ގާހިރާ، މިސްރު (ޑިސެމްބަރު 20) - ހަމާސް އަށް ޖާސޫސްކޮށްދިން ކަމަށް ސާބިތުވެ، މިސްރުގެ މުސްލިމް ބްރަދާހުޑްގެ ވެރިޔާ މަހްމޫދް އިއްޒަތު އުމުރަށް ޖަލަށް ހުކުމްކޮށްފި އެވެ.
އުމުރުން 77 އަހަރުގެ އިއްޒަތުގެ މައްޗަށް ޖާސޫސްކުރި ކަމަށް ސާބިތުވެފައި ވާއިރު، ޓެރަރިޒަމްގެ ކުށުގައި މި އަހަރުގެ ކުރީކޮޅު ވެސް އުމުރު ދުވަހުގެ ހުކުމެއް އޭނާގެ މައްޗަށް އިއްވި އެވެ.
މުސްލިމް ބްރަދާހުޑް އަކީ ހިންގުން މަނާކޮށްފައިވާ ޖަމާއަތެކެވެ. ފަލަސްތީނުގެ ގާޒާ ކޮންޓްރޯލް ކުރާ ހަމާސް އާއި މުސްލިމް ބްރަދާހުޑްއާ ގާތް ގުޅުމެއް އޮންނަ ކަމަށް ތުހުމަތު ކުރެވެ އެވެ.
މުސްލިމުން ބްރަދާހުޑްގެ ގިނަ ވެރިންނާ ދެކޮޅަށް ބޭރުގެ ފަރާތަކަށް ޖާސޫސްކުރި ކަމުގެ ތުހުމަތުކޮށްފައި ވެ އެވެ. އޭގެ ތެރޭގައި މިސްރުގެ ކުރީގެ ރައީސް މުހައްމަދު މުރްސީ ވެސް ހިމެނިވަޑައިގަންނަވަ އެވެ.
މިސްރާއި ފަލަސްތީން ގުޅޭ ރަފާހް ބޯޑަރު ހުރަސްކޮށް، މިސްރުގައި އުޅޭ ޓެރަރިސްޓުންނަށް ހަމާސް އިން ހަތިޔާރު ފޯރުކޮށްދޭ ކަމަށް މިސްރުން ތުހުމަތު ކުރެ އެވެ.
މިދިޔަ މޭ މަހު ހަމާސް އާއި އިޒްރޭލާ ދެމެދު 11 ދުވަސް ވަންދެން ކުރި ހަމަލާ ބަދަލުކުރުންތައް މެދުކަނޑާލުމުގެ އެއްބަސްވުމަކާ ހަމައަށް އައީ މިސްރު މެދުވެރިވެގެންނެވެ.
ފިލައިގެން އުޅޭތާ އެތައް އަހަރެއް ފަހުން އިއްޒަތު ހައްޔަރު ކުރީ ގާހިރާ އިން އޯގަސްޓް 2020 ވަނަ އަހަރު އެވެ. އޭނާ އުމުރަށް ޖަލަށްލާން ފުރަތަމަ ހުކުމް ކުރީ މި އަހަރުގެ އޭޕްރިލް މަހު އެވެ.
