ބަގްދާދް، އިރާގް (ޑިސެމްބަރު 20) - އިރާގުގައި ދެ އަހަރުގެ ތެރޭގައި 1000 ސްކޫލު އަޅަން ޗައިނާގެ ދެ ކުންފުންޏަކާ އެކު އެއްބަސްވެއްޖެ އެވެ.
ހައުސިން މިނިސްޓްރީގެ އޮފިޝަލް ހަސަން މެޖަހަމް އިރާގީ ނިއުސް އެޖެންސީ އަށް ވިދާޅުވީ ތައުލީމީ ދާއިރާގައި އޮތް ބާގަނޑު ބައްދަން 8000 ސްކޫލް ބޭނުންވާ ކަމަށެވެ.
ޗައިނާއާ އެކު އެއްބަސްވުންތަކުގައި ސޮއިކުރީ މިދިޔަ ބުރާސްފަތި ދުވަހު ބޮޑު ވަޒީރު މުސްތަފާ އަލް ކަދޭމީ ބައިވެރިވެވަޑައިގެންނެވި ރަސްމިއްޔާތެއްގަ އެވެ.
އެގޮތުން ޕަވާ ޗައިނާ ކުންފުނިން 679 ސްކޫލް އަދި ސައިނޯޓެކް ކުންފުނިން 321 ސްކޫލް އަޅައިދޭން އެއްބަސްވި އެވެ.
އިރާގަކީ ތެލުގެ މުއްސަނދިކަން އޮތް ގައުމެއް ނަމަވެސް، ކޮރަޕްޝަނާއި އަހަރުތަކެއް ވަންދެން ކުރިއަށް ދިޔަ ހަނގުރާމަތަކާ ހެދި މާ ބޮޑު ތަރައްގީއެއް ގެނެވިފައެއް ނުވެ އެވެ.
މެޖަހަމް ވިދާޅުވީ ސްކޫލުތަކުގެ މަސައްކަތް ދެ އަހަރުގެ ތެރޭގައި ނިންމަން ޖެހޭނެ ކަމަށެވެ. އޭނާ ވިދާޅުވީ އިރާގުން އަގު އަދާކުރާނީ ތެލުގެ އުފެއްދުންތަކުން ކަމަށެވެ.
ސްކޫލުތައް އެޅުމުގެ މަޝްރޫއުގެ ފުރަތަމަ މަރުހަލާ އަށް ފަހު ދެ ވަނަ މަރުހަލާގައި އިތުރު 3000 ސްކޫލް އަދި ތިން ވަނަ މަރުހަލާގައި އިތުރު 4000 ސްކޫލް އަޅަން ރާވާފައި ވެ އެވެ.
ޔުނިސެފުން ބުނެފައިވާ ގޮތުން މެދުއިރުމަތީގެ އެންމެ ހަރުދަނާ ތައުލީމީ ނިޒާމް މީގެ ކުރިން އޮތީ އިރާގުގަ އެވެ. ނަމަވެސް ހަނގުރާމައިގެ ސަބަބުން އެ ނިޒާމު ވަނީ ފުނޑުފުނޑުވެފަ އެވެ.
ގާތްގަނޑަކަށް 40 މިލިއަން މީހުންގެ އާބާދީއެއް އޮތް އިރާގުގައި ސްކޫލަށް ދާ އުމުރުގެ 3.2 މިލިއަން ކުދިން ތިބީ ތައުލީމުން މަހްރޫމުވެފަ އެވެ.
