ސެންޓްރަލް ޒޯން ވޮލީބޯޅަ މުބާރާތަށް ތައްޔާރުވުމުގެ ގޮތުން ރާއްޖޭގެ ގައުމީ ފިިރިހެން ވޮލީބޯޅަ ޓީމުން އިންޑިއާގެ ހައިދަރުއާބާދު ސްޕައިކާސްއާ ދެކޮޅަށް ކުޅުނު ތިން ވަނަ މެޗުން މިއަދު ހަވީރު ސީދާ ތިން ސެޓުން މޮޅުވެއްޖެ އެވެ.
ހައިދަރުއާބާދު ޓީމާ ދެކޮޅަށް ކުޅުނު ފުރަތަމަ ދެ މެޗުން ރާއްޖެ މޮޅުވީ 3-1 ސެޓުންނެވެ. ގިނަ ސަޕޯޓަރުންތަކެއްގެ ކުރިމަތީގައި ކުޅުނު މިއަދުގެ މެޗު ތިން ސެޓުން ރާއްޖޭން ކާމިޔާބުކުރިއިރު، ސެޓުތައް ގެންދިޔައީ 25-22، 25-22 އަދި 25-22 އިންނެވެ.
ދެ ވަަނަ މެޗުގައި ލިބުނު އަނިޔާގެ ސަބަބުން ހައިދަރުއާބާދު ޓީމުގައި ހިމެނޭ އިންޑިއާ ގައުމީ ޓީމުގެ ކުޅުންތެރިޔާ، އަޖޭ ޗޯދުރީ މިއަދުގެ މެޗުގައި ނުކުޅެ އެވެ. އެކަމަކު، ހައިދަރުއާބާދު ޓީމުގައި ހިމެނޭ ރާއްޖޭގެ ކްލަބްތަކަށް ކުޅެފައިވާ އަނޫޕް ޑިކޯސްޓާގެ ރަނގަޅު ހަމަލާތަކާ އެކު ހައިދަރުއާބާދުން ފުރަތަަމަ ސެޓުގެ ކުރީކޮޅުގައި ލީޑުގައި އޮތެވެ. އެކަމަކު، ފުރަތަމަ ޓެކްނިކަލް ޓައިމްއައުޓަށް ދިޔައިރު، ރާއްޖެ އޮތީ 8-7 އިން ކުރީގަ އެވެ. އެހެން ނަމަވެސް އަލުން މެޗު ފަށައި ދެ ޓީމު ވަރަށް ވާންކޮށްދިޔައިރު، ރަނގަޅު ފޯމެއްގައި ކުޅެމުން އައި ރާއްޖޭގެ ހަސަން ނިލާމް (ޕާޓޭ) އާއި ކެޕްޓަން އިސްމާއިލް ސާޖިދު (ކުޑަކާއްޓޭ)ގެ ރަނގަޅު އެޓޭކްތަކާ އެކު ރާއްޖޭން 25-22 އިން ފުރަތަމަ ސެޓު ގެންގޮސް އިތުބާރު ހޯދި އެވެ.
ހައިދަރުއާބާދު ޓީމުން ފުރަތަމަ ސެޓެކޭ އެއްގޮތަށް ދެ ވަނަ ސެޓު ފެށީ ވެސް ރަނގަޅަށެވެ. ފުރަތަމަ ޓެކްނިކަލް ޓައިމްއައުޓް އައިިއިރު، ލީޑުގައި އޮތީ ވެސް ހައިދަރުއާބާދު ޓީމެވެ. އެއީ 6-8 އިންނެވެ. އެކަމަކު، އޭގެ ފަހުން ރާއްޖޭގެ ޓީމު ފޯމަކަށް އެޅި، ސެޓަރު، ހުސެއިން ޝާހިދު (ޝާޑު)ގެ ރަނގަޅު ސެޓިންތަކާއި ޕާޓޭ އާއި ކުޑަކާއްޓެ އަދި އަލީ ހުޒާމް (ހުޒަންޓެ)ގެ ހަމަލާތަކާ އެކު ދެ ވަނަ ޓެކްނިކަލް ޓައިމްއައުޓަށް ދިޔައިރު، 16-15 އިން ލީޑުނެގި އެވެ.
