ތެހްރާން، އިރާން (ޑިސެމްބަރު 21) - ޔަމަނުގައި ހުންނަ އިރާނުގެ ސަފީރަށް ކޮވިޑް ޖެހިވަޑައިގެން ސިއްހީ ފަރުވާ އަށް އެ ގައުމުން ފުރުވާލި ނަމަވެސް އަވަހާރަވެފައިވާ ކަމަށް އިރާން ފޮރިން މިނިސްޓްރީން ބުނެފި އެވެ.
ޔަމަނުގެ ވެރިރަށް ސަނާ ކޮންޓްރޯލް ކުރަނީ އިރާނުގެ އެހީއާ އެކު އުޅޭ ހޫތީ ހަނގުރާމަވެރިންނެވެ. ނަމަވެސް އެ ތަނުގައި ހުންނަ އެއާޕޯޓު ސައުދީ އަރަބިއްޔާ އިން އޮންނަނީ ބަންދުކޮށްފަ އެވެ.
ޔަމަނުގެ ހޫތީންގެ އެދުމަށް އިރާގާއި އޮމާނުން ވެސް ސަފީރު ޔަމަނުން ފުރުމުގެ ހުއްދަ އަށް ސައުދީ އަރަބިއްޔާގައި އެދުމުން، ހުއްދަ ދިނީ މީގެ ދެ ދުވަސް ކުރިންނެވެ. އެއާއެކު އިރާގުގެ ވައިގެ އުޅަނދެއްގައި ސަފީރު ވަޑައިގެންނެވީ ބަގްދާދަށެވެ.
އިރާން ފޮރިން މިނިސްޓްރީގެ ތަރުޖަމާނު ސައީދް ހާތިބްޒާދެހް ވިދާޅުވީ ސަފީރު ހަސަން އެއިރްލޫ އަވަހާރަވީ "ބައެއް ގައުމުތަކުން މާ ލަހުން އެއްބާރުލުން ދިނުމުން" ކަމަށެވެ.
އިރާނާއި ސައުދީގެ މައްސަލަތައް ހައްލު ކުރަން ދެ ގައުމުގެ މެދުގައި މަޝްވަރާތަކުގެ މެދުވެރިއެއްގެ ދައުރު އަދާކުރަނީ އިރާގުންނެވެ. ޔަމަން ހަނގުރާމައިގައި ވަކި އަތަކަށް ނުޖެހި އޮތް ހަމައެކަނި ގަލްފުގެ އަރަބި ގައުމަކީ އޮމާން އެވެ.
ޔަމަންގެ ވެރިރަށް ސަނާގައި ގާއިމްކޮށްގެން އުޅޭ ހޫތީންގެ ސަރުކާރު ބަލައިގަންނަ ހަމައެކަނި ގައުމަކީ އިރާނެވެ. ހޫތީން ސަނާ ހިފީ ގާނޫނީ ސަރުކާރު އެތަނުން ބޭރުކޮށްލުމަށް ފަހު އެވެ.
ސައުދީ އަރަބިއްޔާ އިން ޔަމަނުގެ ގާނޫނީ ސަރުކާރުގެ އެދުމަށް ހަނގުރާމައިގެ ތެރެއަށް ވަނީ 2015 ވަނަ އަހަރު އެވެ. ސައުދީ އިން ތުހުމަތު ކުރާ ގޮތުގައި ހޫތީންނަށް އަސްކަރީ ގޮތުން އެހީވަނީ އިރާނުންނެވެ. ނަމަވެސް އިރާނުން އެކަން ދޮގުކުރެ އެވެ.
