕީޒް ސަރުކާރުން ފޯރުކޮށްދޭނެ އެވެ.
ސައިފަތް ބޯޑުން މަރުކަޒީ ބޭންކުގެ ރޭޓަށް ބެލުމަށް ފަހު ސައިފަތް އެކްސްޕޯޓް ކުރާ ވަކިވަކި ކުންފުނިތަކަށް ފައިސާ ބަހާނެ އެވެ. އަދި އިރާނަށް ސައިފަތް އެކްސްޕޯޓް ކުރާނީ ކުންފުނިތަކުންނެވެ.
"މި ސްކީމްގެ ދަށުން އެމެރިކާ އާއި އދ. އިން އަޅާފައިވާ އެއްވެސް ފިޔަވަޅަކާ ހިލާފެއް ނުވާނެ. މިކަމުގައި އިރާނުގެ އެއްވެސް ބޭންކެއް ބައިވެރިނުކޮށް ކުރިއަށް ދެވޭނެ،" ލަންކާގެ ޕްލާންޓޭޝަން މިނިސްޓްރީން ނެރުނު ބަޔާނެއްގައި ބުންޏެވެ.
"ދަރަނި އަދާކުރުމުގެ މުހިއްމުކަން އިރާނުން ތަކުރާރުކޮށް ފާހަގަކޮށްފައި ވާއިރު، މި ސްކީމްގެ ދަށުން ފަސް މިލިއަން ޑޮލަރަށް ވާ ވަރަށް ލަންކާ ރުޕީޒް ހޭދަކޮށްގެން ދަރަނި އަދާކުރެވޭނެ."
އެ މިނިސްޓްރީން އިތުރަށް ބުނީ އެއްބަސްވުމުގެ ދަށުން ލަންކާ އިން ބޭރު ފައިސާ ނުގެއްލޭނެ ކަމަށެވެ. މި ވަގުތު ލަންކާ އަށް ދިމާވެފައި އޮތް އެންމެ ބޮޑު މައްސަލަ އަކީ ބޭރު ފައިސާގެ ރިޒާވް ދަށްވުމެވެ. އެގޮތަށް ދިމާވީ އިންޓްރެސްޓް ރޭޓް ކުޑަކޮށް ބޭއްވުމުގެ ނިޔަތުގައި ރިކޯޑް މިންވަރަށް ފައިސާ ޕްރިންޓު ކުރުމުންނެވެ.
ލަންކާ އިން އާއްމު ގޮތެއްގައި ދަރަންޏަށް ތެޔޮ ހޯދަނީ އެކުވެރި ގައުމުތަކުންނެވެ. ފައިސާގެ އަގު ވެއްޓޭ ވަރަކަށް، ދަރަންޏަށް ނެގި ތެލަށްވާ ފައިސާ، ޑޮލަރުން ދައްކަން އުނދަގޫވެ އެވެ.
ސްރީލަންކާ އިން މި އަހަރުގެ ނޮވެމްބަރު މަހުގެ ނިޔަލަށް 14.5 މިލިއަން ޑޮލަރުގެ ސައިފަތް އިރާނަށް އެކްސްޕޯޓް ކުރި އެވެ. އެއީ މިދިޔަ އަހަރާ އަޅާ ބަލާއިރު 0.39 ޕަސެންޓުގެ އުފުލުމެކެވެ.