އެކަމަކު، އޭގެ ފަހުން ދެ ޓީމަށް ވެސް ގާތްގާތުގައި ސާވިސްގައި ގޯސްތަކެއް ހެދި ޕޮއިންޓްތަކެއް ގެއްލުނެވެ. ސެޓުގެ ފަހު ކޮޅު ވަރަށް ފޯރިގަދަކޮށް ދިޔައިރު، ޕްރެޝަރު ގަޑީގައި ރާއްޖޭން ބަދަލުތަކެއް ގެނެސްގެން ކުުރި ރަނގަޅު މަސައްކަތުން 25-22 އިން ސެޓު ގެންދިޔަ އެވެ. މި ސެޓުގައި ރާއްޖޭގެ ކޯޗު މުހައްމަދު ސާޖިދު (ކާއްޓޭ) ވަނީ ނިލާމްގެ ބަދަލުގައި އާދަމް ނަސީމް (އެޑަމް) އަދި ޝާޑުގެ ބަދަލުގައި ހުސެއިން ވިޝާމް (ބުޅިކެ) ކުޅެން އަރުވައިފަ އެވެ.
ފުރަތަމަ ދެ ސެޓު ލިބުމުން ރާއްޖެ އޮތީ ތިން ވަނަ ސެޓަށް ދިޔައިރު، ވަރަށް ރަނގަޅު ރޫހެއްގަ އެވެ. ފުރަތަަމަ ޓެކްނިކަލް ޓައިމްއައުޓަށް ދިޔައިރު 8-6 އިން ލީޑުގައި ރާއްޖެ އޮތްއިރު، ދެ ވަަނަ ޓެކްނިކަލް ޓައިމްއައުޓަށް ދިޔައިރު ވަނީ 16-12 އަށް ފުޅާކޮށްފަ އެވެ. ހަތަރު ޕޮއިންޓުގެ ލީޑެއް ސެޓުގެ ބޮޑުބައިގައި ހިފެހެއްޓި އެވެ.
ހައިދަރުއާބާދު ޓީމުން ފޮނުވާލި ރަނގަޅު ހަމަލާތަކެއް ބޮލްކްކުރުމުގައި ރާއްޖޭގެ އާދަމް ފައިރޫޒް އާއި ޝުއައިބް އަބްދުލް ލަތީފް ދިޔައީ މި މެޗުގައި ލިބޭ ކޮންމެ ފުރުސަތެއްގައި ކަހަލަ ގޮތަކަށް މަސައްކަތުގެ ރޭޓް ރަނގަޅު ކުޅުމެއް ދައްކަމުންނެވެ. ފަހު ސެޓުގެ ކުޅުން ނިމުނުއިރު، ރާއްޖެ ކުރީގައި އޮތީ 25-22 އިންނެވެ. ރާއްޖޭގެ ޕޮއިންޓްތައް ހޯދައިދިނުމުގައި ކުޑަކާއްޓެ ހިއްސާ ބޮޑެވެ.
މިއަދުގެ މެޗު ޝަރަފްވެރިކޮށްދެއްވީ އިންޑިއާގެ ސަފީރު މުނޫ މަހާވަރު އެވެ. ރާއްޖޭގެ ކުޅިވަރާ ބެހޭ ވަޒީރު އަހުމަދު މަހުލޫފް ވެސް ބައިވެރިވެ ވަޑައިގެންނެވިއިރު، ވީއޭއެމްގެ ރައީސް މުހައްމަދު ރަނޭޝް (ރަނޭ) އާއި ކުޅިވަރުގެ އިސް ފަރާތްތަކުން މިއަދުގެ މެޗަށް ވަޑައިގެންނެވި އެވެ.
މިއީ ރާއްޖޭގައި ގައުމީ ޓީމުން ސެންޓްރަލް ޒޯންގެ ކުރިން ކުޅުނު ފަހު މެޗެވެ. ސެންޓްރަލް ޒޯނަށް ތައްޔާރުވުމުގެ ގޮތުން މާލޭގައި ލަންކާއާ ދެކޮޅަށް ތިން މެޗާއި ހައިދަރުއާބާދު ޓީމާ ދެކޮޅަށް ތިން މެޗު ވަނީ ކުޅެފަ އެވެ. ލަންކާ ތިން މެޗުން ބަލިވިއިރު، ހައިދަރުއާބާދު ތިން މެޗުން ރާއްޖެ މޮޅުވީ އެވެ.
މިއަދު ހައިދަރުއާބާދާ ދެކޮޅަށް ގައުމީ ޓީމު ކުޅުނު މެޗަށް ފަހު ވަނީ މި މެޗަށް ހާއްސަކޮށް ކުރިއަށް ގެންދިޔަ ލަކީޑްރޯ އިން ދިމާވި ފަރާތްތަކުގެ ނަން އިއުލާނުކޮށްފަ އެވެ. ލަކީޑްރޯ އިން ނެގީ ގައުމީ ޓީމުގެ ޖޯޒީ ލިބޭ ދެ ފަރާތާއި މި މަހު ބަންގްލަދޭޝްގައި ކުރިއަށްދާ ސެންޓްރަލް ޒޯންގެ މެޗެއް ބަލާލަން ދެކޮޅު ޓިކެޓް ލިބޭ ހަތަރު މީހެކެވެ.
