ސެންޓްރަލް ޒޯން ވޮލީބޯޅަ މުބާރާތުގައި ވާދަކުރަން ގައުމީ ފިރިހެން ވޮލީ ބޯޅަ ޓީމު މިއަދު ބަންގްލަދޭޝަށް ނުފުރި މާލޭގައި މަޑުކުރަން ޖެހިއްޖެ އެވެ.
ބަންގްލަދޭޝްގައި މި މަހު 23-29 އަށް ކުރިއަށްދާ ސެންޓްރަލް ޒޯން މުބާރާތުގައި ވާދަކުރަން ގައުމީ ފިރިހެން ވޮލީ ޓީމު އެއާޕޯޓަށް ދިޔަ ނަމަވެސް ޓީމު ތެރޭގައި ކޮވިޑް-19ގެ ހާލަތެއް ކުރިމަތިވެ، ޓީމަށް ފުރޭގޮތެއްނުވި އެވެ. ޓީމުގެ ހުރިހާ ކުޅުންތެރިން ނެގެޓިވް ޕީސީއާރް ޓެސްޓަކާ އެކު ފުރަން އެއާޕޯޓަށް ދިޔަ ނަމަވެސް ޓީމުގައި ޑައިރެކްޓް ކޮންޓެކްޓްގެ ގޮތުގައި ތިބި ކުޅުންތެރިން ތިބުމުން މިއަދު މޯލްޑިވިއަން ފްލައިޓުން ޑާކާ އަށް ނުފުރުނެެވެ.
ޓީމު މިހާރު މާލޭގައި ތިބިއިރު، ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އަންނަނީ އެޗްޕީއޭއާ ވާހަކަ ދައްކައިގެން ލަސްވެގެން ފިރިހެން ވޮލީ ޓީމު މާދަމާ ބަންގްލަދޭޝަށް ފުރޭނެ އިންތިޒާމެއް ރޭވޭތޯ މަސައްކަތް ކުރަމުންނެވެ.
ފިރިހެން ޓީމުން ސެންޓްރަލް ޒޯން މުބާރާތަށް ތައްޔާރުވާން މާލޭގައި ވަނީ މި މަހު ތެރޭގައި ހަ މެޗެއް ކުޅެފަ އެވެ. ސްރީ ލަންކާގެ ގައުމީ ޓީމާ ދެކޮޅަށް ކުޅުނު ތިން މެޗުން ރާއްޖެ ވަނީ ސީދާ ތިން ސެޓުން ބަލިވެފަ އެވެ. އޭގެ ފަހުން އިންޑިއާގެ ކްލަބް، ހައިދަރުއާބާދު ސްޕައިކާސްއާ ދެކޮޅަށް ގައުމީ ވޮލީ ޓީމު ކުޅުނު ތިން މެޗުން ވަނީ މޮޅުވެފަ އެވެ. ފުރަތަަމަ ދެ މެޗުން ހައިދަރުއާބާދު ސްޕައިކާސް އަތުން ގައުމީ ޓީމު މޮޅުވީ ތިން ސެޓު އެއް ސެޓުންނެވެ. އެކަމަކު، ފަހު މެޗުން ގައުމީ ފިރިހެން ވޮލީ ޓީމު ވަނީ ސީދާ ތިން ސެޓުން މޮޅުވެފަ އެވެ.
ސެންޓްރަލް ޒޯން ފިރިހެން މުބާރާތުގައި މިހާރު އޮތްގޮތުން ރާއްޖޭގެ އިތުރުން ދެން ވާދަކުރަނީ ހޯސްޓްގެ ބަންގްލަދޭޝާއި ނޭޕާލް، ލަންކާ އަދި އުޒްބެކިސްތާން އެވެ. މުބާރާތުގެ ޝެޑިއުލްގައިވާ ގޮތުން ފުރަތަމަ މެޗުގައި ފިރިހެން ވޮލީ ޓީމު އަންނަ ބުރާސްފަތި ދުވަހު ބަންގްލަދޭޝާ ކުޅޭނެ އެވެ.
މި ފަހަރުގެ ސެންޓްރަލް ޒޯން މުބާރާތް މި ބާއްވަނީ ދެ އަހަރުގެ މެދުކެނޑުމަކަށް ފަހު އެވެ. މިއީ ކޮވިޑް-19ގެ ހުއްޓުމަށް ފަހު ގައުމީ ވޮލީ ޓީމު ބައިވެރިވާ ފުރަތަމަ މުބާރާތެވެ.
