ރިޔާދް، ސައުދީ އަރަބިއްޔާ (ޑިސެމްބަރު 19) - ޔަމަނުގައި ހުންނަ އިރާނުގެ ސަފީރަށް ކޮވިޑް ޖެހިވަޑައިގެން ސިއްހީ ފަރުވާ އަށް އެ ގައުމުން ފުރުމުގެ ހުއްދަ ސައުދީ އަރަބިއްޔާ އިން ދީފި އެވެ.
ޔަމަނުގެ ވެރިރަށް ސަނާ ކޮންޓްރޯލް ކުރަނީ އިރާނުގެ އެހީއާ އެކު އުޅޭ ހޫތީ ހަނގުރާމަވެރިންނެވެ. ނަމަވެސް އެ ތަނުގައި ހުންނަ އެއާޕޯޓު ސައުދީ އަރަބިއްޔާ އިން އޮންނަނީ ބަންދުކޮށްފަ އެވެ.
"ސަފީރު ފުރާވަޑައިގެންނެވީ އިރާގުގެ ވައިގެ އުޅަނދެއްގައި. މިހާރު ހުންނަވާނީ ބަގްދާދުގައި ކަމަށް ބެލެވޭ،" ސައުދީގެ އޮފިޝަލުން އޭއެފްޕީ އަށް ބުންޏެވެ.
އޮފިޝަލް ބުނީ ދަތުރު ހަމަޖައްސައިދިނީ ޔަމަނުގެ ހޫތީންގެ އެދުމަށް ކަމަށެވެ. އިރާގާއި އޮމާނުން ވެސް އެކަމަށް ހުއްދަ ދިނުމަށް އެދުމުން ސައުދީން އެއްބަސްވީ އެވެ.
އިރާނާއި ސައުދީގެ މައްސަލަތައް ހައްލު ކުރަން ދެ ގައުމުގެ މެދުގައި މަޝްވަރާތަކުގެ މެދުވެރިއެއްގެ ދައުރު އަދާކުރަނީ އިރާގުންނެވެ. ޔަމަން ހަނގުރާމައިގައި ވަކި އަތަކަށް ނުޖެހި އޮތް ހަމައެކަނި ގަލްފުގެ އަރަބި ގައުމަކީ އޮމާން އެވެ.
ޔަމަންގެ ވެރިރަށް ސަނާގައި ގާއިމްކޮށްގެން އުޅޭ ހޫތީންގެ ސަރުކާރު ބަލައިގަންނަ ހަމައެކަނި ގައުމަކީ އިރާނެވެ. ހޫތީން ސަނާ ހިފީ ގާނޫނީ ސަރުކާރު އެތަނުން ބޭރުކޮށްލުމަށް ފަހު އެވެ.
ސައުދީ އަރަބިއްޔާ އިން ޔަމަނުގެ ގާނޫނީ ސަރުކާރުގެ އެދުމަށް ހަނގުރާމައިގެ ތެރެއަށް ވަނީ 2015 ވަނަ އަހަރު އެވެ. ސައުދީ އިން ތުހުމަތު ކުރާ ގޮތުގައި ހޫތީންނަށް އަސްކަރީ ގޮތުން އެހީވަނީ އިރާނުންނެވެ. ނަމަވެސް އިރާނުން އެކަން ދޮގުކުރެ އެވެ.