އަންހެން ވޮލީ ޓީމު ބަންގްލަދޭޝްގައި
ފިރިހެން ވޮލީ ޓީމަށް މިއަދު ބަންގަލަދޭޝަށް ނުދެވުނު ނަމަވެސް ގައުމީ އަންހެން ވޮލީ ޓީމު ވަނީ ސެންޓްރަލް ޒޯން އަންހެން މުބާރާތުގައި ވާދަކުރަން ބަންގްލަދޭޝަށް ގޮސްފަ އެވެ. އެ މުބާރާތް ކުރިއަށްދާނީ 23-29 އަށެވެ.
މިއަދު ހަވީރު ބަންގްލަދޭޝްގައި ގައުމީ އަންހެން ވޮލީ ޓީމުގެ ފުރަތަމަ ފަރިތަކުރުންތައް ކުރިއަށް ގެންދާނެ އެވެ. ޓީމުގެ ކޯޗަކީ ދިވެހި ސިފައިންގެ ކްލަބްގައި ރަނގަޅު ކާމިޔާބީތަކެއް ހޯދާފައިވާ ކޯޗު، މުމްތާޒް އަލީ (މުންތޭ) އެވެ.
މީގެ ކުރިން ގައުމީ އަންހެން ޓީމުގެ ކޯޗުކަން ކުރަމުން އައީ އަހުމަދު އަދީލް (ބޭބެ) އެވެ. އެންމެ ފަހުން 2019 ވަނަ އަހަރު ބަންގްލަދޭޝްގައި ބޭއްވި ސެންޓްރަލް ޒޯން އަންހެން މުބާރާތުގައި އަންހެން ޓީމަށް އިރުޝާދުދިނުމުގައި ބޭބެގެ އިތުރުން ދެން ހަރަކާތްތެރިވީ އެސިސްޓަންޓް ކޯޗު މުހައްމަދު ފައިސަލް އެވެ. ފައިސަލް ހުރީ މިހާރު ވެސް ޓީމުގެ އެސިސްޓަންޓް ކޯޗުގެ މަގާމުގަ އެވެ.
އެންމެ ފަހުން ބޭއްވި ސެންޓްރަލް ޒޯން އަންހެން މުބާރާތުގައި ރިހި މެޑަލް ހޯދި ޓީމުގެ ގިނަ ކުޅުންތެރިންތަކެއް ޓީމުގައި މި ފަހަރު ނުހިމެނެ އެވެ. ސީނިއާ މަދު ކުޅުންތެރިންތަކެއް ގޮވައިގެން އަންހެން ވޮލީ ޓީމު މުބާރާތަށް، އައިއިރު ޓީމުގެ ކެޕްޓަނަކީ އައިޝަތު އިމްތިނާން (ނާން) އެވެ.
މި ފަހަރު ސެންޓްރަލް ޒޯން އަންހެން މުބާރާތުގައި ރާއްޖެ އާއި ބަންގްލަދޭޝްގެ އިތުރުން ދެން ވާދަކުރަނީ ނޭޕާލް، އުޒްބެކިސްތާން، ކިރްގިސްތާން އަދި ލަންކާ އެވެ. ޝެޑިއުލްގައިވާ ގޮތުން ރާއްޖެ ފުރަތަމަ މެޗުގައި ބުރާސްފަތި ދުވަހު ބަންގްލަދޭޝާ ދެކޮޅަށް ކުޅޭނެ އެވެ.
ސެންޓްރަލް ޒޯންގެ އަންހެން އަދި ފިރިހެން މުބާރާތް ވެސް ބަންގްލަދޭޝްގައި ކުރިއަށްދާނީ ފުރަތަމަ ލީގު ބުރެއް ކުޅުމަށް ފަހު އެންމެ ގިނަ ޕޮއިންޓް ހޯދާ ދެ ޓީމެއް ފައިނަލުގައި ކުޅޭ ގޮތަށެވެ. އަދި ތިން ވަނަ އާއި ހަތަރު ވަނަ ޓީމު ރޭންކިން މެޗެއް ކުޅޭނެ އެވެ.
